108 Buddhist stotras · અધ્યાય 108

અથ વજ્રધરઃ શ્રીમાન્ દુર્દાન્તદમકઃ પરઃ ।
ત્રિલોકવિજયી વીરો ગુહ્યરાટ્ કુલિશેશ્વરઃ ॥

વિબુદ્ધપુણ્ડરીકાક્ષઃ પ્રોત્ફુલ્લકમલાનનઃ ।
પ્રોલ્લાલયન્ વજ્રવરં સ્વકરેણ મુહુર્મુહઃ ॥

ભૃકુટીતરઙ્ગપ્રમુખૈરનન્તૈર્વજ્રપાણિભિઃ ।
દુર્દાન્તદમકૈર્વીરૈર્વીરવીભત્સરુપિભિઃ ॥

ઉલ્લાલયદિભિઃ સ્વકરૈઃ પ્રસ્ફુરદ્વજ્રકોટિભિઃ ।
પ્રજ્ઞોપાયમહાકરુણાજગદર્થકરૈઃ પરૈઃ ॥

હૃષ્ટતુષ્ટાશયૈર્મુદિતૈઃ ક્રોધવિગ્રહરુપિભિઃ ।
બુદ્ધકૃત્યકરૈર્નાથૈઃ સાર્દ્ધં પ્રણતવિગ્રહૈ ॥

પ્રણમ્ય નાથં સંબુદ્ધં ભગવન્તં તથાગતમ્ ।
કૃતાઞ્જલિપુટો ભૂત્વા ઇદમાહ સ્થિતો ઽગ્રતઃ ॥

મદ્ધિતાય મમાર્થાય અનુકમ્પાય મે વિભો ।
માયાજાલાભિસંબોધેર્યથાલાભિ ભવામ્યહમ્ ॥

અજ્ઞાનપઙ્કમગ્નાનાં ક્લેશવ્યાકુલચેતસામ્ ।
હિતાય સર્વસત્ત્વાનામનુત્તરફલાપ્તયે ॥

પ્રકાશયતુ સંબુદ્ધો ભગવાન્ શાસ્તા જગદ્ગુરુઃ ।
મહાસમયતત્ત્વજ્ઞ ઇન્દ્રિયાશયવિત્ પરઃ ॥

ભગવન્! જ્ઞાનકાયસ્ય મહોષ્ણીષસ્ય ગીષ્પતેઃ ।
મઞ્જુશ્રીજ્ઞાનસત્ત્વસ્ય જ્ઞાનમૂર્તેઃ સ્વયમ્ભુવઃ ॥

ગમ્ભીરાર્થામુદારાર્થાં મહાર્થામસમાં શિવામ્ ।
આદિમધ્યાન્તકલ્યાણીં નામસઙ્ગીતિમુત્તામામ્ ॥

યાતીતૈર્ભાષિતા બુદ્ધૈર્ભાષિષ્યન્તે હ્યાનાગતાઃ ।
પ્રત્યુત્પન્નાશ્ચ સંબુદ્ધા યાં ભાષન્તે પુનઃ પુનઃ ॥

માયાજાલે મહાતન્ત્રે યા ચાસ્મિન્ સંપ્રગીયતે ।
મહાવજ્રધરૈર્હૃષ્ટૈરમેયૈર્મન્ત્રધારિભિઃ ॥

અહં ચૈનાં ધારયિષ્યામ્યાનિર્યાણાદ્ દૃઢાશયઃ ।
યથા ભવામ્યહં નાથ સર્વસંબુદ્ધગુહ્યધૃક્ ॥

પ્રકાશયિષ્યે સત્ત્વાનાં યથાશયવિશેષતઃ ।
અશેષક્લેશનાશાય અશેષાજ્ઞાનહાનયે ॥

એવમધ્યેષ્ય ગુહ્યેન્દ્રો વજ્રપાણિસ્તથાગતમ્ ।
કૃતાઞ્જલિપુતો ભૂત્વા પ્રહ્વકાયઃસ્થિતો ઽગ્રતઃ ॥

અથ શાક્યમુનિર્ભગવાન્ સંબુદ્ધો દ્વિપદોત્તમઃ ।
નિર્ણમય્યાયતાં સ્ફીતાં સ્વજિહ્વાં સ્વમુખાચ્છુભામ્ ॥

સ્મિતં સંદશ્ર્ય લોકાનામપાયત્રયશોધનમ્ ।
ત્રિલોકાભાસકરણં ચતુર્મારારિશાસનમ્ ॥

ત્રિલોકમાપૂરયન્ત્યા બ્રાહ્મ મધુરયા ગિરા ।
પ્રત્યભાષત ગુહ્યેન્દ્રં વજ્રપાણિં મહાબલમ્ ॥

