108 Buddhist stotras · અધ્યાય 14

દેવમનુષ્યાસુરનુતચરણઃ પ્રતિહતજન્મજરારુજમરણઃ ।
લોકેશ ત્વં મામશરણ્યં રક્ષ કૃપાલો કુરુ કારુણ્યમ્ ॥

સંસારોદધિમધ્યનિમગ્નં ક્લેશમહોર્મિસમાહિતભગ્નમ્ ।
મામવધારય મા વિરુવન્તં ત્રાહિ મહાકૃપ નૌમિ ભવન્તમ્ ॥

તૃષ્ણાતિમિરોપદ્રુતનેત્રં મરણમહાભયવિહ્વલગાત્રમ્ ।
પાલય ભગવન્નવલોકય માં યાવદવીચિં યામિ ન વિષમામ્ ॥

કૃતમન્યસ્ત્રીગ્રહણમજસ્રં હતમજ્ઞેયં પ્રાણિસહસ્રમ્ ।
નાથ મયા કૃતપાપમશેષં નાશય સંપ્રતિ કાયિકદોષમ્ ॥

યજ્જોવિતસત્કારનિમિત્તં લોકાન્ નિત્યં ભણિતમસત્યમ્ ।
તલ્લોકેશ્વર શમય સમસ્તં વાચિકનરકં ચિરમભ્યસ્તમ્ ॥

સત્ત્વાનામિહ ચિન્તિતમહિતં સ્વયમનુમોદિતમપિ નરવિહિતમ્ ।
અધુના તન્મમ માનસપાપં સ્ફોટય નાથ કરોમિ વિલાપમ્ ॥

દેવમનુષ્યાસુરજાતીનાં તિર્યઃનારકપ્રેતગતીનામ્ ।
સત્ત્વા યે નિવસન્તિ સદાર્તા રક્ષસિ તાનિતિ તવ મયિ વાર્તા ॥

તેન મમોપરિ સૃજ કારુણ્યં વીક્ષ્ય શરીરગતં તારુણ્યમ્ ।
ઇતિ શૃણુ ભગવન્ ભવતિ ભણામિ યાવન્નરકં નૈવ વિશામિ ॥

કિં ચોપેત્ય કરોષિ પરાર્થં મુઞ્ચસિ ભગવન્ મામકૃતાર્થમ્ ।
અથવા પ્રેક્ષ્ય કૃપા તવ પુણ્યં જનયસિ દૃષ્ટં કથમવિપન્નમ્ ॥

સ્મરણેનાપિ ભવસિ પરિતુષ્ટઃ ક્ષિપસિ ચ કલુષં કિમિતિ ન દૃષ્ટઃ ।
યસ્માદ્ ભગવન્ પરહિતદક્ષ ક્ષેપં મા કુરુ મામિહ રક્ષ ॥

દન્તિતુરઙ્ગમપુત્રકલત્રં રાજ્યમકણ્ટકવેશ્મવિચિત્રમ્ ।
અસ્થિશિરો ઽસૃઙ્માંસપર્યન્તં ભવતાર્થિભ્યો દત્તમનન્તમ્ ॥

અઞ્જનગુટિકાપાદુકસિદ્ધિઃ સિદ્ધૌષધિમણિમન્ત્રવિશુદ્ધિઃ ।
સિદ્ધયતિ યક્ષસ્ત્રીપુરવેશઃ તુષ્યસિ યસ્ય ત્વં લોકેશ ॥

યે કરચરણવિલોચનહીના વિવિધવ્યાધિમહાભયદીનાઃ ।
તે ત્વયિ તુષ્ટે પુષ્ટશરીરા વિલસન્ત્યરુજો ગુણગમ્ભીરાઃ ॥

ગરલં વ્યાધિર્ગ્રહડાકિન્યઃ શાન્તિં યાન્તિ સદા યોગિન્યઃ ।
સરતિ ન તસ્ય પુરો યમદૂતઃ પ્રોતો યસ્ય ચ ત્વં જિનભૂતઃ ॥

ઇતિ લોકેશ્વર કિં ક્રિયમાણં મુઞ્ચસિ ભગવન્ મામત્રાણમ્ ।
રૌમ્યહમનુદિનમુદ્યતપાણિર્નાશય ત્રાસસમાકુલવાણિઃ ॥

યદ્વિષયેન્દ્રિયચઞ્ચલમનસા કૃતબહુપાપં વ્યાકુલમનસા ।
નીતં જન્મ મયા ઽસ્મિન્ સકલં જઠરનિમિત્તં ભ્રમતા વિકલમ્ ॥

તત્કુરુ સંપ્રતિ મમ લોકેશ પ્રણતો વિવિધાઞ્જલિરહમેષઃ ।
યેનાભુક્ત્વાપાયિકદોષં સુગતિં ભવતો યામિ ન મોક્ષમ્ ॥

મોહદ્વેષવિનાશનહેતુસ્ત્વં સંસારમહોદધિસેતુઃ ।
પતિતસ્ત્રસ્તોત્થાપિતબાહુસ્ત્વં ગુરુદુરિતનિશાકરરાહુઃ ॥

દેશિતસુગતાનુત્તરતત્ત્વસ્ત્વં પાલિતબહુદુઃખિતસત્ત્વઃ ।
નિર્જિતદુર્જયમન્મથમારસ્ત્વં સંતીર્ણભવાર્ણવપારઃ ॥

સકલાલાનનિકૃન્તનદેહસ્ત્વં પરિભાવિતજગતસુદેહઃ ।
ભગવન્નનુપમકરુણાસિન્ધુસ્ત્વં જનવિદિતો ઽકારણબન્ધુઃ ॥

લીલાવિદલિતકર્મવિભઙ્ગસ્ત્વં પરહિતવિષયવ્યાસઙ્ગઃ ।
દિવ્યધ્યાનસમાહિતચિત્તસ્ત્વં યાચકસાધારણચિત્તઃ ॥

પરમપકુર્વંન્નપિ કરુણાવાન્ મયિ પરિતોષં ન કરોષિ ભવાન્ ।
કથમિહ મોહમહોરગદષ્ટં વિષયશરીરમકુશલં ભ્રષ્ટમ્ ॥

સકલજનાર્થં પ્રતિ યા કરુણા સા કિં ભવતો નિયતસ્ફરણા ।
યેન ન રક્ષસિ કિલ્વિષવન્તં ભવતઃ પુરતો માં વિરુવન્તમ્ ॥

નાથ કૃપા તે વ્યોમવિશાલા સત્ત્વેષુ હિ યથામ્બુદધારા ।
સ્થલજલનિમ્નોન્નતબહુદેશે સરતિ નિરન્તરમનિશમશેષે ॥

ઇતિ ભગવત્સ્મરણાદ્યત્પુણ્યં મમ તેનેદં જગદક્ષુણ્ણમ્ ।
લભતાં શ્રીપોતલકાચલવાસં જનયતુ સુન્દરવિવિધવિલાસમ્ ॥