108 Buddhist stotras · અધ્યાય 96

વજ્રસત્ત્વ મહાસત્ત્વ મહાયાન મહાત્મક ।
મહાપ્રભ મહાશુદ્ધ મહાનાથ નમો ઽસ્તુ તે ॥

વજ્રરાજ મહાવજ્ર વજ્ર સર્વતથાગત ।
મહાસત્ત્વ મહાવીર્ય મહોપાય નમો ઽસ્તુ તે ॥

વજ્રરાગ મહાશુદ્ધ સર્વસૌખ્ય મહાસુખ ।
સુખાગ્ર્યાનાદિનિધન મહાકામ નમો ઽસ્તુ તે ॥

વજ્રસાધુ મહાતુષ્ટિ સાધુકાર પ્રહર્ષક ।
મહાહર્ષ મહામોદ સુપ્રામોદ્ય નમો ઽસ્તુ તે ॥

વજ્રરત્ન મહારાજ સ્વાભિષેક મહામતે ।
સર્વરત્ન મહાશોભવિભૂષણ નમો ઽસ્તુ તે ॥

વજ્રતેજ મહાતેજ વજ્રપ્રભ મહાદ્યુતે ।
જિનપ્રભ મહાજ્વાલ બુદ્ધપ્રભ નમો ઽસ્તુ તે ॥

વજ્રકેતુ મહાકેતુ મહાધ્વજ ધનપ્રદ ।
આકાશકેતો મહાયષ્ટિ ત્યાગધ્વજ નમો ઽસ્તુ તે ॥

વજ્રહાસ મહાહાસ મહાપ્રીતિપ્રમોદન ।
પ્રીતિવેગ રતિપ્રીતે ધર્મપ્રીતે નમો ઽસ્તુ તે ॥

વજ્રધર્મ મહાધર્મ સર્વધર્મસુશોધક ।
બુદ્ધધર્મ સુધર્માગ્ર્ય રાગધર્મ નમો ઽસ્તુ તે ॥

વજ્રતીક્ષ્ણ મહાકોશ પ્રજ્ઞાજ્ઞાન મહામતે ।
પાપચ્છેદમહાખડ્ગ બુદ્ધશસ્ત્ર નમો ઽસ્તુ તે ॥

વજ્રહેતુ મહાચક્ર બુદ્ધચક્ર મહાનિધે ।
સર્વમણ્ડલધર્માગ્ર ધર્મચક્ર નમો ઽસ્તુ તે ॥

વજ્રભાષ મહાભાષ નિષ્પ્રપઞ્ચ મહાક્ષર ।
અનક્ષર મહાજાપ બુદ્ધવાચ નમો ઽસ્તુ તે ॥

વજ્રકર્મ સુકર્માગ્ર્ય મહાકર્મ સુકર્મકૃત્ ।
ગુહ્યપૂજ મહાપૂજ બુદ્ધપૂજ નમો ઽસ્તુ તે ॥

વજ્રરક્ષ મહાવર્મ કવચાગ્ર્ય મહાદૃઢ ।
મહારક્ષ મહાસાર બુદ્ધવીર્ય નમો ઽસ્તુ તે ॥

વજ્રયક્ષ મહાક્રોધ સર્વદુષ્ટભયાનક ।
સર્વબુદ્ધમહોપાય અગ્રયક્ષ નમો ઽસ્તુ તે ॥

મહાસન્ધિ મહામુદ્ર મહાસમયબન્ધક ।
મહામુષ્ટે સમુદ્રાગ્ર્ય વજ્રમુષ્ટે નમો ઽસ્તુ તે ॥

વન્દ્યો માન્યશ્ચ પૂજ્યશ્ચ સત્કર્તવ્યસ્તથાગતૈઃ ।
યસ્માદનાદિનિધનં બોધિચિત્તં ત્વમુચ્યસે ॥

ત્વામાસાદ્ય જિનાઃ સર્વે બોધિસત્ત્વાશ્ચ શૌરિણઃ ।
સંભૂતાઃ સંભવિષ્યન્તિ બુદ્ધબોધ્યગ્રહેતવઃ ॥

નમસ્તે વજ્રસત્ત્વાય વજ્રરત્નાય તે નમઃ ।
નમસ્તે વજ્રધર્માય નમસ્તે વજ્રકર્મણે ॥

ત્વામભિષ્ટુત્ય નામાગ્રૈઃ પ્રણમ્ય ચ સુભાવતઃ ।
યત્પુણ્યં તેન સર્વો હિ બુદ્ધબોધિમવાપ્નુયાત્ ॥

ઇદમુચ્ચારયેત્સમ્યગ્ નામાષ્ટશતમુત્તમમ્ ।
સકૃદ્વારં સુભક્તિસ્થઃ સર્વબુદ્ધત્વમાપ્નુયાત્ ॥