સાધુ વજ્રધર શ્રીમન્ સાધુ તે વજ્રપાણયે ।
યસ્ત્વં જગદ્ધિતાર્થાય મહાકરુણયાન્વિતઃ ॥

મહાર્થાં નામસઙ્ગીતિં પવિત્રામઘનાશિનીમ્ ।
મઞ્જુશ્રીજ્ઞાનકાયસ્ય મત્તઃ શ્રોતું સમુદ્યતઃ ॥

તત્સાધુ દેશયામ્યેષઃ અહં તે ગુહ્યકાધિપ ।
શૃણુ ત્વમેકાગ્રમનાસ્તત્સાધુ ભગવન્નિતિ ॥

અથ શાક્યમુનિર્ભગવાન્ સકલં મન્ત્રકુલં મહત્ ।
મન્ત્રવિદ્યાધરકુલં વ્યવલોક્ય કુલત્રયમ્ ॥

લોકલોકોત્તરકુલં લોકાલોકકુલં મહત્ ।
મહામુદ્રાકુલં ચાગ્ર્યં મહોષ્ણીષકુલં મહત્ ॥

ઇમાં ષણ્મન્ત્રરાજાનાં સંયુક્તામદ્વયો દયામ્ ।
અનુત્પાદધર્મિણીં ગાથાં ભાષતે સ્મ ગિરાંપતેઃ ॥

અ આ ઇ ઈ ઉ ઊ એ ઐ ઓ ઔ અં અઃ સ્થિતો હૃદિ ।
જ્ઞાનમૂર્તિરહં બુદ્ધો બુદ્ધાનાં ત્ર્યધ્વવર્તિનામ્ ॥

ઓમ્ વજ્રતીક્ષ્ણદુઃખચ્છેદપ્રજ્ઞાજ્ઞાનમૂર્તયે ।
જ્ઞાનકાયવાગીશ્વરારપચનાય તે નમઃ ॥

તદ્યથા ભગવાન્ બુદ્ધઃ સંબુદ્ધો ઽકારસમ્ભવઃ ।
અકારઃ સર્વવર્ણાગ્ર્યો મહાર્થઃ પરમાક્ષરઃ ॥

મહાપ્રાણો હ્યનુત્પાદો વાગદાહારવર્જિતઃ ।
સર્વાભિલાપહેત્વ્ગ્ર્યઃ સર્વવાક્સુપ્રભાસ્વરઃ ॥

મહામહમહારાગઃ સર્વસત્ત્વરતિઙ્કરઃ ।
મહામહમહાદ્વેષઃ સર્વક્લેશમહારિપુઃ ॥

મહામહમહામોહો મૂઢધીમોહસૂદનઃ ।
મહામહમહાક્રોધો મહાક્રોધરિપુર્મહાન્ ॥

મહામહમહાલોભઃ સર્વલોભનિષૂદનઃ ।
મહાકામો મહાસૌખ્યો મહામોદો મહારતિઃ ॥

મહારુપો મહાકાયો મહાવર્ણો મહાવપુઃ ।
મહાનામા મહોદારો મહાવિપુલમણ્ડલઃ ॥

મહાપ્રજ્ઞાયુધધરો મહાક્લેશાઙ્કુશો ઽગ્રણીઃ ।
મહાયશા મહાકીર્તિર્મહાજ્યોતિર્મહાદ્યુતિઃ ॥

