tripurasundarīmānasapūjāstotram · Chapter 1

tripurasundarīmānasapūjāstotram
mama na bhajanaśaktiḥ pādayoste na bhakti-
rna ca viṣayaviraktirdhyānayoge na saktiḥ .
iti manasi sadāhaṃ cintayannādyaśakte
ruciravacanapuṣpairarcanaṃ saṃcinomi .. १..
vyāptaṃ hāṭakavigrahairjalacarairārūḍhadevavrajaiḥ
potairākulitāntaraṃ maṇidharairbhūmīdharairbhūṣitam .
āraktāmṛtasindhumuddhuracaladvicīcayavyākula-
vyomānaṃ paricintya santatamaho cetaḥ kṛtārthībhava .. २..
tasminnujjvalaratnajālavilasatkānticchaṭābhiḥ sphuṭaṃ
kurvāṇaṃ viyadindracāpanicayairācchāditaṃ sarvataḥ .
uccaiḥśṛṅganiṣaṇṇadivyavanitābṛndānanaprollasa-
dgītākarṇananiścalākhilamṛgaṃ dvīpaṃ namaskurmahe .. ३..
jātīcampakapāṭalādisumanaḥsaurabhyasambhāvitaṃ
hrīṅkāradhvanikaṇṭhakokilakuhūprollāsicūtadrumam .
āvirbhūtasugandhicandanavanaṃ dṛṣṭipriyaṃ nandanaṃ
cañcaccañcalacañcarikacaṭulaṃ cetaściraṃ cintaya .. ४..
paripatitaparāgaiḥ pāṭalakṣoṇibhāgo
vikasitakusumoccaiḥ pītacandrārkaraśmiḥ .
aliśukapikarājīkūjitaiḥ śrotrahārī
sphuratu hṛdi madīye nūnamudyānarājaḥ .. ५..
ramyadvārapurapracāratamasāṃ saṃhārakāriprabha
sphūrjattoraṇabhārahārakamahāvistārahāradyute .
kṣoṇīmaṇḍalahemahāravilasatsaṃsārapāraprada
prodyadbhaktamanovihāra kanakaprākāra tubhyaṃ namaḥ .. ६..
udyatkāntikalāpakalpitanabhaḥsphūrjadvitānaprabha
satkṛṣṇāgarudhūpavāsitaviyatkāṣṭhāntare viśrutaḥ .
sevāyātasamastadaivatagaṇairāsevyamāno'niśaṃ
so'yaṃ śrīmaṇimaṇḍapo'navarataṃ maccetasi dyotatām .. ७..
kvāpi prodbhaṭapadmarāgakiraṇavrātena sandhyāyitaṃ
kutrāpi sphuṭavisphuranmarakatadyutyā tamisrāyitam .
madhyālambiviśālamauktikarucā jyotsnāyitaṃ kutraci-
nmātaḥ śrīmaṇimandiraṃ tava sadā vandāmahe sundaram .. ८..
uttuṅgālayavisphuranmarakataprodyatprabhāmaṇḍalā-
nyālokyāṅkuritotsavairnavatṛṇākīrṇasthalīśaṅkayā .
nīto vājibhirutpathaṃ bata rathaḥ sūtena tigmadyute-
rvalgāvalgigatahastamastaśikharaṃ kaṣṭairitaḥ prāpyate .. ९..
maṇisadanasamudyatkāntidhārānurakte
viyati caramasandhyāśaṅkino bhānurathyāḥ .
śithilitagatakupyatsūtahuṅkāranādaiḥ
kathamapi maṇigehāduccakairuccalanti .. १०..
bhaktyā kiṃ nu samarpitāni bahudhā ratnāni pāthodhinā
kiṃ vā rohaṇaparvatena sadanaṃ yairviśvakarmākarot .
