Vaikhānasamantrapraśna, 5-8 · Chapter 8.1.206

pr̥thivī́ śāntā́ sāgnínā śāntā́ sā́ me śāntā́ śúca(g)ṃ śamayatu
antárikṣa(g)ṃ śāntáṃ tád vāyúnā śāntáṃ tán me śāntá(g)ṃ śúca(g)ṃ śámayatu

dyaúś śāntā́ sā́dityéna śāntā́ sā́ me śāntā́ śúca(g)ṃ śamayatu

pr̥thivī́ śā́ntir antárikṣa(g)ṃ śā́ntir dyaúś śā́ntir

díśaś śā́ntir avāntara-diśā́ś śā́ntir agníś śā́ntir vāyúś śā́ntir ādityáś śā́ntiś candrámāś śā́ntir nákṣatrāṇi śā́ntir

ā́paś śā́ntir óṣadhayaś śā́ntir vánas-pátayaś śā́ntir

gaúś śā́ntir ajā́ śāntir áśvaś śā́ntiḥ púruṣaś śā́ntir bráhmā śā́ntir brāhmanáś śā́ntiś śā́ntir evá śā́ntiś śā́ntir me astu śā́ntiḥ

táyāhá(g)ṃ śāntyā́ sarva-śāntyā́ máhyaṃ dvi-páde cátuṣ-pade ca śā́ntiṃ karomi śā́ntir me astu śā́ntiḥ

éha śrī́ś ca hrī́ś ca dhŕ̥tiś ca tápo medhā́ pratiṣṭhā́ śraddhā́ satyáṃ dhármaś caitā́ni móttiṣṭhantam ánū́ttiṣṭhantu mā́ mā(g)ṃ śrī́ś ca hrī́ś ca dhŕ̥tiś ca tápo medhā́ pratiṣṭhā́ śraddhā́ satyáṃ dhármaś caitā́ni mā mā́ hāsiṣuḥ

údā́yuṣā svāyúṣód óṣadhīnā(g)ṃ rásenótparjányasya śúṣmeṇódasthām amŕ̥tā(g)ṃ ánu

tác cákṣur devá-hitaṃ purástāc[*959] chukrám uccárat
páśyema śarádaś śatáṃ jī́vema śarádaś śatáṃ nándāma śarádaś śatáṃ módāma śarádaś śatáṃ bhávāma śarádaś śatá(g)ṃ śr̥ṇávāma śarádaś śatáṃ prábravāma śarádaś śatám ájītās syāma śarádaś śatáṃ jyók ca sū́ryaṃ dr̥śé

yá údagān maható 'rṇávād vibhrā́jamānas sarirásya mádhyāth sá mā vr̥ṣabhó lohitākṣás sū́ryo vipaścín mánasā punātu

bráhmaṇaś ścótany[*960] asi bráhmaṇa āṇī́ stho bráhmaṇa āvápanam asi dhāritéyáṃ pr̥thivī́ bráhmaṇā mahī́ dhāritám enena mahád antárikṣaṃ dívaṃ dādhāra pr̥thivī́(g)ṃ sá-devāṃ yád aháṃ véda tád aháṃ dhārayāṇi mā́ mád védó 'dhi vísrasat

medhā-manīṣé mā́viśatā(g)ṃ samī́cī bhūtásya bhávyasyā́varuddhyai sárvam ā́yur ayāṇi sárvam ā́yur ayāṇi

ābhír gīrbhír yád áto na ūnám ā́pyāyaya harivo várdhamānaḥ
yadā́ stotŕ̥bhyo máhi gotrā́ rujā́si bhūyiṣṭha-bhā́jo ádha te syāma

bráhma prā́vādiṣma tán no mā́ hāsīt
óṃ śā́ntiś śā́ntiś śā́ntiḥ
[*959] RV omits
[*960] VMP: bráhmaṇa ścótany