મહામાયાધરો વિદ્વાન્ મહામાયાર્થસાધકઃ ।
મહામાયારતિરતો મહામાયેન્દ્રજાલિકઃ ॥

મહાદાનપતિઃ શ્રેષ્ઠો મહાશીલધરો ઽગ્રણીઃ ।
મહાક્ષાન્તિધરો ધીરો મહાવીર્યપરાક્રમઃ ॥

મહાધ્યાનસમાધિસ્થો મહાપ્રજ્ઞાશરીરધૃક્ ।
મહાબલો મહાપાયઃ પ્રણિધિર્જ્ઞાનસાગરઃ ॥

મહામૈત્રીમયો ઽમેયો મહાકારુણિકો ઽગ્રધીઃ ।
મહાપ્રજ્ઞો મહાધીમાન્ મહોપાયો મહાકૃતિઃ ॥

મહાઋદ્ધિબલોપેતો મહાવેગો મહાજવઃ ।
મહર્દ્ધિકો મહેશાખ્યો મહાબલપરાક્રમઃ ॥

મહાભવાદ્રિસંભેત્તા મહાવજ્રધરો ધનઃ ।
મહાક્રૂરો મહારૌદ્રો મહાભયભયઙ્કર ॥

મહાવિદ્યોત્તમો નાથો મહામન્ત્રોત્તમો ગુરુઃ ।
મહાયાનનયારુઢો મહાયાનનયોત્તમઃ ॥

મહાવૈરોચનો બુદ્ધો મહામૌની મહામુનિઃ ।
મહામન્ત્રનયોદ્ભૂતો મહામન્ત્રનયાત્મકઃ ॥

દશપારમિતાપ્રાપ્તો દશપારમિતાશ્રયઃ ।
દશપારમિતાશુદ્ધિર્દશપારમિતાનયઃ ॥

દશભૂમીશ્વરો નાથો દશભૂમિપ્રતિષ્ઠિતઃ ।
દશજ્ઞાનવિશુદ્ધાત્મા દશજ્ઞાનવિશુદ્ધધૃક્ ॥

દશાકારો દશાર્થાર્થો મુનીન્દ્રો દશબલો વિભુઃ ।
અશેષવિશ્વાર્થકરો દશાકારવશી મહાન્ ॥

અનાદિર્નિષ્પ્રપઞ્ચાત્મા શુદ્ધાત્મા તથતાત્મકઃ ।
ભૂતવાદી યથાવાદી તથાકારી અનન્યવાક્ ॥

અદ્વયો દ્વયવાદી ચ ભૂતકોટિવ્યવસ્થિતઃ ।
નૈરાત્મ્યસિંહનિર્ણાદી કુતીથ્ર્યમૃગભીકરઃ ॥

સર્વત્રગો ઽમોઘગતિસ્તથાગતમનોજવઃ ।
જિનો જિતારિર્વિજયો ચક્રવર્તી મહાબલઃ ॥

ગણમુખ્યો ગણાચાર્યો ગણેશો ગણપતિર્વશી ।
મહાનુભાવો ધૌરેયો ઽનન્યનેયો મહાનયઃ ॥

વાગિશો વાક્પતિર્વાગ્મી વાચસ્પતિરનન્તગોઃ ।
સત્યવાક્ સત્યવાદી ચ ચતુઃસત્યોપદેશકઃ ॥

અવૈવર્તિકો હ્યનાગામો ખડ્ગઃ પ્રત્યેકનાયકઃ ।
નાનાનિર્યાણનિર્યાતો મહાભૂતૈકકારણઃ ॥

અર્હન્ ક્ષીણાસ્રવો ભિક્ષુર્વીતરાગો જિતેન્દ્રિયઃ ।
ક્ષેમપ્રાપ્તો ઽભયપ્રાપ્તઃ શીતીભૂતો હ્યાનાવિલઃ ॥

વિદ્યાચરણસંપન્નઃ સુગતો લોકવિત્પરઃ ।
નિર્મમો નિરહઙ્કારઃ સત્યદ્વયનયસ્થિતઃ ॥

સંસારપારકોટિસ્થઃ કૃતકૃત્યઃ સ્થલસ્થિતઃ ।
કૈવલ્યજ્ઞાનનિષ્ઠિયુતઃ પ્રજ્ઞાશસ્ત્રો વિદારણઃ ॥

સદ્ધર્મ્મો ધર્મરાડ્ ભાસ્વાન્ લોકાલોકકરઃ પરઃ ।
ધર્મેશ્વરો ધર્મરાજઃ શ્રેયોમાર્ગોપદેશકઃ ॥

સિદ્ધાર્થઃ સિદ્ધસંકલ્પઃ સર્વસંકલ્પવર્જિતઃ ।
નિર્વિકલ્પો ઽક્ષયો ધાતુર્ધર્મધાતુઃ પરો ઽવ્યયઃ ॥

પુણ્યવાન્ પુણ્યસંભારો જ્ઞાનં જ્ઞાનાકરં મહત્ ।
જ્ઞાનવાન્ સદસજ્જ્ઞાની સંભારદ્વયસંભૃતઃ ॥

શાશ્વતો વિશ્વરાડ્ યોગી ધ્યાનં ધ્યેયો ધિયાંપતિઃ ।
પ્રત્યાત્મવેદ્યો હ્યચલઃ પરમાદ્યસ્ત્રિકાયધૃક્ ॥

પઞ્ચકાયાત્મકો બુદ્ધઃ પઞ્ચજ્ઞાનાત્મકો વિભુઃ ।
પઞ્ચબુદ્ધાત્મમુકુટઃ પઞ્ચચક્ષુરસઙ્ગધૃક્ ॥

જનકઃ સર્વબુદ્ધાનાં બુદ્ધપુત્રઃ પરોવરઃ ।
પ્રજ્ઞાભવોદ્ભવો યોનિર્ધર્મયોનિર્ભવાન્તકૃત્ ॥

ઘનૈકસારો વજ્રાત્મા સદ્યોજાતો જગત્પતિઃ ।
ગગનોદ્ભવઃ સ્વયમ્ભૂઃ પ્રજ્ઞાજ્ઞાનાનલો મહાન્ ॥

