Advayasiddhi · શ્લોક 21-36

ગમ્યાગમ્યવિકલ્પં તુ ભક્ષ્યાભક્ષ્યં તથૈવ ચ ।
પેયાપેયં તથા મન્ત્રી કુર્યાન્ નૈવ સમાહિતઃ ॥

વૈરોચનસમુદ્ભૂતાન્ સર્વપ્રાણ્યઙ્ગસમ્ભવાન્ ।
પ્રાણકાન્ ગુહ્યતત્ત્વજ્ઞો ભક્ષયેત્ સિદ્ધિહેતુના ॥

સર્વવર્ણસમુદ્ભૂતા જુગુપ્સ્યા નૈવ યોષિતઃ ।
સૈવ ભગવતી પ્રજ્ઞા સંવૃત્યા રૂપમ્ આશ્રિત્યા ॥

ન તિથિર્ ન ચ નક્ષત્રં નોપવાસો વિધીયતે ।
અદ્વયજ્ઞાનયુક્તસ્ય સિદ્ધિર્ ભવતિ સૌગતી ॥

બહુનાત્ર કિમ્ ઉક્તેન યદ્ ભવેદ્ ઉપલબ્ધિકમ્ ।
તત્ સર્વં તત્ત્વયોગેન દ્રષ્ટવ્યં તત્ત્વવેદિના ॥

હસ્ત્યશ્વખરગાવોષ્ટ્રપ્રદીપં શ્વાનસમ્ભવમ્ ।
મહાપ્રદીપસંમિશ્રં ભક્ષયેદ્ યોગવિત્ સદા ॥

ન ચાધ્યાસક્તિં કુર્વીત એકસ્મિન્ન્ અપિ યોગવિત્ ।
સમતાચિત્તયોગેન ભાવનીયો ભવાર્ણવઃ ॥

ઉત્પત્તિસ્થિતિનિરોધં ચાસમ્પૃક્તં પૃથગ્જનૈઃ ।
તસ્ય ભાવે તુ સંસારો નાન્યત્ર પ્રલયોદ્ભવઃ ॥

દિનં તુ ભગવાન્ વજ્રી નક્તં પ્રજ્ઞા વિધીયતે ।
એવં તુ ભાવયેદ્ યોગી લઘુ સિદ્ધિમ્ અવાપ્નુયાત્ ॥

યત્ તદ્ અવ્યક્તરૂપં તુ સર્વસત્ત્વેષુ સંસ્થિતમ્ ।
ગુરુવક્ત્રાત્ પરં તત્ત્વં પ્રાપ્યતે નાત્ર સમ્શયઃ ॥

અપ્રતિષ્ઠિતનિર્વાણં નિર્નિમિત્તં નિરાલયમ્ ।
વ્યાપકં સર્વસત્ત્વેષુ સંબોધિઃ પરમં પદમ્ ॥

એવં મત્વા તુ વૈ યોગી યો ઽભ્યસેદ્ બુદ્ધિમાન્ સદા ।
સ સિદ્ધ્યતિ ન સન્દેહો મન્દપુણ્યો ઽપિ માનવઃ ॥

આચાર્યાત્ પરતરં નાસ્તિ ત્રૈલોક્યે સચરાચરે ।
યસ્ય પ્રસાદાત્ પ્રાપ્યન્તે સિદ્ધયો ઽનેકધા બુધૈઃ ॥

વજ્રસત્ત્વઃ સ વૈ જ્ઞેયઃ સર્વબુદ્ધૈર્ નમસ્કૃતઃ ।
આચાર્યઃ પરમો દેવઃ પૂજનીયઃ પ્રયત્નતઃ ॥

સ એવ તથતારૂપી લોકાનુગ્રહહેતુના ।
રૂપમ્ આશ્રિત્ય સંવૃત્યા સંસ્થિતો યોગપીઠકે ॥

મૃત્યુર્ એષ વિકલ્પો યં ન ભાવઃ સર્વવસ્તુષુ ।
હન્યતે સ્વવિકલ્પેન પૃથગ્જનવિજૃમ્ભિતૈઃ ॥