108 Buddhist stotras · અધ્યાય 25

શ્રીહેરુકં મહાવીરં વિશુદ્ધં કુલિશેશ્વરમ્ ।
નમામિ સર્વભાવેન ડાકિનીગણભૂષિતમ્ ॥

સંવરાય નમસ્તુભ્યં દ્વયાકારાય નમો નમઃ ।
ચક્રસ્થિતાય દેવાય ચક્રસંવર તે નમઃ ॥

મેષવક્ત્ર નમસ્તે ઽસ્તુ શિવશક્તિસ્વરૂપિણે ।
મહાક્રોધસ્વરૂપાય મેષસંવર તે નમઃ ॥

અશ્વાનનાય દેવાય રતિકર્મરતાય ચ ।
ભુક્તિમુક્તિપ્રદાત્રે ચ અશ્વસંવર તે નમઃ ॥

વ્યાઘ્રાસ્યાય નમસ્તુભ્યં શક્તિયુક્તાય વૈ નમઃ ।
સુરામાંસરતો નિત્યં વ્યાઘ્રસંવર તે નમઃ ॥

કૂર્માસ્યાય નમસ્તુભ્યં સુરતે સંરતાય ચ ।
નમો દેવાધિદેવાય કૂર્મસંવર તે નમઃ ॥

નમામિ મત્સ્યવક્ત્રાય માનવાનાં હિતાય વૈ ।
નમો નમસ્તે દેવેશ મત્સ્યસંવર તે નમઃ ॥

મકરાકારવક્ત્રાય મહાશક્તિધરાય ચ ।
મનોવાઞ્છાપ્રદાત્રે ચ મકરસંવર તે નમઃ ॥

સંવરાયોષ્ટ્રવક્ત્રાય શક્તિકાલિઙ્ગણાય ચ ।
મૈથુને તત્પરાયાથ ઉષ્ટ્રસંવર તે નમઃ ॥

નમામિ ગજવક્ત્રાય યોનૌ લિઙ્ગપ્રદાય ચ ।
નમો ભગવતે તુભ્યં ગજસંવર તે નમઃ ॥

મણ્ડૂકાનનનાથાય ત્રૈલોક્યેશાય તે નમઃ ।
નમો દેવાધિદેવાય મણ્ડૂકસંવરાય ચ ॥

નમામિ ચાવિવક્ત્રાય નિત્યં રતિરતાય ચ ।
નમસ્તે દેવદેવેશ અહિસંવર તે નમઃ ॥

શુકાનનાય દેવાય દ્વયાકારાકારશોભિને ।
નમો નમસ્તે ભીમાઙ્ગ શુકસંવર તે નમઃ ॥

સંવરાય નમસ્તે ઽસ્તુ શક્તિયુક્તાય વૈ નમઃ ।
સિંહાનનાય વૈ નિત્યં સિંહસંવર તે નમઃ ॥

મર્કટાનનદેવાય શક્તિચુમ્બનરતાય ચ ।
નમસ્તે ઽસ્તુ નમસ્તે ઽસ્તુ હરિસંવર તે નમઃ ॥

શ્વાનવક્ત્ર નમસ્તે ઽસ્તુ શક્તિચુમ્બનકારિણે ।
નમસ્તે ભગવન્ દેવ શ્વાનસંવર તે નમઃ ॥

વરાહાસ્યવરેવાન ભગક્રીડનકારક ।
નમામિ શક્તિયુક્તાય ઘૃષ્ટિસંવર તે નમઃ ॥

જમ્બુકાસ્યાય દેવાય શક્તિકાલિઙ્ગણાય ચ ।
સર્વપાપહરાયૈવ શિવાસંવર તે નમઃ ॥

નમામિ ગૃધ્રવક્ત્રાય દુઃખનાશાય તે નમઃ ।
દ્વયાકારસિદ્ધિદેવાય ગૃધ્રસંવર તે નમઃ ॥