ā jñātaṃ girije kaṭākṣakalayā nūnaṃ tvayā toṣite
śambhau nṛtyati nāgarājaphaṇinā kīrṇā maṇiśreṇayaḥ .. ११..
vidūramuktavāhanairvinamramaulimaṇḍalai-
rnibaddhahastasaṃpuṭaiḥ prayatnasaṃyatendriyaiḥ .
viriñciviṣṇuśaṅkarādibhirmudā tavāmbike
pratīkṣyamāṇanirgamo vibhāti ratnamaṇḍapaḥ .. १२..
dhvananmṛdaṅgakāhalaḥ pragītakiṃnarīgaṇaḥ
pranṛttadivyakanyakaḥ pravṛttamaṅgalakramaḥ .
prakṛṣṭasevakavrajaḥ prahṛṣṭabhaktamaṇḍalo
mude mamāstu santataṃ tvadīyaratnamaṇḍapaḥ .. १३..
praveśanirgamākulaiḥ svakṛtyaraktamānasai-
rbahisthitāmarāvalīvidhīyamānabhaktibhiḥ .
vicitravastrabhūṣaṇairupetamaṅganājanaiḥ
sadā karotu maṅgalaṃ mameha ratnamaṇḍapaḥ .. १४..
suvarṇaratnabhūṣitairvicitravastradhāribhi-
rgṛhītahemayaṣṭibhirniruddhasarvadaivataiḥ .
asaṃkhyasundarījanaiḥ purasthitairadhiṣṭhito
madīyametu mānasaṃ tvadīyatuṅgatoraṇaḥ .. १५..
indrādīṃśca digīśvarānsahaparivārānatho sāyudhā-
nyoṣidrūpadharānsvadikṣu nihitānsaṃcintya hṛtpaṅkaje .
śaṅkhe śrīvasudhārayā vasumatīyuktaṃ ca padmaṃ smara-
nkāmaṃ naumi ratipriyaṃ sahacaraṃ prītyā vasantaṃ bhaje .. १६..
gāyantīḥ kalavīṇayātimadhuraṃ huṅkāramātanvatī-
rdvārābhyāsakṛtasthitīriha sarasvatyādikāḥ pūjayan .
dvāre naumi madonmadaṃ suragaṇādhīśaṃ madenonmadāṃ
mātaṅgīmasitāmbarāṃ parilasanmuktāvibhūṣāṃ bhaje .. १७..
kastūrikāśyāmalakomalāṅgīṃ
kādambarīpānamadālasāṅgīm .
vāmastanāliṅgitaratnavīṇāṃ
mātaṅgakanyāṃ manasā smarāmi .. १८..
vikīrṇacikurotkare vigalitāmbarāḍambare
madākulitalocane vimalabhūṣaṇodbhāsini .
tiraskariṇi tāvakaṃ caraṇapaṅkajaṃ cintaya-
nkaromi paśumaṇḍalīmalikamohadughdhāśayām .. १९..
pramattavāruṇīrasairvighūrṇamānalocanāḥ
pracaṇḍadaityasūdanāḥ praviṣṭabhaktamānasāḥ .
upoḍhakajjalacchavicchaṭāvirājivigrahaḥ
kapālaśūladhāriṇīḥ stuve tvadīyadūtikāḥ .. २०..
sphūrjannavyayavāṅkuropalasitābhogaiḥ puraḥ sthāpitai-
rdīpodbhāsiśarāvaśobhitamukhaiḥ kumbhairnavaiḥ śobhinā .
svarṇābaddhavicitraratnapaṭalīcañcatkapāṭaśriyā
yuktaṃ dvāracatuṣṭayena girije vande maṇī mandiram .. २१..
āstīrṇāruṇakambalāsanayutaṃ puṣpopahārānvitaṃ
dīptānekamaṇipradīpasubhagaṃ rājadvitānottamam .
dhūpodgārisugandhisambhramamiladbhṛṅgāvalīguñjitaṃ
kalyāṇaṃ vitanotu me'navarataṃ śrīmaṇḍapābhyantaram .. २२..
kanakaracite pañcapretāsanena virājite
maṇigaṇacite raktaśvetāmbarāstaraṇottame .
kusumasurabhau talpe divyopadhānasukhāvahe
hṛdayakamale prādurbhūtāṃ bhaje paradevatām .. २३..