વૈરોચનો મહાદીપ્તિર્જ્ઞાનજ્યોતિર્વિરોચનઃ ।
જગત્પ્રદીપો જ્ઞાનોલ્કો મહાતેજાઃ પ્રભાસ્વરઃ ॥

વિદ્યારાજો ઽગ્રમન્ત્રેશો મન્ત્રરાજો મહાર્થકૃત્ ।
મહોષ્ણીષો ઽદ્ભુતોષ્ણીષો વિશ્વદર્શી વિયત્પતિઃ ॥

સર્વબુદ્ધાત્મભાવાગ્ર્યો જગદાનન્દલોચનઃ ।
વિશ્વરુપી વિધાતા ચ પૂજ્યો, માન્યો મહાઋષિઃ ॥

કુલત્રયધરો મન્ત્રી મહાસમયમન્ત્રધૃક્ ।
રત્નત્રયધરઃ શ્રેષ્ઠસ્ત્રિયાનોત્તમદેશકઃ ॥

અમોઘપાશો વિજયી વજ્રપાશો મહાગ્રહઃ ।
વજ્રાઙ્કુશો મહાપાશઃ વજ્રભૈરવભીકરઃ ॥

ક્રોધરાટ્ ષણ્મુખો ભીમઃ ષણ્ણેત્રઃ ષડ્ભુજો બલી ।
દંષ્ટ્રાકરાલઃ કઙ્કાલો હલાહલઃ શતાનનઃ ॥

યમાન્તકો વિઘ્નરાજો વજ્રવેગો ભયઙ્કરઃ ।
વિઘુષ્ટવજ્રો હૃદ્વજ્રો માયાવજ્રો મહોદરઃ ॥

કુલિશેશો વજ્રયોનિર્વજ્રમણ્ડો નભોપમઃ ।
અચલૈકજટાટોપો ગજચર્મપટાર્દ્રધૃક્ ॥

હાહાકારો મહાઘોરો હીહીકારો ભયાનકઃ ।
અટ્ટહાસો મહાહાસો વજ્રહાસો મહારવઃ ॥

વજ્રસત્ત્વો મહાસત્ત્વો વજ્રરાજો મહાસુખઃ ।
વજ્રચણ્ડો મહામોદો વજ્રહૂંકારહૂંકૃતિઃ ॥

વજ્રબાણાયુધધરો વજ્રખડ્ગો નિકૃન્તનઃ ।
વિશ્વવજ્રધરો બજ્રી એકવજ્રી રણઞ્જહઃ ॥

વજ્રજ્વાલાકરાલાક્ષો વજ્રજ્વાલાશિરોરુહઃ ।
વજ્રાવેશો મહાવેશઃ શતાક્ષો વજ્રલોચનઃ ॥

વજ્રરોમાઙ્કુરતનુર્વજ્રરોમૈકવિગ્રહઃ ।
વજ્રકોટિનખારમ્ભો વજ્રસારઘનચ્છવિ ॥

વજ્રમાલાધરઃ શ્રીમાન્ વજ્રાભરણભૂષિતઃ ।
હાહાટ્ટહાસો નિર્ઘોષો વજ્રઘોષઃ ષડક્ષરઃ ॥

મઞ્જુઘોષો મહાનાદસ્ત્રૈલોક્યૈકરવો મહાન્ ।
આકાશધાતુપર્યન્તઘોષો ઘોષવતાં વરઃ ॥

તથતાભૂતનૈરાત્મ્યભૂતકોટિરનક્ષરઃ ।
શૂન્યતાવાદિવૃષભો ગમ્ભીરોદારગર્જનઃ ॥

ધર્મશઙ્ખો મહાશબ્દો ધર્મગણ્ડી મહારણઃ ।
અપ્રતિષ્ઠિતનિર્વાણો દશદિગ્ધર્મદુન્દુભિઃ ॥

અરુપો રુપવાનગ્ર્યો નાનારુપો મનોમયઃ ।
સર્વરુપાવભાસશ્રીરશેષપ્રતિબિમ્બધૃક્ ॥

અપ્રધૃષ્યો મહેશાખ્યસ્ત્રૈધાતુકમહેશ્વરઃ ।
સમુચ્છ્રિતાર્યમાર્ગસ્થો ધર્મકેતુર્મહોદય ॥

ત્રૈલોક્યૈકકુમારાઙ્ગઃ સ્થવિરો વૃદ્ધઃ પ્રજાપતિ ।
દ્વાત્રિંશલ્લક્ષણધરઃ કાન્તસ્ત્રૈલોક્યસુન્દરઃ ॥

લોકજ્ઞાનગુણાચાર્યો લોકાચાર્યો વિશારદઃ ।
નાથસ્ત્રાતા ત્રિલોકાપ્તઃ શરણં તાય્યનુત્તરઃ ॥