કાકાનનાય શુદ્ધયક્ષ શૃઙ્ગારરૂપધારિણે ।
નમો ભગવતે તુભ્યં કાકસંવર તે નમઃ ॥

ઉલૂકવક્ત્રિણે તુભ્યં મહાસૌખ્યપ્રદાય ચ ।
યોનિમૈથુનકૃદ્દેવોલૂકસંવર તે નમઃ ॥

તાર્ક્ષ્યાનનાય દેવાય તારિણે ભવસાગરાત્ ।
નમસ્તુભ્યં નમસ્તુભ્યં નમો ગરુડસંવર ॥

ગોવક્ત્રાય નમસ્તુભ્યં ગોહત્યાપાપહારિણે ।
ગોત્રવૃદ્ધિપ્રદાત્રે ચ ધેનુસંવર તે નમઃ ॥

ગર્દભાકારવક્ત્રાય ગતાગતક્ષયાય તે ।
ગણેશ્વરાય દેવાય ખરસંવર તે નમઃ ॥

મહિષાસ્યાય દેવાય મહાપ્રલયકારિણે ।
શક્તિયુક્તાય દેવાય નમઓ મહિષસંવર ॥

વિડાલાસ્ય નમસ્તુભ્યં મૂત્રકૂણ્ડપ્રક્રીડિને ।
શ્રેષ્ઠાય પરમેશાય નમો માર્જારસંવર ॥

નમામિ શાલ્વવક્ત્રાય દ્વયઙ્ગમેકેવ શોભિતમ્ ।
નમામિ દેવદેવેશ નમઃ શરભસંવર ॥

સિદ્ધાય સિદ્ધરૂપાય ગુણાય ગુણવર્તિને ।
ક્રૌઞ્ચાસ્યાય નમસ્તુભ્યં ક્રૌઞ્ચસંવર તે નમઃ ॥

ઉલ્કાનનાય શુદ્ધાય ઉત્તમાય નમો નમઃ ।
ઉગ્રાય ભીમરૂપાય ઉલ્કસંવર તે નમઃ ॥

હંસવક્ત્ર નમસ્તે ઽસ્તુ હંસસ્વરસ્વરૂપિણે ।
હંસઃસો ઽહંસ્વરૂપાય હંસસંવર તે નમઃ ॥

મૃગવક્ત્રાય દેવાય નમામિ પરમેશ્વર ।
ઋદ્ધિસિદ્ધિપ્રદાત્રે ચ મૃગસંવર તે નમઃ ॥

શક્તિયુક્ત નમસ્તે ઽસ્તુ ચક્રવાકાનનાય ચ ।
નમસ્તે ચકવાકાખ્યસંવરાય નમો નમઃ ॥

અજાનનાય વીરાય અવિદ્યાનાશિને નમઃ ।
અપવર્ગફલાપ્ત્યર્થમજસંવર તે નમઃ ॥

કુક્કુટાસ્યાય દેવાય કુલવૃદ્ધિકરાય ચ ।
નમસ્તે કૌટુકેશાય તુભ્યં કુક્કુટસંવર ॥

કૃષ્ણસારસવક્ત્રાય નમસ્તે કર્મસમ્ભવ ।
કાલનાશાય દેવાય એણસંવર તે નમઃ ॥

મૂષાનનાય પૂર્ણાય જ્ઞાનદાય નમો નમઃ ।
સર્વદૈત્યવિનાશય મૂષસંવર તે નમઃ ॥

સાલૂકાસ્ય નમસ્તે ઽસ્તુ માનાદિવરદાય ચ ।
સિદ્ધિબુદ્ધિપ્રદાત્રે ચ નમઃ સાલૂકસંવર ॥

નમઃ કપોલવક્ત્રાય પ્રજ્ઞોપાયાત્મરૂપિણે ।
નમસ્તે ઽસ્તુ મહાવીર કપોતસંવરાય ચ ॥

નમામિ ગ્રાહવક્ત્રાય ભુક્તિમુક્તિપ્રદાય ચ ।
નમો ઽસ્તુ સર્વભૂતેશ ગ્રાહસંવર તે નમઃ ॥

