આર્યાસપ્તશતી · શ્લોક 564-583

શઙ્કે યા સ્થૈર્યમયી શ્લથયતિ બાહૂ મનોભવસ્યાપિ ।
દર્પ-શિલામ્ ઇવ ભવતીં કતરસ્ તરુણો વિચાલયતિ

શાર્દૂલ-નખર-ભઙ્ગુર કઠોરતર-જાત-રૂપ-રચનો ઽપિ ।
બાલાનામ્ અપિ બાલાસા યસ્યાસ્ ત્વમ્ અપિ હૃદિ વસસિ

શ્રુત એવ શ્રુતિ-હારિણિ રાગોત્કર્ષેણ કણ્ઠમ્ અધિવસતિ ।
ગીત ઇવ ત્વયિ મધુરે કરોતિ નાર્થ-ગ્રહં સુતનુઃ

શ્રીઃ શ્રી-ફલેન રાજ્યં તૃણ-રાજેનાલ્પ-સામ્યતો લબ્ધમ્ ।
કુચયોઃ સમ્યક્-સામ્યાદ્ ગતો ઘટશ્ ચક્રવર્તિત્વમ્

શ્રોણી ભૂમાવ્ અઙ્કે પ્રિયો ભયં મનસિ પતિ-ભુજે મૌલિઃ ।
ગૂઢશ્વાસો વદને સુરતમ્ ઇદં ચેત્ તૃણં ત્રિદિવમ્

શ્લિષ્યન્ન્ ઇવ ચુમ્બન્ન્ ઇવ પશ્યન્ન્ ઇવ ચોલ્લિખન્ન્ ઇવાતૃપ્તઃ ।
દધદ્ ઇવ હૃદયસ્યાન્તઃ સ્મરામિ તસ્યા મુહુર્ જઘનમ્

શિરસિ ચરણ-પ્રહારં પ્રદાય નિઃસાર્યતાં સ તે તદ્ અપિ ।
ચક્રાઙ્કિતો ભુજઙ્ગઃ કાલિય ઇવ સુમુખિ કાલિન્દ્યાઃ

શોચ્યૈવ સા કૃશાઙ્ગી ભૂતિમયી ભવતુ ગુણમયી વાપિ ।
સ્નેહૈક-વશ્ય ભવતા ત્યક્તા દીપેન વર્તિર્ ઇવ

શુક ઇવ દારુ-શલાકા-પિઞ્જરમ્ અનુદિવસ-વર્ધમાનો મે ।
કૃન્તતિ દયિતા-હૃદયં શોકઃ સ્મર-વિશિખ-તીક્ષ્ણ-મુખઃ

શ્રુત્વાકસ્મિક-મરણં શુક-સૂનોઃ સકલ-કૌતુકૈક-નિધેઃ ।
જ્ઞાતો ગૃહિણી-વિનય-વ્યય આગત્યૈવ પથિકેન

શીલિત-ભુજઙ્ગ-ભોગા ક્રોડેનાભુદ્ધૃતાપિ કૃષ્ણેન ।
અચલૈવ કીર્ત્યતે ભૂઃ કિમ્ અશક્યં નામ વસુમત્યાઃ

શ્યામા વિલ્ચન-હરી બાલેયં મનસિ હન્ત સજ્જન્તી ।
લુમ્પતિ પૂર્વ-કલત્રં ધૂમ-લતા ભિત્તિ-ચિત્રમ્ ઇવ

શતશો ગતિર્ આવૃત્તિઃ શતશઃ કણ્ઠાવલમ્બનં શતશઃ ।
શતશો યામીતિ વચઃ સ્મરામિ તસ્યાઃ પ્રવાસ-દિને

શ્રુત-પર-પુષ્ટ-રવાભિઃ પૃષ્ટો ગોપીભિર્ અભિમતં કૃષ્ણઃ ।
શંસતિ વંશ-સ્તનિતૈઃ સ્તન-વિનિહિત-લોચનો ઽનુમતમ્

શઙ્કર-શિરસિ નિવેશિત-પદેતિ મા ગર્વમ્ ઉદ્વહેન્દુ-કલે ।
ફલમ્ એતસ્ય ભવિષ્યતિ તવ ચણ્ડી-ચરણ-રેણુમૃજા

શાખિ-શિખરે સમીરણ-દોલાયિત-નીડ-નિર્વૃતં વસતિ ।
કર્મૈક-શરાણમ્ અગણિત-ભયમ્ અશિથિલ-કેલિ ખગ-મિથુનમ્

શુક સુરત-સમર-નારદ હૃદય-રહસ્યૈક-સાર સર્વજ્ઞ ।
ગુરુ-જન-સમક્ષ-મૂક પ્રસીદ જમ્બૂ-ફલં દલય

શિરસા વહસિ કપર્દં રુદ્ર રુદિત્વાપિ રજતમ્ અર્જયસિ ।
અસ્યાપ્ય્ ઉદરસ્યાર્ધં ભજતસ્ તવ વેત્તિ કસ્ તત્ત્વમ્

શ્રોતવ્યૈવ સુધેવ શ્વેતાંશુ-કલેવ દૂર-દૃશ્યૈવ ।
દુષ્ટ-ભુજઙ્ગ-પરીતે ત્વં કેતકિ ન ખલુ નઃ સ્પૃશ્યા

શ્રવણોપનીત-ગુણયા સમર્પયન્ત્યા પ્રણમ્ય કુસુમાનિ ।
મદન-ધનુર્-લતયેવ ત્વયા વશં દૂતિ નીતો ઽસ્મિ