ગગનાભોગસમ્ભોગઃ સર્વજ્ઞજ્ઞાનસાગરઃ ।
અવિદ્યાણ્ડકોશસંભેત્તા ભવપઞ્જરદારણઃ ॥

શમિતાશેષસંક્લેશઃ સંસારાર્ણવપારગઃ ।
જ્ઞાનાભિષેકમુકુટઃ સમ્યક્સંબુદ્ધભૂષણઃ ॥

ત્રિદુઃખદુઃખશમનસ્ત્ર્યન્તો ઽનન્તસ્ત્રિમુક્તિગઃ ।
સર્વાવરણનિર્મુક્ત આકાશસમતાં ગતઃ ॥

સર્વક્લેશમલાતીતસ્ત્ર્યધ્વાનધ્વગતિં ગતઃ ।
સર્વસત્ત્વમહાનાગો ગુણશેખરશેખરઃ ॥

સર્વોપધિવિનિર્મુક્તો વ્યોમવત્ર્મનિ સુસ્થિતઃ ।
મહાચિન્તામણિધરઃ સર્વરત્નોત્તમો વિભુઃ ॥

મહાકલ્પતરુઃ સ્ફીતો મહાભદ્રઘટોત્તમઃ ।
સર્વસત્ત્વાર્થકૃત્કર્ત્તા હિતૈષી સત્ત્વવત્સલઃ ॥

શુભાશુભજ્ઞઃ કાલજ્ઞઃ સમયજ્ઞઃ સમયો વિભુઃ ।
સત્ત્વેન્દ્રિયજ્ઞો વેલજ્ઞો વિમુક્તિત્રયકોવિદઃ ॥

ગુણી ગુણજ્ઞો ધર્મજ્ઞઃ પ્રશસ્તો મઙ્ગલોદયઃ ।
સર્વમઙ્ગલમાઙ્ગલ્યઃ કીર્તિર્લક્ષ્મીર્યશઃ શુભઃ ॥

મહોત્સવો મહાશ્વાસો મહાનન્દો મહારતિઃ ।
સત્કારઃ સત્કૃતિર્ભૂતિઃ પ્રમોદઃ શ્રીર્યશસ્પતિઃ ॥

વરેણ્યો વરદઃ શ્રેષ્ઠઃ શરણ્યઃ શરણોત્તમઃ ।
મહાભયારિઃ પ્રવરો નિઃશેષભયનાશનઃ ॥

શિખી શિખણ્ડી જટિલો જટી મૌણ્ડી કિરીટિમાન્ ।
પઞ્ચાનનઃ પઞ્ચશિખઃ પઞ્ચચીરકશેખરઃ ॥

મહાબ્રતધરો મૌઞ્જી બ્રહ્મચારી બ્રતોત્તમઃ ।
મહાતપાસ્તપોનિષ્ઠઃ સ્નાતકો ગૌતમો ઽગ્રણી ॥

બ્રહ્મવિદ્ બ્રાહ્મણો બ્રહ્મા બ્રહ્મનિર્વાણમાપ્તવાન્ ।
મુક્તિર્મોક્ષો વિમોક્ષાઙ્ગો વિમુક્તિઃ શાન્તતા શિવઃ ॥

નિર્વાણં નિર્વૃતિઃ શાન્તિઃ શ્રેયો નિર્યાણમન્તગઃ ।
સુખદુઃખાન્તકૃન્નિષ્ઠા વૈરાગ્યમુપધિક્ષયઃ ॥

અજયો ઽનુપમો ઽવ્યક્તો નિરાભાસો નિરઞ્જનઃ ।
નિષ્કલઃ સર્વગો વ્યાપી સૂક્ષ્મો બીજમનાશ્રવઃ ॥

અરજો વિરજો વિમલો વાન્તદોષો નિરામયઃ ।
સુપ્રબુદ્ધો વિબુદ્ધાત્મા સર્વજ્ઞઃ સર્વવિત્પરઃ ॥

વિજ્ઞાનધર્મતાતીતો જ્ઞાનમદ્વયરુપધૃક્ ।
નિર્વિકલ્પો નિરાભોગસ્ત્ર્યધ્વસંબુદ્ધકાર્યકૃત્ ॥

અનાદિનિધનો બુદ્ધ આદિબુદ્ધો નિરન્વયઃ ।
જ્ઞાનૈકચક્ષુરમલો જ્ઞાનમૂર્તિસ્તથાગતઃ ॥

વાગીશ્વરો મહાવાદી વાદિરાડ્ વાદિપુઙ્ગવઃ ।
વદતાંવરો વરિષ્ઠો વાદિસિંહો ઽપરાજિતઃ ॥

સમન્તદર્શી પ્રામોદ્યસ્તેજોમાલી સુદર્શનઃ ।
શ્રીવત્સઃ સુપ્રભો દીપ્તિર્ભાભાસુરકરદ્યુતિઃ ॥