sarvāṅgasthitiramyarūparucirāṃ prātaḥ samabhyutthitāṃ
jṛmbhāmañjumukhāmbujāṃ madhumadavyāghūrṇadakṣitrayām .
sevāyātasamastasaṃnidhisakhīḥ saṃmānayantīṃ dṛśā
saṃpaśyanparadevatāṃ paramaho manye kṛtārthaṃ januḥ .. २४..
uccaistoraṇavartivādyanivahadhvāne samujjṛmbhite
bhaktairbhūmivilagnamaulibhiralaṃ daṇḍapraṇāme kṛte .
nānāratnasamūhanaddhakathanasthālīsamudbhāsitāṃ
prātaste parikalpayāmi girije nīrājanāmujjvalām .. २५..
pādyaṃ te parikalpayāmi padayorarghyaṃ tathā hastayoḥ
saudhībhirmadhuparkamamba madhuraṃ dhārābhirāsvādaya .
toyenācamanaṃ vidhehi śucinā gāṅgena matkalpitaṃ
sāṣṭāṅgaṃ praṇipātamīśadayite dṛṣṭyā kṛtārthī kuru .. २६..
mātaḥ paśya mukhāmbujaṃ suvimale datte mayā darpaṇe
devi svīkuru dantadhāvanamidaṃ gaṅgājalenānvitam .
suprakṣālitamānanaṃ viracayansnigdhāmbaraproñchanaṃ
drāgaṅgīkuru tattvamamba madhuraṃ tāmbūlamāsvādaya .. २७..
nidhehi maṇipādukopari padāmbujaṃ majjanā-
layaṃ vraja śanaiḥ sakhīkṛtakarāmbujālambanam .
maheśi karuṇānidhe tava dṛgantapātotsukā-
nvilokaya manāgamūnubhayasaṃsthitāndaivatān .. २८..
hemaratnavaraṇena veṣṭitaṃ
vistṛtāruṇavitānaśobhitam .
sajjasarvaparicārikājanaṃ
paśya majjanagṛhaṃ mano mama .. २९..
kanakakalaśajālasphāṭikasnānapīṭhā-
dyupakaraṇaviśālaṃ gandhamattālimālam .
sphuradaruṇavitāṃ mañjugandharvagānaṃ
paramaśivamahele majjanāgāramehi .. ३०..
pīnottuṅgapayodharāḥ parilasatsaṃpūrṇacandrānanā
ratnasvarṇavinirmitāḥ parilasatsūkṣmāmbaraprāvṛtāḥ .
hemasnānaghaṭīstathā mṛdupaṭirudvartanaṃ kausumaṃ
tailaṃ kaṅkatikaṃ kareṣu dadhatīrvande'mba te dāsikāḥ .. ३१..
tatra sphāṭikapīṭhametya śanakairuttāritālaṅkṛti-
rnīcairujjhitakañcukoparihitāraktottarīyāmbarā .
veṇībandhamapāsya kaṅkatikayā keśaprasādaṃ manā-
kkurvāṇā paradevatā bhagavatī citte mama dyotatām .. ३२..
abhyaṅgaṃ girije gṛhāṇa mṛdunā tailena saṃpāditaṃ
kāśmīrairagarudravairmalayajairudvartanaṃ kāraya .
gīte kiṃnarakāminībhirabhito vādye mudā vādite
nṛtyantīmiha paśya devi purato divyāṅganāmaṇḍalīm .. ३३..
kṛtaparikarabandhāstuṅgapīnastanāḍhyā
maṇinivahanibaddhā hemakumbhīrdadhānāḥ .
surabhisalilaniryadgandhalubdhālimālāḥ
savinayamupatasthuḥ sarvataḥ snānadāsyaḥ .. ३४..
udgandhairagarudravaiḥ surabhiṇā kastūrikāvāriṇā
sphūrjatsaurabhayakṣakardamajalaiḥ kāśmīranīrairapi .
puṣpāmbhobhiraśeṣatīrthasalilaiḥ karpūrapāthobharaiḥ
snānaṃ te parikalpayāmi girije bhaktyā tadaṅgīkuru .. ३५..

