Vaikhānasamantrapraśna, 5-8 · Chapter 8.1.142

hiraṇya-garbhás sám avartatā́gre bhūtásya jātáḥ pátir éka āsīt
sá dādhāra pr̥thivī́n dyā́m utémā́ṃ kásmai devā́ya havíṣā vidhema

yáḥ prāṇató nimiṣató mahitvaíka íd rā́jā jágato babhū́va
yá ī́śe asyá dvi-pádaś cátuṣ-padaḥ kásmai devā́ya havíṣā vidhema

yá ātma-dā́ bala-dā́ yásya víśva upā́sate praśíṣáṃ yásya devā́ḥ
yásya chāyā́mŕ̥taṃ yásya mr̥tyúḥ kásmai devā́ya havíṣā vidhema

yásyemé himávanto mahitvā́ yásya samudrá(g)ṃ rasáyā sahā́húḥ
yásyemā́ḥ pradíśo yásya bāhū́ kásmai devā́ya havíṣā vidhema

yáṃ krándasī ávasā tastabhāné abhy aíkṣetāṃ mánasā réjamāne
yátrā́dhi sū́ra úditau vyéti[*855] kásmai devā́ya havíṣā vidhema

yéna dyaúr ugrā́ pr̥thivī́ ca dr̥ḍhé[*856] yéna súvas stabhitáṃ yéna nā́kaḥ
yó antárikṣe rájaso vimā́naḥ kásmai devā́ya havíṣā vidhema

ā́po ha yán mahátī́r[*857] víśvam ā́yan dákṣaṃ[*858] dádhānā janáyantīr agním
táto devā́nāṃ níravartatā́sur[*859] ékaḥ kásmai devā́ya havíṣā vidhema

yáś cid ā́po mahinā́ paryápaśyad dákṣaṃ dádhānā janáyantīr agním[*860]
yó devéṣv ádhi devá éka ā́sīt kásmai devā́ya havíṣā vidhema
[*855] RV: údito vibhā́ti replaces úditau vyéti
[*856] RV: dr̥dhā́
[*857] RV: yád br̥hatīr replaces yán mahátī́r
[*858] RV: garbham
[*859] RV: samavartatā́sur
[*860] RV: yajñám