108 Buddhist stotras · અધ્યાય 15

જટાધરં સૌમ્યવિશાલલોચનં સદાપ્રસન્નાનનચન્દ્રમણ્ડલમ્ ।
સુરાસુરૈર્વન્દિતપાદપઙ્કજં નમામિ નાથં મણિપદ્મસંભવમ્ ॥

સરોજપત્રાયતદિવ્યલોચનં કુદૃષ્ટિસંશોધિતશુદ્ધલોચનમ્ ।
કૃપામૃતાર્દ્રં જગદેકલોચનં નમામિ નાથં મણિપદ્મસંભવમ્ ॥

હારેન્દુહારાર્ધહિમાધિકોજ્જવલં નિઘૃષ્ટગણ્ડામલલોલકુણ્ડલમ્ ।
ગભસ્તિમાલાકુલકોટિસંકુલં નમામિ નાથં મણિપદ્મસંભવમ્ ॥

પ્રબુદ્ધધર્માધ્વનિ ધર્મધાતુકં સહસ્રબાહું દ્વિચતુશ્ચ ષડ્ભુજમ્ ।
ખધાતુના તુલ્યમનન્તબાહુકં નમામિ નાથં મણિપદ્મસંભવમ્ ॥

ઉપાયપ્રજ્ઞોદધિમન્થનોદ્ભવં ત્રિધાતુસંરક્ષણહેતુસંભવમ્ ।
જિનેન્દ્રમૌલિં જિનધાતુસંભવં નમામિ નાથં મણિપદ્મસંભવમ્ ॥

પદ્મોપરિ ગતં નાથં પદ્મહસ્તં જટાધરમ્ ।
આર્યાવલોકિતં વન્દે સર્વસત્ત્વાનુકમ્પકમ્ ॥