મહાભિષગ્વરઃ શ્રેષ્ઠઃ શલ્યહર્તા નિરુત્તરઃ ।
અશેષભૈષજ્યતરુઃ ક્લેશવ્યાધિર્મહારિપુઃ ॥

ત્રૈલોક્યતિલકઃ કાન્તઃ શ્રીમાન્ નક્ષત્રમણ્ડલઃ ।
દશદિગ્વ્યોમપર્ય્યન્તો ધર્મધ્વજમહોચ્છ્રયઃ ॥

જગચ્છત્રૈકવિપુલો મૈત્રીકરુણમણ્ડલઃ ।
પદ્મનૃત્યેશ્વરઃ શ્રીમાન્ રત્નચ્છત્રો મહાવિભુઃ ॥

સર્વબુદ્ધમહારાજઃ સર્વબુદ્ધાત્મભાવધૃક્ ।
સર્વબુદ્ધમહાયોગઃ સર્વબુદ્ધૈકશાસનઃ ॥

વજ્રરત્નાભિષેકશ્રીઃ સર્વરત્નાધિપેશ્વરઃ ।
સર્વલોકેશ્વરપતિઃ સર્વવજ્રધરાધિપઃ ॥

સર્વબુદ્ધમહાચિત્તઃ સર્વબુદ્ધમનોગતિઃ ।
સર્વબુદ્ધમહાકાયઃ સર્વબુદ્ધસરસ્વતી ॥

વજ્રસૂર્ય્યમહાલોકો વજ્રેન્દુવિમલપ્રભઃ ।
વિરાગાદિમહારાગો વિશ્વવર્ણોજ્જ્વલપ્રભઃ ॥

સમ્બુદ્ધવજ્રપર્યઙ્કો બુદ્ધસઙ્ગીતિધર્મધૃક્ ।
બુદ્ધપદ્મોદ્ભવઃ શ્રીમાન્ સર્વજ્ઞજ્ઞાનકોષધૃક્ ॥

વિશ્વમાયાધરો રાજા બુદ્ધવિદ્યાધરો મહાન્ ।
વજ્રતીક્ષ્ણો મહાખડ્ગો વિશુદ્ધઃ પરમાક્ષરઃ ॥

દુઃખચ્છેદમહાયાનવજ્રધર્મમહાયુધઃ ।
જિનજિગ્ વજ્રગામ્ભીર્યો વજ્રબુદ્ધિર્યથાર્થવિત્ ॥

સર્વપારમિતાપૂરી સર્વભૂમિવિભૂષણઃ ।
વિશુદ્ધધર્મનૈરાત્મ્યઃ સમ્યગ્જ્ઞાનેન્દુહૃત્પ્રભઃ ॥

માયાજાલમહોદ્યોગઃ સર્વતન્ત્રાધિપઃ પરઃ ।
અશેષવજ્રપર્યઙ્કો નિઃશેષજ્ઞાનકાયધૃક્ ॥

સમન્તભદ્રઃ સુમતિઃ ક્ષિતિગર્ભો જગદ્ધૃતિઃ ।
સર્વબુદ્ધમહાગર્ભો વિશ્વનિર્માણચક્રદૃક્ ॥

સર્વભાવસ્વભાવાગ્ય્રઃ સર્વભાવસ્વભાવધૃક્ ।
અનુત્પાદધર્મા વિશ્વાર્થઃ સર્વધર્મસ્વભાવધૃક્ ॥

એકક્ષણમહાપ્રાજ્ઞઃ સર્વધર્માવબોધધૃક્ ।
સર્વધર્માભિસમયો ભૂતાન્તમુનિરગ્રધીઃ ॥

સ્તિમિતઃ સુપ્રસન્નાત્મા સમ્યક્સંબુદ્ધબોધિધૃક્ ।
પ્રત્યક્ષઃ સર્વબુદ્ધાનાં જ્ઞાનાર્ચિઃ સુપ્રભાસ્વરઃ ॥

ઇષ્ટાર્થસાધકઃ પરઃ સર્વાપાયવિશોધકઃ ।
સર્વસત્ત્વોત્તમો નાથઃ સર્વસત્ત્વપ્રમોચકઃ ॥

ક્લેશસંગ્રામશૂરૈકઃ અજ્ઞાનરિપુદર્પહા ।
ધીશૃઙ્ગારધરઃ શ્રીમાન્ વીરબીભત્સરુપધૃક્ ॥

બાહુદણ્ડશતાક્ષેપપદનિક્ષેપનર્ત્તનઃ ।
શ્રીમચ્છતભુજાભોગગગનાભોગનર્ત્તનઃ ॥

એકપાદતલાક્રાન્તમહીમણ્ડતલે સ્થિતઃ ।
બ્રહ્માણ્ડશિખરાક્રાન્તપાદાઙ્ગુષ્ઠનખે સ્થિતઃ ॥

એકાર્થો ઽદ્વયધર્માર્થઃ પરમાર્થો ઽવિનશ્વરઃ ।
નાનાવિજ્ઞપ્તિરુપાર્થશ્ચિત્તવિજ્ઞાનસંતતિઃ ॥