નમસ્તે ચિહ્લવક્ત્રાય નમસ્તે મૈથુને રત ।
નમસ્તે ભગવન્ દેવ ચિહ્લસંવર તે નમઃ ॥

ચટકાસ્યાય દેવાય નમસ્તે ઽસ્તુ જગદ્ગુરો ।
નમસ્તે ઽસ્તુ ગુણાધીશ ચટકસંવર તે નમઃ ॥

સારસાસ્ય નમસ્તુભ્યં નમસ્તે ગુણસાગર ।
નમો ભગવતે તુભ્યં સારસસંવરાય ચ ॥

ખઞ્જનાસ્યાય દેવાય મહાદેવાય તે નમઃ ।
નિર્વાણપદદાત્રે ખઞ્જરીટસંવરાય ચ ॥

નમસ્તે ક્ષેમકર્યાસ્ય ભુક્તિમુક્તિપ્રદાય ચ ।
નમો ભગવતે દેવ ક્ષેમકરિસંવરાય તે ॥

શશકાસ્ય નમસ્તુભ્યં નમસ્તે ભુવનેશ્વર ।
કર્મપ્રદાય તે નિત્યં નમઃ શશકસંવર ॥

નમો ભલ્લૂકવક્ત્રાય રતિક્રીડાપરાય ચ ।
કાર્યસિદ્ધિપ્રદાત્રે ચ નમો ભલ્લૂકસંવર ॥

પિકાસ્યાય નમસ્તુભ્યં મન્ત્રસિદ્ધિકરાય ચ ।
ત્રિલોકેશાય સર્વાય પિકસંવર તે નમઃ ॥

નમામિ વકવક્ત્રાય શક્તિયુક્તગણાધિપ ।
નમામિ દેવદેવેશ વકસંવર તે નમઃ ॥

ખઙ્ગિવક્ત્રાય દેવાય સર્વદા શિરસા નમઃ ।
નમો ઽસ્તુ પરમેશાય ખઙ્ગિસંવર તે નમઃ ॥

કર્કટાસ્ય નમસ્તુભ્યં નમઃ સંસારહેતવે ।
પાપપુઞ્જવિનાશાય નમઃ કર્કટસંવર ॥

નમઃ શલ્લકિવક્ત્રાય સર્વદોષનિવારિણે ।
સંસારપાશનાશાય નમઃ શલ્લકિસંવર ॥

વૃશ્ચિકાસ્ય નમસ્તુભ્યં બલકલ્યાણદાય ચ ।
નમો નમસ્તે દેવાય નમો વૃશ્ચિકસંવર ॥

અલિવક્ત્રાય દેવાય અલિમોદાય તે નમઃ ।
અલિલોકવિનાશાય અલિસંવર તે નમઃ ॥

જાહકાસ્ય નમસ્તે ઽસ્તુ જનમોહકૃતાય વૈ ।
જયકલ્યાણદાત્રે ચ નમો જાહકસંવર ॥

ચમરીવક્ત્ર તે નિત્યં ચાતુર્યફલદાયિને ।
ચતુર્વર્ગપ્રદાત્રે ચ નમશ્ચમરિસંવર ॥

સીમ્નિવક્ત્રનમસ્તુભ્યં સિદ્ધિત્વફલદાયિને ।
નમો ભગવતે નિત્યં સીમ્નિસંવર તે નમઃ ॥

નમામિ ગોધવક્ત્રાય નમસ્તે ભીમવિક્રમ ।
નમસ્તે દિવ્યનેત્રાય ગોધાસંવર તે નમઃ ॥

ચકોરાસ્ય નમસ્તુભ્યં ચાઞ્ચલ્યદોષનાશક ।
