108 Buddhist stotras · અધ્યાય 26

શમદમનિરતાનાં શાન્તદાન્તાશયાનાં ખગપથસદૃશાનામન્તરીક્ષસમાનામ્ ।
ખિલમલવિધુતનાં માર્ગજ્ઞાનસ્થિતાનાં શૃણુત વરવિશેષં બોધિસત્ત્વાંશ્ચ શ્રેષ્ઠાન્ ॥

કુશલસતસહસ્રં સંચિતં કલ્પકોટયા સુબુદ્ધશતસહસ્રં પૂજયિત્વા ગૃહીતમ્ ।
પ્રત્યેકજિનવરાન્વૈ પૂજયિત્વા ત્વનન્તાન્ સકલજગહિતાય જાયતે બોધિચિત્તમ્ ॥

ઉત તપતપિતાનાં ક્ષાન્તિપારંગતાનાં હૃતશ્રિતચરિતાનાં પુણ્યજ્ઞાનોદ્ગતાનામ્ ।
વિપુલગતિમતીનાં પુણ્યજ્ઞાનાશયાનાં દશબલસમતુલ્યં જાયતે બોધિચિત્તમ્ ॥

પ્રમુદિતસુમતીનાં દાનધર્મે રતાનાં સકલજગહિતાર્થં નિત્યમેવોદ્યતાનામ્ ।
જિનગુણનિરતાનાં સત્ત્વરક્ષાવ્રતાનાં ત્રિભુવનહિતકર્તૃ જાયતે બોધિચિત્તમ્ ॥

અકુશલવિરતાનાં શુદ્ધમાર્ગે સ્થિતાનાં વ્રતનિયમરતાનાં શાન્તસૌમ્યેન્દ્રિયાણામ્ ।
જિનશરણગતાનાં બોધિચર્યાશયાનાં ત્રિભુવનહિતસાધ્યં જાયતે બોધિચિત્તમ્ ॥

અનુગતકુશલાનાં ક્ષાન્તિસ્વારસ્યભાજાં વિદિતગુણરસાનાં ત્યક્તમાનોત્સવાનામ્ ।
નિહિતશુભમતીનાં દાનસૌમ્યાશયાનાં સકલહિતવિધાનં જાયતે બોધિચિત્તમ્ ॥

પ્રચલતિ શુભકાર્યે ધીરવીર્યાઃ સહાયા નિખિલજનહિતાર્થં પ્રોદ્યતે માનસિંહઃ ।
અવિરતગુણસાધ્યા નિર્જિતક્લેશસંધા ઝટિતિ મનસિ તેષાં જાયતે બોધિચિત્તમ્ ॥

સુસમવહિતચિત્તા ધ્વસ્તમોહાન્ધકારા વિગલિતમદમાના ત્યક્તસંક્લિષ્ટમાર્ગાઃ ।
સમસુખનિરતા યે ત્યક્તસંસારસંગા ઝટિતિ મનસિ તેષાં જાયતે બોધિચિત્તમ્ ॥

વિમલખસમચિત્તા જ્ઞાનવિજ્ઞાનવિજ્ઞા નિહતનમુચિમારા વાન્તક્લેશાભિમાનાઃ ।
જિનપદશરણસ્થા લબ્ધતત્ત્વાર્થકાયે સપદિ મનસિ તેષાં જાયતે બોધિચિત્તમ્ ॥

ત્રિભુવનશિવસાધ્યોપાયવિજ્ઞાનધીરાઃ કરિબલપરિહારોપાયવિદૃદ્ધિમન્તઃ ।
સુગતગુણસમીહા યે ચ પુણ્યાનુરાગા સપદિ મનસિ તેષાં જાયતે બોધિચિત્તમ્ ॥

ત્રિભુવનહિતકામા બોધિસંભારપૂર્ત્યૈ પ્રણિહિતમનસા યે દુષ્કરે ઽપિ ચરન્તિ ।
અવિરતશુભકર્મ પ્રોદ્યતાં બોધિસત્ત્વાઃ સપદિ મનસિ તેષાં જાયતે બોધિચિત્તમ્ ॥

દશબલગુણકામા બોધિચર્યાનુરક્તા વિજિતકરિબલૌઘાસ્ત્યક્તમાનાનુષઙ્ગાઃ ।
અનુગતશુભમાર્ગા લબ્ધધર્માર્થકામા ઝટિતિ મનસિ તેષાં જાયતે બોધિચિત્તમ્ ॥

ઇતિ ગણિતગુણાંશા બોધિચર્યાશ્ચરન્તુ જિનપદપ્રણિધાના સત્સમૃદ્ધિં લભન્તુ ।
ત્રિભુવનપરિશુદ્ધા બોધિચિત્તં લભન્તુ ત્રિશરણપરિશુદ્ધા બોધિસત્ત્વા ભવન્તુ ॥

દશપારમિતાઃ પૂર્ય દશભૂમીશ્વરો ભવેત્ ।
ભૂયો ઽપિ કથ્યતે હ્યેતચ્છૃણુતૈવં સમાસતઃ ॥

બોધિચિત્તં યદાસાદ્ય સંપ્રદાનં કરોતિ યઃ ।
તદા પ્રમુદિતાં પ્રાપ્તો જમ્બૂદ્વીપેશ્વરો ભવેત્ ॥