અશેષભાવાર્થરતિઃ શૂન્યતારતિરગ્રધીઃ ।
ભવરાગાદ્યતીતશ્ચ ભવત્રયમહારતિઃ ॥

શુદ્ધઃ શુભ્રાભ્રધવલઃ શરચ્ચન્દ્રાંશુસુપ્રભઃ ।
બાલાર્કમણ્ડલચ્છાયો મહારાગનખપ્રભઃ ॥

ઇન્દ્રનીલાગ્રસચ્ચીરો મહાનીલકચાગ્રધૃક્ ।
મહામણિમયૂખશ્રીર્બુદ્ધનિર્વાણભૂષણઃ ॥

લોકધાતુશતાકમ્પી ઋદ્ધિપાદમહાક્રમઃ ।
મહાસ્મૃતિધરસ્તત્ત્વશ્ચતુઃસ્મૃતિસમાધિરાટ્ ॥

બોધ્યઙ્ગકુસુમામોદસ્તથાગતગુણોદધિઃ ।
અષ્ટાઙ્ગમાર્ગનયવિત્ સમ્યક્સંબુદ્ધમાર્ગવિત્ ॥

સર્વસત્ત્વમહાસઙ્ગો નિઃસઙ્ગો ગગનોપમઃ ।
સર્વસત્ત્વમનોજાતઃ સર્વસત્ત્વમનોજવઃ ॥

સર્વસત્ત્વેત્દ્રિયાર્થજ્ઞઃ સર્વસત્ત્વમનોહરઃ ।
પઞ્ચસ્કન્ધાર્થતત્ત્વજ્ઞઃ પઞ્ચસ્કન્ધવિશુદ્ધધૃક્ ॥

સર્વનિર્યાણકોટિસ્થઃ સર્વનિર્યાણકોવિદઃ ।
સર્વનિર્યાણમાર્ગસ્થઃ સર્વનિર્યાણદેશકઃ ॥

દ્વાદશાઙ્ગભવોત્ખાતો દ્વાદશાકારશુદ્ધધૃક્ ।
ચતુઃસત્યનયાકારો અષ્ટજ્ઞાનાવબોધધૃક્ ॥

દ્વાદશાકારસત્યાર્થઃ ષોડશાકારતત્ત્વવિત્ ।
વિંશત્યાકારસંબોધિર્વિબુદ્ધઃ સર્વવિત્પરઃ ॥

અમેયબુદ્ધનિર્માણકાયકોટિવિભાવકઃ ।
સર્વક્ષણાભિસમયઃ સર્વચિત્તક્ષણાર્થવિત્ ॥

નાનાયાનનયોપાયજગદર્થવિભાવકઃ ।
યાનત્રિતયનિર્યાત એકયાનફલે સ્થિત ॥

ક્લેશધાતુવિશુદ્ધાત્મા કર્મધાતુક્ષયઙ્કરઃ ।
ઓઘોદધિસમુત્તીર્ણો યોગકાન્તારનિસૃતઃ ॥

ક્લેશોપક્લેશસંક્લેશસુપ્રહીણસવાસનઃ ।
પ્રજ્ઞોપાયમહાકરુણા અમોઘજગદર્થકૃત્ ॥

સર્વસંજ્ઞાપ્રહોણાર્થો વિજ્ઞાનાર્થો નિરોધકૃત્ ।
સર્વસત્ત્વમનોવિષયઃ સર્વસત્ત્વમનોગતિઃ ॥

સર્વસત્ત્વમનો ઽન્તસ્થસ્તચ્ચિત્તસમતાઙ્ગતઃ ।
સર્વસત્ત્વમનોહ્લાદી સર્વસત્ત્વમનોરતિઃ ॥

સિદ્ધાન્તો વિભ્રમાપેતઃ સર્વભ્રાન્તિવિવર્જિતઃ ।
નિઃસંદિગ્ધમતિસ્ત્ર્યર્થઃ સર્વાર્થસ્ત્રિગુણાત્મકઃ ॥

પઞ્ચસ્કન્ધાર્થસ્ત્રિકાલઃ સર્વક્ષણવિભાવકઃ ।
એકક્ષણાભિસંબુદ્ધઃ સર્વબુદ્ધસ્વભાવધૃક્ ॥

અનઙ્ગકાયઃ કાયાગ્ય્રઃ કાયકોટિવિભાવકઃ ।
અશેષરુપસન્દર્શી રત્નકેતુર્મહામણિઃ ॥

સર્વસંબુદ્ધબોદ્ધવ્યો બુદ્ધબોધિરનુત્તરઃ ।
અનક્ષરો મન્ત્રયોનિર્મહામન્ત્ર કુલત્રયઃ ॥