pratyaṅgaṃ parimārjayāmi śucinā vastreṇa saṃproñchanaṃ
kurve keśakalāpamāyatataraṃ dhūpottamairdhūpitam .
ālībṛndavinirmitāṃ yavanikāmāsthāpyaratnaprabhaṃ
bhaktatrāṇapare maheśagṛhiṇi snānāmbaraṃ mucyatām .. ३६..
pītaṃ te parikalpayāmi nibiḍaṃ caṇḍātakaṃ caṇḍike
sūkṣmaṃ snigdhamurīkuruṣva vasanaṃ sindūrapūraprabham .
muktāratnavicitrahemaracanācāruprabhābhāsvaraṃ
nīlaṃ kañcukamarpayāmi giriśaprāṇapriye sundari .. ३७..
lulitacikureṇa cchāditāṃsapradeśe
maṇinikaravirājatpādukānyastapāde .
sulalitamavalambya drāksakhīmaṃsadeśe
giriśagṛhiṇi bhūṣāmaṇṭapāya prayāhi .. ३८..
lasatkanakakuṭṭimasphuradamandamuktāvalī-
samullasitakāntibhiḥ kalitaśakracāpavraje .
mahābharaṇamaṇḍape nihitahemasiṃhāsanaṃ
sakhījanasamāvṛtaṃ samadhitiṣṭha kātyāyani .. ३९..
snigdhaṃ kaṅkatikāmukhena śanakaiḥ saṃśodhya keśotkaraṃ
sīmantaṃ viracayya cāru vimalaṃ sindūrarekhānvitam .
muktābhirgrathitālakāṃ maṇicitaiḥ sauvarṇasūtraiḥ sphuṭaṃ
prānte mauktikagucchakopalatikāṃ grathnāmi veṇīmimām .. ४०..
vilambiveṇībhujagottamāṅga-
sphuranmaṇibhrāntimupānayantam .
svarociṣollāsitakeśapāśaṃ
maheśi cūḍāmaṇimarpayāmi .. ४१..
tvāmāśrayadbhiḥ kabarītamisrai-
rbandīkṛtaṃ drāgiva bhānubimbam .
mṛḍāni cūḍāmaṇimādadhānaṃ
vandāmahe tāvatamuttamāṅgam .. ४२..
svamadhyanaddhahāṭakasphuranmaṇiprabhākulaṃ
vilambimauktikacchaṭāvirājitaṃ samantataḥ .
nibaddhalakṣacakṣuṣā bhavena bhūri bhāvitaṃ
samarpayāmi bhāsvaraṃ bhavāni phālabhūṣaṇam .. ४३..
mīnāmbhoruhakhañjarīṭasuṣamāvistāravismārake
kurvāṇe kila kāmavairimanasaḥ kandarpabāṇaprabhām .
mādhvīpānamadāruṇe'ticapale dīrghe dṛgambhoruhe
devi svarṇaśalākayorjitamidaṃ divyāñjanaṃ dīyatām .. ४४..
madhyasthāruṇaratnakāntirucirāṃ muktāmugodbhāsitāṃ
daivādbhārgavajīvamadhyagaraverlakṣmīmadhaḥ kurvatīm .
utsiktādharabimbakāntivisarairbhaumībhavanmauktikāṃ
maddattamurarīkuruṣva girije nāsāvibhūṣāmimām .. ४५..
uḍukṛtapariveṣaspardhayā śītabhāno-
riva viracitadehadvandvamādityabimbam .
aruṇamaṇisamudyatprāntavibhrājimuktaṃ
śaravasi parinidhehi svarṇatāṭaṅkayugmam .. ४६..
marakatavarapadmarāgahīro-
tthitagulikātritayāvanaddhamadhyam .
vitatavimalamauktikaṃ ca
kaṇṭhābharaṇamidaṃ girije samarpayāmi .. ४७..