નમો ભગવતે તુભ્યં ચકોરસંવરાય ચ ॥

ગોધિકાસ્યાય સતતં સૃષ્ટિસંહારકરિણે ।
નમસ્તે પરમાનન્દ ગોધિકાસંવરાય ચ ॥

મધુમાક્ષિકવક્ત્રાય નમસ્તે માનદાયક ।
સર્વજ્ઞાય પરેશાય નમો માક્ષિકસંવર ॥

પતઙ્ગવક્ત્ર તે નિત્યં પરમેશ નમઃ સદા ।
દિવ્યાય દિવસેશાય નમઃ પતઙ્ગસંવર ॥

નરવક્ત્રાય દેવાય નરકધ્નાય તે નમઃ ।
નાનારૂપદધાનાય નરસંવર તે નમઃ ॥

સૃષ્ટિરૂપ જગદ્ધામ સૃજતે સર્વભૂતકમ્ ।
નમો નમસ્તે સતતં સૃષ્ટિસંવર તે નમઃ ॥

સ્થિતિરૂપાય દેવાય ગુણાય ગુણવર્તિને ।
નમઃ સારવિનાશાય સ્થિતિસંવર તે નમઃ ॥

સર્વલોકસ્ય સંહારકર્ત્રે તે પરમેશ્વર ।
તસ્માદહં નમસ્યામિ નમઃ પ્રલયસંવર ॥

જ્યોતિર્વક્ત્ર પરં ધામ નમસ્તે જગદીશ્વર ।
પરાત્પરતરં સૂક્ષ્મ જ્યોતિઃસંવર તે નમઃ ॥

ઇતીદં સંવરસ્તોત્રં ત્રિષુ લોકેષુ દુર્લભમ્ ।
પરાત્પરતરં સ્તોત્રં ચતુઃષષ્ટિપ્રમાણકમ્ ॥

ચતુઃષષ્ટિપ્રમાણેષુ આદ્યમાદ્યં તુ વક્ત્રિતમ્ ।
ભૂયો ગ્રન્થમયાચ્ચાત્ર આદ્યમાત્રં પ્રચોદિતમ્ ॥

કન્યાર્થી લભતે કન્યાં ધનાર્થી લભતે ધનમ્ ।
વિદ્યાર્થી લભતે વિદ્યાં મોક્ષાર્થી મોક્ષમાપ્નુયાત્ ॥

વશીકરણમુચ્ચાટં મારમોહનસ્તમ્ભનમ્ ।
આકર્ષણં ચ વિદ્વેષં ધાતુવાદં રસાયનમ્ ॥

ગુટિકાં પાદુકાસિદ્ધિં ખઙ્ગસિદ્ધિં તથૈવ ચ ।
ખેચરીસિદ્ધિ વૈદ્યાઙ્ગં મન્ત્રસિદ્ધિં ચ વાક્પટુઃ ॥

પરકાયપ્રવેશં ચ દ્રવ્યાકર્ષણમેવ ચ ।
લભતે સ્તોત્રરાજેન સત્યં સત્યં મયોદિતમ્ ॥

દુર્ભિક્ષં ચાપદિ પાઠં કુરુતે શુભમાપ્નુયાત્ ।
અતિવૃષ્ટાવનાવૃષ્ટૌ મહામારીસમુદ્ભવે ॥

રાજ્યભ્રંશે જ્ઞાનભ્રંશે સ્ત્રીભ્રંશે ચ ધનક્ષયે ।
કલહે ચ વિવાદે ચ પઠતે સ્તોત્રમુત્તમમ્ ॥

ભિક્ષુકેભ્યઃ સહસ્રેભ્યઃ તુલ્યં દાનકૃતં ફલમ્ ।
બહુનાત્ર કિમુક્તેન બ્રહ્માણ્ડદાનજં ફલમ્ ॥