સર્વમન્ત્રાર્થજનકો મહાબિન્દુરનક્ષરઃ ।
પઞ્ચાક્ષરો મહાશૂન્યો બિન્દુશૂન્યઃ ષડક્ષરઃ ॥

સર્વાકારો નિરાકારઃ ષોડશાર્ધાર્ધબિન્દુધૃક્ ।
અકલઃ કલનાતીશ્ચતુર્થધ્યાનકોટિધૃક્ ॥

સર્વધ્યાનકલાભિજ્ઞઃ સમાધિકુલગોત્રવિત્ ।
સમાધિકાયઃ કાયાગ્ય્રઃ સર્વસંભોગકાયરાટ્ ॥

નિર્માણકાયઃ કાયાગ્ય્રો બુદ્ધનિર્માણવંશધૃક્ ।
દશદિગ્વિશ્વનિર્માણો યથાવજ્જગદર્થકૃત્ ॥

દેવાતિદેવો દેવેન્દ્રઃ સુરેન્દ્રો દાનવાધિપઃ ।
અમરેન્દ્રઃ સુરગુરુઃ પ્રમથઃ પ્રમથેશ્વરઃ ॥

ઉત્તીર્ણભવકાન્તાર એકઃ શાસ્તા જગદ્ગુરુઃ ।
પ્રખ્યાતદશદિગ્લોકો ધર્મદાનપતિર્મહાન્ ॥

મૈત્રીસન્નાહસન્નદ્ધઃ કરુણાવર્મવર્મિતઃ ।
પ્રજ્ઞાખડ્ગો ધનુર્બાણઃ ક્લેશાજ્ઞાનરણઞ્જહઃ ॥

મારારિર્મારજિદ્વીરશ્ચતુર્મારભયાન્તકૃત્ ।
સર્વમારચમૂજેતા સમ્બદ્ધો લોકનાયકઃ ॥

વન્દ્યઃ પૂજ્યો ઽભિવાદ્યશ્ચ માનનીયશ્ચ નિત્યશઃ ।
અર્ચનીયતમો માન્યો નમસ્યઃ પરમો ગુરુઃ ॥

ત્રૈલોક્યૈકક્રમગતિર્વ્યોમપર્ય્યન્તવિક્રમઃ ।
ત્રૈવિદ્યઃ શ્રોત્રિયઃ પૂતઃ ષડભિજ્ઞઃ ષડનુસ્મૃતિઃ ॥

બોધિસત્ત્વો મહાસત્ત્વો લોકાતીતો મહર્દ્ધિકઃ ।
પ્રજ્ઞાપારમિતાનિષ્ઠઃ પ્રજ્ઞાતત્ત્વત્વમાગતઃ ॥

આત્મવિત્પરવિત્સર્વઃ સર્વીયો હ્યગ્રપુદ્ગલઃ ।
સર્વોપમામતિક્રાન્તો જ્ઞેયો જ્ઞાનાધિપઃ પરઃ ॥

ધર્મદાનપતિઃ શ્રેષ્ઠશ્ચતુર્મુદ્રાર્થદેશકઃ ।
પર્યુપાસ્યતમો જગતાં નિર્યાણત્રયયાયિનામ્ ॥

પરમાર્થવિશુદ્ધશ્રીસ્ત્રૈલોક્યસુભગો મહાન્ ।
સર્વસમ્પત્કરઃ શ્રીમાન્ મઞ્જુશ્રીઃ શ્રીમતાંવરઃ ॥

નમસ્તે વરદવજ્રાગ્ય્ર ભૂતકોટે નમો ઽસ્તુ તે ।
નમસ્તે શૂન્યતાગર્ભ બુદ્ધબોધે નમોસ્તુ તે ॥

બુદ્ધરાગ નમસ્તે ઽસ્તુ બુદ્ધકામ નમો નમઃ ।
બુદ્ધપ્રીતે નમસ્તુભ્યં બુદ્ધમોદ નમો નમઃ ॥

બુદ્ધસ્મિત નમસ્તુભ્યં બુદ્ધહાસ નમો નમઃ ।
બુદ્ધવાચ નમસ્તુભ્યં બુદ્ધભાવ નમો નમઃ ॥

અભવોદ્ભવ નમસ્તુભ્યં નમસ્તે બુદ્ધસંભવ ।
ગગનોદ્ભવ નમસ્તુભ્યં નમસ્તે જ્ઞાનસંભવ ॥

માયાજાલ નમસ્તુભ્યં નમસ્તે બુદ્ધનાટક ।
નમસ્તે સર્વસર્વેભ્યો જ્ઞાનકાય નમો ઽસ્તુ તે ॥