nānādeśasamuttthitairmaṇigaṇaprodyatprabhāmaṇḍala-
vyāptairābharaṇairvirājitagalāṃ muktācchaṭālaṅkṛtām .
madhyasthāruṇaratnakāntirucirāṃ prāntasthamuktāphala-
vrātāmamba catuṣkikāṃ paraśive vakṣaḥsthale sthāpaya .. ४८..
anyonyaṃ plāvayantī satataparicalatkāntikallolajālaiḥ
kurvāṇā majjadantaḥkaraṇavimalatāṃ śobhiteva triveṇī .
muktābhiḥ padmarāgairmarakatamaṇibhirnirmitā dīpyamānai-
rnityaṃ hāratrayī te paraśivarasike cetasi dyotatāṃ naḥ .. ४९..
karasarasijanāle visphuratkāntijāle
vilasadamalaśobhe cañcadīśākṣilobhe .
vividhamaṇimayūkhodbhāsitaṃ devi durge
kanakakaṭakayugmaṃ bāhuyugme nidhehi .. ५०..
vyālambamānasitapaṭṭakagucchaśobhi
sphūrjanmaṇīghaṭitahāravirocamānam .
mātarmaheśamahile tava bāhumūle
keyūrakadvayamidaṃ viniveśayāmi .. ५१..
vitatanijamayūkhairnirmitāmindranīlai-
rvijitakamalanālālīnamattālimālām .
maṇigaṇakhacitābhyāṃ kaṅkaṇābhyāmupetāṃ
kalaya valayarājīṃ hastamūle maheśi .. ५२..
nīlapaṭṭamṛdugucchaśobhitā-
baddhanaikamaṇijālamañjulām .
arpayāmi valayātpuraḥsare
visphuratkanakataitṛpālikām .. ५३..
ālavālamiva puṣpadhanvanā
bālavidrumalatāsu nirmitam .
aṅgulīśu vinidhīyatāṃ śanai-
raṅgulīyakamidaṃ madarpitam .. ५४..
vijitaharamanobhūmattamātaṅgakumbha-
sthalavilulitakūjatkiṅkiṇījālatulyām .
aviratakalanadairīśaceto harantīṃ
vividhamaṇinibaddhāṃ mekhalāmarpayāmi .. ५५..
vyālambamānavaramauktikagucchaśobhi
vibhrājihāṭakapuṭadvayarocamānam .
hemnā vinirmitamanekamaṇiprabandhaṃ
nīvīnibandhanaguṇaṃ vinivedayāmi .. ५६..
vinihatanavalākṣāpaṅkabālātapaughe
marakatamaṇirājīmañjumañjīraghoṣe .
aruṇamaṇisamudyatkāntidhārāvicitra-
stava caraṇasaroje haṃsakaḥ prītimetu .. ५७..
nibaddhaśitipaṭṭakapravaragucchasaṃśobhitāṃ
kalakvaṇitamañjulāṃ giriśacittasaṃmohanīm .
amandamaṇimaṇḍalīvimalakāntikimmīritāṃ
nidhehi padapaṅkaje kanakaghuṅghurūmambike .. ५८..
visphuratsahajarāgarañjite
śiñjitena kalitāṃ sakhījanaiḥ .
padmarāgamaṇinūpuradvayī-
marpayāmi tava pādapaṅkaje .. ५९..
padāmbujamupāsituṃ parigatena śītāṃśunā
kṛtāṃ tanuparamparāmiva dināntarāgāruṇām .
maheśi navayāvakadravabhareṇa śoṇīkṛtāṃ
namāmi nakhamaṇḍalīṃ caraṇapaṅkajasthāṃ tava .. ६०..
āraktaśvetapītasphuradurukasumaiścitritāṃ paṭṭasūtrai-
rdevastrībhiḥ prayatnādagarusamuditairdhūpitāṃ divyadhūpaiḥ .
udyadgandhāndhapuṣpaṃdhayanivahasamārabdhajhāṅkāragītāṃ
cañcatkahlāramālāṃ paraśivarasike kaṇṭhapīṭhe'rpayāmi .. ६१..
gṛhāṇa paramāmṛtaṃ kanakapātrasaṃsthāpitaṃ
samarpaya mukhāmbuje vimalavīṭikāmambike .
vilokaya mukhāmbujaṃ mukuramaṇḍale nirmale
nidhehi maṇipādukopari padāmbujaṃ sundari .. ६२..