તત્રસ્થઃ પાલયેત્ સત્ત્વાન્ યથેચ્છપ્રતિપાદનૈઃ ।
સ્વયં દાને પ્રતિષ્ઠિત્વા પરાંશ્ચાપિ નિયોજયેત્ ॥

સર્વાન્ બોધૌ પ્રતિષ્ઠાપ્ય સંપૂર્ણદાનપારગઃ ।
એતત્કર્માનુભાવેન સંવરં સમુપાચરેત્ ॥

સમ્પચ્છીલં સમાધાય સંવરં કુશલી ભવેત્ ।
તતઃ સ વિમલાં પ્રાપ્તશ્ચાતુર્દ્વીપેશ્વરો ભવેત્ ॥

તત્રસ્થઃ પાલયેત્ સત્ત્વાનકુશલં નિવારયેત્ ।
સ્વયં શીલે પ્રતિષ્ઠિત્વા પરાંશ્ચાપિ નિયોજયેત્ ॥

સર્વાન્ બોધૌ પ્રતિષ્ઠાપ્ય સમ્પૂર્ણકુશલી ભવેત્ ।
એતદ્ધર્મવિપાકેન ક્ષાન્તિવ્રતમુપાશ્રયેત્ ॥

સમ્યક્ ક્ષાન્તિવ્રતં ધૃત્વા ક્ષાન્તિભૃત્ કુશલી ભવેત્ ।
તતઃ પ્રાભાકરીં પ્રાપ્તસ્ત્રયસ્ત્રિંશાધિપો ભવેત્ ॥

તત્રસ્થઃ પાલયેત્ સત્વાન્ ક્લેશમાર્ગનિવારણૈઃ ।
સ્વયં ક્ષાન્તિવ્રતે સ્થિત્વા પરાંશ્ચાપિ નિયોજયેત્ ॥

સત્ત્વાન્ બોધૌ પ્રતિષ્ઠાપ્ય શાન્તિપારંગતો ભવેત્ ।
એતત્પુણ્યવિપાકેન વીર્યબલમુપાશ્રયેત્ ॥

સમ્યગ્ વીર્યં સમાધાય વીર્યભૃત્કુશલી ભવેત્ ।
તતશ્ચાર્ચિષ્મતીં પ્રાપ્ય સુધામાધિપતિર્ભવેત્ ॥

તત્રસ્થઃ પાલયન્ સર્વાન્ કુદૃષ્ટીઃ સંનિવારયેત્ ।
સમ્યગ્દૃષ્ટૌ પ્રતિષ્ઠાય બોધયિત્વા પ્રયત્નતઃ ॥

સ્વયં ધ્યાનવ્રતે સ્થિત્વા પરાંશ્ચાપિ નિયોજયેત્ ।
સર્વાન્ બોધૌ પ્રતિષ્ઠાપ્ય ધ્યાનપારંગતો ભવેત્ ॥

એતત્પુણ્યવિપાકેન ધ્યાનપારં સમારભેત્ ।
સર્વક્લેશાન્ વિનિર્જિત્ય સમાધિસુસ્થિતો ભવેત્ ॥

સમ્યગ્ધ્યાનં સમાધાય સમાધિકુશલી ભવેત્ ।
તતઃ સુદુર્જયાં પ્રાપ્તઃ સ તુષિતાધિપો ભવેત્ ॥

તત્રસ્થઃ પાલયેત્સત્ત્વાંસ્તીર્થ્યમાર્ગનિવારણૈઃ ।
સત્ત્વધર્મં પ્રતિષ્ઠાપ્ય બોધયિત્વા પ્રયત્નતઃ ॥

સ્વયં ધ્યાનવ્રતે સ્થિત્વા પરાંશ્ચાપિ નિયોજયેત્ ।
સર્વાન્ બોધૌ પ્રતિષ્ઠાપ્ય ધ્યાનપારંગતો ભવેત્ ॥

એતત્પુણ્યવિપાકેન પ્રજ્ઞાવ્રતમુપાશ્રયેત્ ।
સર્વાન્મારાન્ વિનિર્જિત્ય પ્રજ્ઞાભિજ્ઞાસમૃદ્ધિમાન્ ॥

સમ્યક્ પ્રજ્ઞાં સમાધાય સ્વાભિજ્ઞાકુશલી ભવેત્ ।
તતશ્ચાભિમુખીં પ્રાપ્તઃ સુનિર્મિતાધિપો ભવેત્ ॥

તત્રસ્થઃ પાલયેત્ સત્ત્વાનભિમાનનિવારણૈઃ ।
શૂન્યતાં સુપ્રતિષ્ઠાપ્ય બોધયિત્વા પ્રયત્નતઃ ॥

સ્વયં પ્રજ્ઞાવ્રતે સ્થિત્વા પરાંશ્ચાપિ નિયોજયેત્ ।
સર્વાન્ બોધૌ પ્રતિષ્ઠાપ્ય પ્રજ્ઞાપારંગતો ભવેત્ ॥

