108 Buddhist stotras · અધ્યાય 61

કથં સ્તોષ્યામિ તે(તં) નાથમનુત્પન્નમનાલયમ્ ।
લોકોપમામતિક્રાન્તં વાક્પથાતીતગોચરમ્ ॥

તથાપિ યાદૃશો વા ઽસિ તથતાર્થેષુ ગોચરઃ ।
લોકપ્રજ્ઞપ્તિમાગમ્ય સ્તોષ્યે ઽહં ભક્તિતો ગુરુમ્ ॥

અનુત્પન્નસ્વભાવેન ઉત્પાદસ્તે ન વિદ્યતે ।
ન ગતિર્નાગતિર્નાથ અભાવાય નમો ઽસ્તુ તે ॥

ન ભાવો નાપ્યભાવો ઽસિ નોચ્છેદો નાપિ શાશ્વતઃ ।
ન નિત્યો નાપ્યનિત્યસ્ત્વમદ્વયાય નમો ઽસ્તુ તે ॥

ન હ્યેકો હરિતમાઞ્જિષ્ઠો વર્ણસ્તે નોપલભ્યતે ।
ન પીતઃ શુક્લઃ કૃષ્ણો વા અવર્ણાય નમો ઽસ્તુ તે ॥

ન મહાન્ નાપિ હ્રસ્વો ઽસિ ન દીર્ઘઃ પરિમણ્ડલઃ ।
અપ્રમાણગતિં પ્રાપ્તો ઽપ્રમાણાય નમો ઽસ્તુ તે ॥

ન દૂરે નાપિ વાસન્ને નાકાશે નાપિ વા ક્ષિતૌ ।
ન સંસારે ન નિર્વાણે અસ્થિતાય નમો ઽસ્તુ તે ॥

અસ્થિતઃ સર્વધર્મેષુ ધર્મધાતુગતિં ગતઃ ।
પરાં ગમ્ભીરતાં પ્રાપ્તો ગમ્ભીરાય નમો ઽસ્તુ તે ॥

એવં સ્તુતે સ્તુતો ભૂયાદથવા કિં વત સ્તુતઃ ।
શૂન્યેષુ સર્વધર્મેષુ કઃ સ્તુતઃ કેન વા સ્તુતઃ ॥

કસ્ત્વાં શક્નોતિ સંસ્તોતુમુત્પાદવ્યયવર્જિતમ્ ।
યસ્ય નાન્તો ન મધ્યં વા ગ્રાહ્યગ્રાહો ન વિદ્યતે ॥

ન ગતં નાગતં સ્તુત્વા સુગતં ગતિવર્જિતમ્ ।
તેન પુણ્યેન લોકો ઽયં વ્રજતાં સૌગતીં ગતિમ્ ॥