ālambya svasakhīṃ kareṇa śanakaiḥ siṃhāsanādutthitā
kūjanmandamarālamañjulagatiprollāsibhūṣāmbara .
ānandapratipādakairupaniṣadvākyaiḥ stutā vedhasā
maccitte sthiratāmupaitu girijā yāntī sabhāmaṇḍapam .. ६३..
calantyāmambāyāṃ pracalati samaste parijane
savegaṃ saṃyāte kanakalatikālaṅkṛtibhare .
samatāduttālasphuritapadasaṃpātajanitai-
rjhaṇatkāraistārairjhaṇajhaṇitamāsīnmaṇigṛham .. ६४..
cañcadvetrakarābhiraṅgavilasadbhūṣāmbarābhiḥ puro-
yantībhiḥ paricārikābhiramaravrāte samutsārite .
ruddhe nirjarasundarībhirabhitaḥ kakṣāntare nirgataṃ
vande nanditaśambhu nirmalacidānandaikarūpaṃ mahaḥ .. ६५..
vedhāḥ pādatale patatyayamasau viṣṇurnamatyagrataḥ
śambhurdehi dṛgañcalaṃ surapatiṃ dūrasthamālokaya .
ityevaṃ paricārikābhirudite saṃmānanāṃ kurvatī
dṛgdvandvena yathocitaṃ bhagavatī bhūyādvibhūtyai mama .. ६६..
mandaṃ cāraṇasundarībhirabhito yāntībhirutkaṇṭhayā
nāmoccāraṇapūrvakaṃ pratidiśaṃ pratyekamāveditāt .
vegādakṣipathaṃ gatānsuragaṇānālokayantī śanai-
rditsantī caraṇāmbujaṃ pathi jagatpāyānmaheśapriyā .. ६७..
agre kecana pārśvayoḥ katipaye pṛṣṭhe pare prasthitā
ākāśe samavasthitāḥ katipaye dikṣu sthitāścāpare .
saṃmardaṃ śanakairapāsya purato daṇḍapraṇāmānmuhuḥ
kurvāṇāḥ katicitsurā girisute dṛkpātamicchanti te .. ६८..
agre gāyati kiṃnarī kalapadaṃ gandharvakāntāḥ śanai-
rātodyāni ca vādayanti madhuraṃ savyāpasavyasthitāḥ .
kūjannūpuranāda mañju purato nṛtyanti divyāṅganā
gacchantaḥ paritaḥ stuvanti nigamastutyā viriñcyādayaḥ .. ६९..
kasmaicitsucirādupāsitamahāmantraughasiddhiṃ kramā-
dekasmai bhavaniḥspṛhāya paramānandasvarūpāṃ gatim .
anyasmai viṣayānuraktamanase dīnāya duḥkhāpahaṃ
dravyaṃ dvārasamāśritāya dadatīṃ vandāmahe sundarīm .. ७०..
namrībhūya kṛtāñjaliprakaṭitapremaprasannānane
mandaṃ gacchati saṃnidhau savinayātsotkaṇṭhamoghatraye .
nānāmantragaṇaṃ tadarthamakhilaṃ tatsādhanaṃ tatphalaṃ
vyācakṣāṇamudagrakānti kalaye yatkiñcidādyaṃ mahaḥ .. ७१..
tava dahanasadṛkṣairīkṣaṇaireva cakṣu-
rnikhilapaśujanānāṃ bhīṣayadbhīṣaṇāsyam .
kṛtavasati pareśapreyasi dvāri nityaṃ
śarabhamithunamuccairbhaktiyukto nato'smi .. ७२..
kalpānte sarasaikadāsamuditānekārkatulyaprabhāṃ
ratnastambhanibaddhakāñcanaguṇasphūrjadvitānottamām .