એતત્પુણ્યવિપાકૈશ્ચ સમુપાયવ્રતં ચરેત્ ।
સર્વદુષ્ટાન્ વિનિર્જિત્ય સદ્ધર્મકુશલી સુધીઃ ॥

સમુપાયવિધાનેન સત્ત્વાન્ બોધૌ નિયોજયેત્ ।
તતો દૂરઙ્ગમાં પ્રાપ્તો વશવર્તીશ્વરો ભવેત્ ॥

તત્રસ્થઃ પાલયેત્સત્ત્વાનભિસમયબોધનૈઃ ।
બોધિસત્ત્વનિયામેષુ પ્રતિષ્ઠાય પ્રબોધયેત્ ॥

તત્રોપાયે સ્વયં સ્થિત્વા પરાંશ્ચાપિ નિયોજયેત્ ।
સર્વાન્ બોધૌ પ્રતિષ્ઠાપ્ય ઉપાયપારગો ભવેત્ ॥

એતત્પુણ્યાનુભાવશ્ચ સુપ્રણિધીનુપાશ્રયેત્ ।
મિથ્યાદૃષ્ટિં વિનિર્જિત્ય સમ્યગ્દૃષ્ટિઃ કૃતો બુધૈઃ ॥

સુપ્રતિષ્ઠિતચિત્તેન સમ્યગ્બોધૌ પ્રતિષ્ઠિતઃ ।
તતશ્ચાપ્યચલાં પ્રાપ્તો બુદ્ધયા સાહસ્રિકાધિપઃ ॥

તત્રસ્થઃ પાલયેત્સત્ત્વાન્ ત્રિપાનં સંપિબેત્ શનૈઃ ।
લોકધાતૌ પરિજ્ઞાને પ્રતિષ્ઠાપ્ય પ્રબોધયેત્ ॥

સુપ્રણિધૌ સ્વયં સ્થિત્વા પરાંશ્ચાપિ નિયોજયેન્ ।
સર્વાન્ બોધૌ પ્રતિષ્ઠાપ્ય પ્રાણિષુ પારગો ભવેત્ ॥

એતત્પુણ્યાનુસારૈશ્ચ બલવ્રતમુપાશ્રયેત્ ।
સર્વદુષ્ટાન્ વિનિર્જિત્ય સમ્બોધિકૃતનિશ્ચયઃ ॥

સમ્યગ્યત્નસમુત્સાહૈઃ સર્વતીર્થ્યાન્ વિનિર્જયેત્ ।
તતઃ સાધુમતીં પ્રાપ્તો મહાબ્રહ્મા ભવેત્ કૃતી ॥

તત્રસ્થઃ પાલયન્ સત્ત્વાન્ બુદ્ધયાનોપદેશનૈઃ ।
સત્ત્વાસમપરિજ્ઞાને સમ્યગ્બોધૌ પ્રબોધયેત્ ॥

સ્વયં બલે પ્રતિષ્ઠિત્વા પરાંશ્ચાપિ નિયોજયેત્ ।
સર્વાન્ બોધૌ પ્રતિષ્ઠાપ્ય બલપારંગતો ભવેત્ ॥

એતત્પુણ્યવિપાકૈશ્ચ જ્ઞાનવ્રતમુપાશ્રયેત્ ।
ચતુર્મારાન્ વિનિર્જિત્ય બોધિસત્ત્વગુણાકરઃ ॥

સમ્યગ્જ્ઞાનં સમાધાય સદ્ધર્મકુશલો ભવેત્ ।
ધર્મમેઘાં તતઃ પ્રાપ્તો મહેશ્વરો ભવેત્ કૃતી ॥

તત્રસ્થઃ પાલયન્ સર્વાન્ સર્વાકારાનુબોધનૈઃ ।
સર્વાકારવરે જ્ઞાને પ્રતિષ્ઠાપ્ય પ્રબોધયેત્ ॥

સ્વયં જ્ઞાને પ્રતિષ્ઠિત્વા પરાંશ્ચાપિ નિયોજયેત્ ।
સર્વાન્ બોધૌ પ્રતિષ્ઠાપ્ય જ્ઞાનપારંગતો ભવેત્ ॥

એતત્પુણ્યાનુભાવૈશ્ચ દશભૂમીશ્વરો જિનઃ ।
સર્વાકારગુણાધારઃ સર્વજ્ઞો ધર્મલાભવિત્ ॥

ઇતિ મત્વા ભુવભિશ્ચ સમ્બુદ્ધપદલબ્ધયે ।
દશપારમિતારૂપે ચરિતવ્યં સમાહિતૈઃ ॥

તથા બોધિં શિવાં પ્રાપ્ય ચતુર્મારાન્ વિનિર્જયેત્ ।
સર્વાન્ બોધૌ પ્રતિષ્ઠાપ્ય નિર્વૃતિં સમવાપ્સ્યથ ॥

એતજ્જ્ઞાત્વા પરિચ્છાયાં ચરધ્વં બોધિશાસને ।
નિર્વિધ્નં બોધિમાસાદ્ય લભધ્વં સૌગતં પદમ્ ॥