અથર્વવેદ · અધ્યાય 19.13

ઇન્દ્રસ્ય બાહૂ સ્થવિરૌ વૃષાણૌ ચિત્રા ઇમા વૃષભૌ પારયિષ્ણૂ ।
તૌ યોક્ષે પ્રથમો યોગ આગતે યાભ્યાં જિતમસુરાણાં સ્વર્યત્

આશુઃ શિશાનો વૃષભો ન ભીમો ઘનાઘનઃ ક્ષોભણશ્ચર્ષણીનામ્ ।
સંક્રન્દનોઽનિમિષ એકવીરઃ શતં સેના અજયત્સાકમિન્દ્રઃ

સંક્રન્દનેનાનિમિષેણ જિષ્ણુનાયોધ્યેન દુશ્ચ્યવનેન ધૃષ્ણુના ।
તદિન્દ્રેણ જયત તત્સહધ્વં યુધો નર ઇષુહસ્તેન વૃષ્ણા

સ ઇષુહસ્તૈઃ સ નિષઙ્ગિભિર્વશી સંસ્રષ્ટા સ યુધ ઇન્દ્રો ગણેન ।
સંસૃષ્ટજિત્સોમપા બાહુશર્ધ્યુગ્રધન્વા પ્રતિહિતાભિરસ્તા

બલવિજ્ઞાયઃ સ્થવિરઃ પ્રવીરઃ સહસ્વાન્ વાજી સહમાન ઉગ્રઃ ।
અભિવીરો અભિષત્વા સહોજિજ્જૈત્રમિન્દ્ર રથમા તિષ્ઠ ગોવિદમ્

ઇમં વીરમનુ હર્ષધ્વમુગ્રમિન્દ્રં સખાયો અનુ સં રભધ્વમ્ ।
ગ્રામજિતં ગોજિતં વજ્રબાહું જયન્તમજ્મ પ્રમૃણન્તમોજસા

અભિ ગોત્રાણિ સહસા ગાહમાનોઽદાય ઉગ્રઃ શતમન્યુરિન્દ્રઃ ।
દુશ્ચ્યવનઃ પૃતનાષાડયોધ્યોઽસ્માકં સેના અવતુ પ્ર યુત્સુ

બૃહસ્પતે પરિ દીયા રથેન રક્ષોહામિત્રામપબાધમાનઃ ।
પ્રભઞ્જંછત્રૂન્ પ્રમૃણન્ન્ અમિત્રાન્ અસ્માકમેધ્યવિતા તનૂનામ્

ઇન્દ્ર એષાં નેતા બૃહસ્પતિર્દક્ષિણા યજ્ઞઃ પુર એતુ સોમઃ ।
દેવસેનાનામભિભઞ્જતીનાં જયન્તીનાં મરુતો યન્તુ મધ્યે

ઇન્દ્રસ્ય વૃષ્ણો વરુણસ્ય રાજ્ઞ આદિત્યાનાં મરુતાં શર્ધ ઉગ્રમ્ ।
મહામનસાં ભુવનચ્યવાનાં ઘોષો દેવાનાં જયતામુદસ્થાત્

અસ્માકમિન્દ્રઃ સમૃતેષુ ધ્વજેષ્વસ્માકં યા ઇષવસ્તા જયન્તુ ।
અસ્માકં વીરા ઉત્તરે ભવન્ત્વસ્માન્ દેવાસોઽવતા હવેષુ