108 Buddhist stotras · અધ્યાય 28

મઞ્જુશ્રિયં મહાવીરં સર્વમારવિનાશનમ્ ।
સર્વસિદ્ધીશ્વરં નાથં વાગીશ્વરં નમામ્યહમ્ ॥

મઞ્જુઘોષં મહાવીરં સર્વમારવિનાશનમ્ ।
સર્વાકારપ્રદાતારં ધર્મધાતું નમામ્યહમ્ ॥

મહોષ્ણીષં સિતચ્છત્રં તેજોરાશિં જયોદિતમ્ ।
વિકિરણોદ્ગતં ચૈવ મહોગ્રતેજસં નમે ॥

અક્ષોભ્યં ચ મહાબોધિં વજ્રસત્ત્વં નમામ્યહમ્ ।
વજ્રરાજં વજ્રરાગં વજ્રસાધું નમામ્યહમ્ ॥

શ્રીરત્નસમ્ભવં નાથં વજ્રરત્નં નમામ્યહમ્ ।
વજ્રસૂર્યં વજ્રકેતું વજ્રહાસં નમે સદા ॥

અમિતાભં મહારાજં વજ્રધર્મં નમામ્યહમ્ ।
વજ્રતીક્ષ્ણં મહાકેતું વજ્રભાષં નમે નમે ॥

અમોઘસિદ્ધિં સિદ્ધેશં વજ્રકર્મ નમામ્યહમ્ ।
વજ્રરક્ષં વજ્રયક્ષં વજ્રસન્ધિં નમે સદા ॥

લોચનાખ્યાં મહાદેવીં પાણ્ડરાખ્યાં નમામ્યહમ્ ।
મામકીં ચૈવ દેવીં તાં તારાદેવીં નમે નમે ॥

વજ્રાઙ્કુશં મહાવીરં વજ્રપાશં મહત્પ્રભમ્ ।
વજ્રસ્ફોટઃ મહાનાથં વજ્રાવેશં નમે નમે ॥

અધિમુક્તીશ્વરીં ભૂમિં પ્રમુદિતાં નમામ્યહમ્ ।
વિમલાખ્યાં મહાભૂમિં પ્રભાકરીં નમે નમે ॥

અર્ચિષ્મતીં સુદુર્જયાં ચાભિમુખીં નમામ્યહમ્ ।
દૂરઙ્ગમામચલાખ્યાં સાધુમતીશ્વરીં નમે ॥

ધર્મમેઘાં મહામેઘાં સમતાખ્યાં પ્રભાં નમે ।
રત્નપારમિતાં દેવીં દાનપારમિતાં નમે ॥

શીલપારમિતાં દેવીં ક્ષાન્તિપારમિતાં નમે ।
વીર્યપારમિતાં દેવીં ધ્યાનપારમિતાં શ્રયે ॥

પ્રજ્ઞાપારમિતાં દેવીમ્ ઉપાયાખ્યં નમામ્યહમ્ ।
પ્રણિધાનબલં ચૈવ જ્ઞાનપારમિતાં સદા ॥

કર્મપારમિતાં દેવીં નમામિ સતતં તથા ।
આયુશ્ચિત્તપરિષ્કારં કર્મોપપત્તિકાં નમે ॥

ઋદ્ધ્યાખ્યામધિમુક્તિં ચ પ્રણિધાનાં નમામ્યહમ્ ।
જ્ઞાનાખ્યવશિતાં દેવીં ધર્માખ્યવશિતાં નમે ॥

તથતાં ચ મહાદેવીં બુદ્ધબોધિં નમામ્યહમ્ ।
વસુમતીં મહાલક્ષ્મીં રત્નજ્વાલાં નમે નમે ॥

ઉષ્ણીષવિજયાં દેવીં મારીચીં પર્ણશાબરીમ્ ।
જાઙ્ગુલિં ધારણીં વન્દે અનન્તમુખધારણીમ્ ॥

ચુન્દાં પ્રજ્ઞાં ચ પદ્માં ચ સર્વાવરણશોધનીમ્ ।
અક્ષયજ્ઞાનકારણ્ડં ધર્મકાયવતીં નમે ॥

ધર્મપ્રતિવિદં દેવમર્થં ચ પ્રતિસંવિદમ્ ।
નિરુક્તિસંવિદં દેવં પ્રતિભાનાખ્યસંવિદમ્ ॥

વજ્રલાસ્યાં વજ્રમાલાં વજ્રગીતાં નમે સદા ।
વજ્રનૃત્યાં મહાદેવીં નમામિ સતતં મુદા ॥

સમન્તભદ્રં બોધીશમક્ષયતાં મતિં નમે ।
ક્ષિતિગર્ભં ખગર્ભં ચ બોધિસત્ત્વં નમામ્યહમ્ ॥

ગગણગઞ્જનાથેશં રત્નપાણિં નમે નમે ।
સાગરમતિં બોધીશં વજ્રગર્ભં નમામ્યહમ્ ॥

લોકેશ્વરં મહાસત્વં સ્થાનપ્રાપ્તં નમામ્યહમ્ ।
ચન્દ્રપ્રભં મહાતેજં વન્દે ઽહં જાલિનીપ્રભમ્ ॥

