108 Buddhist stotras · અધ્યાય 56

નિરૌપમ્ય નમસ્તુભ્યં નિઃસ્વભાવાર્થવાદિને ।
યસ્ત્વં દૃષ્ટિવિપન્નસ્ય લોકસ્યૈવ હિતોદ્યતઃ ॥

ન ચ નામ ત્વયા કિઞ્ચિદ્ દૃષ્ટં બૌદ્ધેન ચક્ષુષા ।
અનુત્તરા ચ તે નાથ દૃષ્ટિસ્તત્ત્વાર્થદર્શિની ॥

ન બોદ્ધા ન ચ બોદ્ધવ્યમસ્તીહ પરમાર્થતઃ ।
અહો પરમદુર્બોધાં ધર્મતાં બુદ્ધવાનસિ ॥

ન ત્વયોત્પાદિતઃ કશ્ચિદ્ ધર્મો નાપિ નિરોધિતઃ ।
સમતાદર્શનેનૈવ પ્રાપ્તં પદમનુત્તમમ્ ॥

ન સંસારાત્પ્રકર્ષેણ ત્વયા નિર્વાણમીપ્સિતમ્ ।
શાન્તિસ્તે ઽધિગતા નાથ સંસારાનપરાધિતઃ ॥

ત્વં વિવેદૈકરસતાં સંક્લેશવ્યવદાનયોઃ ।
ધર્મધાત્વવિનિર્ભેદાદ્ વિશુદ્ધશ્ચાસિ સર્વતઃ ॥

નોદાહૃતં ત્વયા કિઞ્ચિદેકમપ્યક્ષરં વિભો ।
કૃત્સ્નશ્ચ વૈનેયજનો ધર્મવર્ષેણ તર્પિતઃ ॥

ન તે ઽસ્તિ સક્તિઃ સ્કન્ધેષુ ન ધાત્વાયતનેષુ ચ ।
આકાશસમચિત્તસ્ત્વં સર્વધર્મેષુ નિશ્રિતઃ ॥

સત્ત્વસંજ્ઞા ચ તે નાથ સર્વથા ન પ્રવર્તતે ।
દુઃખાર્તેષુ ચ સત્ત્વેષુ ત્વમતીવ કૃપાત્મકઃ ॥

સુખદુઃખાત્મનૈરાત્મ્યનિત્યાનિત્યાદિષુ પ્રભો ।
ઇતિ નાનાવિકલ્પેષુ બુદ્ધિસ્તવ ન સજ્જતે ॥

ન ગતિર્નાગતિઃ કાચિદ્ધર્માણામિતિ તે મતિ ।
ન ક્વચિદ્રાશિતઃ પ્રોક્તો ધર્માર્થપરમાર્થવિત્ ॥

સર્વત્રાનુગતશ્ચાસિ ન ચ યાતો ઽસિ કુત્રચિત્ ।
જન્મધર્મશરીરાભ્યામચિન્ત્યસ્ત્વં મહામુને ॥

એકત્વાન્યત્વરહિતં પ્રતિશ્રુત્કોપમં જગત્ ।
સંક્રાન્તિનાશાય ગતં બુદ્ધવાન્ ત્વમનિન્દિત ॥

શાશ્વતોચ્છેદરહિતં લક્ષ્યલક્ષણવર્જિતમ્ ।
સંસારમવબુદ્ધસ્ત્વં સ્વપ્નમાયાદિવત્ પ્રભો ॥

વાસનામૂલપર્યન્તક્લેશનદ્યો વિનિર્જિતાઃ ।
ક્લેશપ્રકૃતિતશ્ચૈવ ત્વયામૃતમુપાર્જિતમ્ ॥

અલક્ષણં ત્વયા ધીરં દૃષ્ટં રૂપમરૂપવત્ ।
લક્ષણોજ્જ્વલગાત્રશ્ચ દૃશ્યસે રૂપગોચરે ॥

ન ચ રૂપેણ દૃષ્ટેન દૃષ્ટ ઇત્યભિધીયસે ।
ધર્મદૃષ્ટ્યા સુદૃષ્ટો ઽસિ ધર્મતા ન ચ દૃશ્યતે ॥

શૌષીર્યો નાસ્તિ તે કાયો માંસાસ્થિરુધિરો ન ચ ।
ઇન્દ્રાયુધમિવ કાયં વિના દર્શિતવાનસિ ॥

નામયો નાશુચિઃ કાયે ક્ષુત્તૃષ્ણાસમ્ભવો ન ચ ।
ત્વયા લોકાનુવૃત્ત્યર્થં દર્શિતા લૌકિકી ક્રિયા ॥

કર્માવરણદોષશ્ચ સર્વથા ઽનઘ નાસ્તિ તે ।
ત્વયા લોકાનુકમ્પાયૈ કર્મપ્લોતિઃ પ્રદર્શિતા ॥

ધર્મધાતોરસંભેદાદ્ યાનભેદો ઽસ્તિ ન પ્રભો ।
યાનત્રિતયમાખ્યાતં ત્વયા સત્ત્વાવતારતઃ ॥

નિત્યો ધ્રુવઃ શિવઃ કાયસ્તવ ધર્મમયો જિન ।
વિનેયજનહેતોશ્ચ દર્શિતા નિર્વૃતિસ્ત્વયા ॥

લોકધાતુષ્વસંખ્યેષુ ત્વદ્ભક્તૈઃ પુનરીક્ષસે ।
ચ્યુતિજન્માભિસંબોધિચક્રનિર્વૃતિલાલસૈઃ ॥

ન તે ઽસ્તિ મન્યના નાથ ન વિકલ્પો ન ચેઞ્જના ।
અનાભોગેન તે લોકે બુદ્ધકૃત્યં પ્રવર્તતે ॥

ઇતિ સુગતમચિન્ત્યમપ્રમેયં ગુણકુસુમૈરવકીર્ય મયા પ્રાપ્તમ્ ।
કુશલમિહ ભવન્તુ તેન સત્ત્વાઃ પરમગભીરમુનીન્દ્રધર્મભાજનાઃ ॥