અનુત્તરપ્રકાશપઞ્ચાશિકા · શ્લોક 41-1add

મૃદાદેઃ કલશાદીનાં તત્ત્વં નાન્યન્ નિરૂપણે
ઇત્ય્ આહુસ્ તત્ત્વવાદિન્યઃ શ્રુતીનામ્ અન્તિમા ગિરઃ ॥

ઇદં સર્વં સદ્ એવાસીદ્ અગ્રે ઇતિ વિનિશ્ચયાત્
સત્તાવાચિનિ બીજે ઽસ્મિન્ ભાતિ માયા ત્વ્ ઇદં જગત્ ॥

વિલુપ્તપ્રત્યયાકારમ્ એતત્ સ પરિશિષ્યતે
તતો જ્ઞાનક્રિયાસાર વિદ્યેશ્વરસદાશિવાઃ ॥

શક્તિત્રિશૂલે લીયન્તે ચતુર્દશકલાત્મનિ
ઊર્ધ્વાધઃ સૃષ્ટિવપુષિ સર્વં લીનમ્ અતઃ [પરમ્] ॥

ઇત્થં પરસ્યાં સંવિત્તૌ સર્વં સંકુચિતં ક્રમાત્
અથવા મનસાતીતે યત્ર ક્વાપિ નિરઞ્જને ॥

ષટ્ત્રિંશત્તત્ત્વલહરી કલહાતીતગોચરે
વિશ્વાત્મનિ મહામન્ત્રે સ્વભાવે સા વિલીયતે ॥

કૃતશ્ ચૈન્મથિતે ધામ્નિ દીપ્તે કેનાપિ હેતુના
સર્વં હવિર્ ઇદં જુહ્વન્ ન દારિદ્ર્યેણ પીડ્યતે ॥

પઞ્ચપઞ્ચાત્મકં વિશ્વં પઞ્ચસ્પન્દવિજૃમ્ભિતમ્
સંકોચયત્પરામર્શાત્ સામાન્યસ્પન્દકેવલમ્ ॥

અહમિ પ્રલયં કુર્વન્ન્ ઇદમઃ પ્રતિયોગિનઃ
પરાક્રમપરો ભુઙ્ક્તે સ્વભાવમ્ અશિવાપહમ્ ॥

ઇતિ ષડધિકત્રિંશદ્ભેદપ્રસક્તજગત્તનુઃ પ્રસરતિ મહાશક્ત્યુલ્લેખવિચિત્રમહાપટી
જયતિ બહુશઃ સ્પન્દાકારા પરા ચિદ્ અનુત્તરા વિમૃશત જનાઃ કિં નો સ્વભાવવિજૃમ્ભિતમ્ ॥

સેયં કાશ્મીરભૂપાલ સંશ્રિતેન પ્રકાશિતા
સતા મુકુન્દરામેણ સન્મુદે ઽસ્તુ શિવે ઽર્પિતા ॥