અમિતપ્રભબોધોશં શ્રીપતિં ભાનુકૂટકમ્ ।
સર્વશોકતમોદ્ઘાટવિષ્કમ્ભિનં નમામ્યહમ્ ॥

યમાન્તકં મહાવીરં પ્રજ્ઞાન્તકં નમે નમે ।
પદ્માન્તકં મહાવીરં વિઘ્નાન્તકં નમામ્યહમ્ ॥

ત્રૈલોક્યવિજયં વીરં વજ્રજ્વાલાં નમામ્યહમ્ ।
હેરુકં વજ્રવીરેશં પરમેશં નમામ્યહમ્ ॥

ચક્રવર્ત્તીશ્વરં વન્દે સુમ્ભરાજં નમામ્યહમ્ ।
પુષ્પાં ધૂપાં મહાદીપાં ગન્ધાં દેવીં નમામ્યહમ્ ॥

વજ્રરૂપાં વજ્રશબ્દાં રસવજ્રાં નમામ્યહમ્ ।
વજ્રસ્પર્શાં મહાદેવીં વિશ્વવર્ણાં નમે સદા ॥

ઇન્દ્રયમજલેશાંશ્ચ કુબેરમીશ્વરં નમઃ ।
અગ્નિં નૈરૃત્યનાથં ચ વાયુરાજં નમામ્યહમ્ ॥

બ્રહ્માણં વિષ્ણુદેવં ચ મહેશ્વરં કુમારકમ્ ।
બ્રહ્માણીં ચ મહાદેવીં રુદ્રાણીં વૈષ્ણવીં નમે ॥

કૌમારીં રક્તવર્ણાં ચ મહેન્દ્રાણીં નમામ્યહમ્ ।
વારાહીં કાલિકાં ચણ્ડીં ભૃઙ્ગિણં ગણનાયકમ્ ॥

મહાકાલં મહાભીમં નન્દિકેશં રવિં નમે ।
ચન્દ્રં ભૌમં બુધં વન્દે ગુરું શુક્રં શનૈશ્ચરમ્ ॥

રાહું કેતું બલભદ્રં જયકરં નમે સદા ।
મધુકરં વસન્તં ચ અનન્તં વાસુકિં નમે ॥

તક્ષં કર્કોટકં પદ્મં મહાપદ્મં નમામ્યહમ્ ।
શઙ્ખપાલં ચ કુલિકં વેમચિત્રં વલિં નમે ॥

પ્રહ્લાદં ચ મહાદૈત્યં વૈરોચનં નમે સદા ।
ગુરુડેન્દ્ર સુમ્ભરાજં પંચશિખં નમામ્યહમ્ ॥

સર્વાર્થસિદ્ધિં વિઘ્નેશં પૂર્ણભદ્રં નમામ્યહમ્ ।
મણિભદ્રં મહાયક્ષં ધનદં ચ મહેશ્વરમ્ ॥

વૈશ્રવણં મહાવીરં ચિવિકુણ્ડલિનં નમામ્યહમ્ ।
કેલિમાલિં સુખેન્દ્રં ચ ચલેન્દ્રં ચ નમામ્યહમ્ ॥

હારતીં યક્ષિણીં દેવીં બહુપુત્રવતીં નમે ।
અશ્વિનીં ભરણીં તારાં કૃત્તિકાં રોહણીં તથા ॥

મૃગશીર્ષાં તથૈવાર્દ્રાં પુનર્વસું નમામ્યહમ્ ।
પુષ્યમાશ્લેષકાતારાં મઘાં ચ પૂર્વાફાલ્ગુનીમ્ ॥

ઉત્તરાફાલ્ગુનીં હસ્તં ચિત્રાં સ્વાતિં વિશાખકામ્ ।
અનુરાધાં તથા જ્યેષ્ઠાં મૂલતારાં નમામ્યહમ્ ॥

પૂર્વાષાઢોત્તરાષાઢાં શ્રવણાં ચ નમામ્યહમ્ ।
ધનિષ્ઠાં શતભિષાં ચ પૂર્વોત્તરાભાદ્રપદામ્ ॥

રેવતીં ચ મહાતારામ્ અભિજિતં નમામ્યહમ્ ।
વજ્રાઙ્કુશં મહાવીરં વજ્રપાશં નમામ્યહમ્ ॥

વજ્રસ્ફોટં મહાભીમં વજ્રાંશં વૈ નમે નમે ।
વાગીશ્વરં મહાબોધિં સર્વવિઘ્નવિનાશકમ્ ॥

સર્વજ્ઞં જ્ઞાનદાતારં ધર્મધાતું નમામ્યહમ્ ।
મઞ્જુશ્રિયં મહાજ્ઞાનં સર્વવિદ્યાપ્રદેશ્વરમ્ ।
સર્વાકારસ્વરૂપં ચ વાદિરાજં નમામ્યહમ્ ॥