108 Buddhist stotras · અધ્યાય 4

પ્રણિપત્ય મુનિં મૂર્ધ્ના સુપ્રસન્નેન ચેતસા ।
વક્ષ્યામ્યદ્ય ચ નામાનિ સંબુદ્ધૈરનુવર્ણિતમ્ ॥

સુરુપો રૂપધારી ચ સર્વરૂપો હ્યનુત્તરઃ ।
સર્વલક્ષણસમ્પૂર્ણો મઞ્જુશ્રીરુત્તમઃ શ્રિયા ॥

અચિન્ત્યશ્ચિન્ત્યવિગતો ઽચિન્ત્યો ઽદ્ભુતવિક્રમઃ ।
અચિન્ત્યઃ સર્વધર્માણામચિન્ત્યો મનસસ્તથા ॥

શૂન્યતાભાવિતાત્માકઃ શૂન્યધર્મસમન્વિતઃ ।
શૂન્યસ્ત્વમધિમુક્તિશ્ચ શૂન્યત્રિભવદેશકઃ ॥

સર્વજ્ઞઃ સર્વદર્શી ચ સર્વભૂમિપતિર્વિભુઃ ।
મઞ્જુશ્રીવશવર્તી ચ પદ્માક્ષઃ પદ્મસંભવઃ ॥

પદ્મકિઞ્જલ્કવર્ણશ્ચ પદ્મપર્યઙ્કવાસનઃ ।
નીલોત્પલધરઃ પૂતઃ પવિત્રઃ શાન્તમાનસઃ ॥

પ્રત્યેકબુદ્ધો બુદ્ધસ્ત્વમાદિબુદ્ધો નિરુચ્યસે ।
ઋદ્ધિમાન્ વશિતાપ્રાપ્તશ્ચતુઃસત્યોપદેશકઃ ॥

લોકપાલઃ સહસ્રાક્ષ ઈશ્વરસ્ત્વં પ્રજાપતિઃ ।
શિવસ્ત્વં સર્વભૂતાનાં ત્વં વિભુર્ગુણસાગરઃ ॥

ઋષિસ્ત્વં પુણ્યઃ શ્રેષ્ઠશ્ચ જ્યેષ્ઠો જાતિસ્મરસ્તથા ।
વિનાયકો વિનેતા ચ જિનપુત્રો જિનાત્મજઃ ॥

ભાનુઃ સહસ્રરશ્મિમસ્ત્વં સોમસ્ત્વં ચ બૃહસ્પતિઃ ।
ધનદો વરુણશ્ચૈવ ત્વં વિષ્ણુસ્ત્વં મહેશ્વરઃ ॥

અનન્તો નાગરાજસ્ત્વં સ્કન્દઃ સેનાપતિસ્તથા ।
વેમચિત્રાસુરેન્દ્રસ્ત્વં ભૌમઃ શુક્રો બુધસ્તથા ॥

સર્વદેવમયો વીરઃ સર્વદેવૈર્નમસ્કૃતઃ ।
લોકધર્મમલાતીતસ્ત્વં લોકે ચાગ્રપુદ્ગલઃ ॥

લોકજ્ઞો લોકવિજ્ઞાતો જ્ઞાનિનાં પ્રવરો વરઃ ।
વરદો લયનં ત્રાણમધૃષ્યો મારકર્મિણામ્ ॥

ગમ્ભીરશ્ચાનવદ્યશ્ચ કલ્યાણમિત્રસંપદઃ ।
વૈદ્યસ્ત્વં શલ્યહર્તા ન નરદમ્યઃ સુસારથિઃ ॥

મતિમાન્ ગતિમાંશ્ચૈવ બુદ્ધિમાંશ્ચ વિચક્ષણઃ ।
પુણ્યવાન્ કલ્પવૃક્ષશ્ચ બોધ્યઙ્ગપુષ્પમણ્ડિતઃ ॥

વિમુક્તિફલસંપન્ન આશ્રયઃ સર્વદેહિનામ્ ।
મનોહરો મનોજ્ઞશ્ચ અનઘો બ્રહ્મચારિણામ્ ॥

કેતુસ્ત્વં ગ્રહશ્રેષ્ઠશ્ચ ઋષિભિર્મુનિપુઙ્ગવઃ ।
યુવરાજ્ઞાભિષિક્તસ્ત્ત્વં દશભૂમીશ્વરઃ પ્રભુઃ ॥

સાર્થવાહો ગણશ્રેષ્ઠો નિર્વાણોત્તમદેશકઃ ।
ખસમો મધ્યકલ્પસ્ત્વં ત્વં તેજો વાયુરેવ ચ ॥

ચિન્તામણિસ્ત્વં સત્ત્વાનાં સર્વાશાપરિપૂરકઃ ।
નમો ઽસ્તુ તે મહાવિદ્ય સર્વભૂતનમસ્કૃત ॥