Vaikhānasamantrapraśna, 5-8 · Chapter 6.26

jātávedase sunavāma sómam arātīyató ní dahāti[*410] védaḥ
sá naḥ parṣad áti durgā́ṇi víśvā nāvéva síndhuṃ duritā́ty agní svā́hā

tā́m agní-varṇāṃ tápasā jvalantī́ṃ vairocanī́ṃ karma-phaléṣu júṣṭām
durgā́ṃ devī́(g)ṃ śáraṇam aháṃ prápadye sutárasi tarase námas[*411] svā́hā

ágne tváṃ pārayā návyo asmā́nth[*412] svastíbhir áti durgā́ṇi víśvā
pū́ś ca pr̥thvī́ bahulā́ na urvī́ bhávā tokā́ya tánayāya śáṃ yos svā́hā

víśvāni no durgá-hā́ jātavedas síndhuṃ ná nāvā́ duritā́ti parṣi
ágne atriván mánasā[*413] gr̥ṇāno 'smākaṃ bodhy avitā[*414] tanū́nā(gg)ṃ svā́hā

pr̥tanā-jíta(g)ṃ sáhamānam agním ugrá(g)ṃ huvema páramā́th sadhásthāt
sá naḥ parṣad áti durgā́ṇi víśvā kṣā́mad devó áti duritā́ty agnís svā́hā

pratnó ṣi[*415] kam ī́ḍyo ádhvaréṣu sánāc ca hótā návyaś ca sáthsi
svā́ṃ cāgne tanúvaṃ pipríyasvāsmábhyaṃ ca saúbhagam ā́ yajasva svā́hā
[*410] Text: dahātti
[*411] In RVKh the phrase sutárasi tarase námas appears twice in the verse, whereas VMP only gives it once.
[*412] RV: asmān
[*413] RV: námasā
[*414] Text: bhūtva vitā́
[*415] RV: hi