karpūrāgarugarbhavartikalikāprāptapradīpāvalīṃ
śrīcakrākṛtimullasanmaṇigaṇāṃ vandāmahe vedikām .. ७३..
svasthānasthitadevatāgaṇavṛte bindau mudā sthāpitaṃ
nānāratnavirājihemavilasatkānticchaṭādurdinam .
cañcatkausumatūlikāsanayutaṃ kāmeśvarādhiṣṭhitaṃ
nityānandanidānamamba satataṃ vande ca siṃhāsanam .. ७४..
vadadbhirabhito mudā jaya jayeti bṛndārakaiḥ
kṛtāñjaliparamparā vidadhati kṛtārthā dṛśā .
amandamaṇimaṇḍalīkhacitahemasiṃhāsanaṃ
sakhījanasamāvṛtaṃ samadhitiṣṭha dākṣāyaṇi .. ७५..
karpūrādikavastujātamakhilaṃ sauvarṇabhṛṅgārakaṃ
tāmbūlasya karaṇḍakaṃ maṇimayaṃ cailāñcalaṃ darpaṇam .
visphūrjanmaṇipāduke ca dadhatīḥ siṃhāsanasyābhita-
stiṣṭhantīḥ paricārikāstava sadā vandāmahe sundari .. ७६..
tvadamalavapurudyatkāntikallolajālaiḥ
sphuṭamiva dadhatībhirbāhuvikṣepalīlām .
muhurapi ca vidhūte cāmaragrāhiṇībhiḥ
sitakarakaraśubhre cāmare cālayāmi .. ७७..
prāntasphuradvimalamauktikagucchajālaṃ
cañcanmahāmaṇivicitritahemadaṇḍam .
udyatsahasrakaramaṇḍalacāru hema-
cchatraṃ maheśamahile viniveśayāmi .. ७८..
udyattāvakadehakāntipaṭalīsindūrapūraprabhā-
śoṇībhūtamudagralohitamaṇicchedānukāricchavi .
dūrādādaranirmitāñjalipuṭairālokamānaṃ sura-
vyūhaiḥ kāñcanamātapatramatulaṃ vandāmahe sundaram .. ७९..
santuṣṭāṃ paramāmṛtena vilasatkāmeśvarāṅkasthitāṃ
puṣpaughairabhipūjitāṃ bhagavatīṃ tvāṃ vandamānā mudā .
sphūrjattāvakadeharaśmikalanāprāptasvarūpābhidāḥ
śrīcakrāvaraṇasthitāḥ savinayaṃ vandāmahe devatāḥ .. ८०..
ādhāraśaktyādikamākalayya
madhye samastādhikayoginīṃ ca .
mitreśanāthādikamatra nātha-
catuṣṭayaṃ śailasute nato'smi .. ८१..
tripurāsudhārṇavāsana-
mārabhya tripuramālinī yāvat .
āvaraṇāṣṭakasaṃsthita-
māsanaṣaṭkaṃ namāmi parameśi .. ८२..
īśāne gaṇapaṃ smarāmi vicaradvighnāndhakāracchidaṃ
vāyavye vaṭukaṃ ca kajjalaruciṃ vyālopavītānvitam .
nairṛtye mahiṣāsurapramathinīṃ durgāṃ ca saṃpūjaya-
nnāgneye'khilabhaktarakṣaṇaparaṃ kṣetrādhi nāthaṃ bhaje .. ८३..
uḍyānajālandharakāmarūpa-
pīṭhānimānpūrṇagiriprasaktān .
trikoṇadakṣāgrimasavyabhāga-
madhyasthitānsiddhikarānnamāmi .. ८४..
lokeśaḥ pṛthivīpatirnigadito viṣṇurjalānāṃ prabhu-
stejonātha umāpatiśca marutāmīśastathā ceśvaraḥ .
ākāśādhipatiḥ sadāśiva iti pretābhidhāmāgatā-
netāṃścakrabahiḥsthitānsuragaṇānvandāmahe sādaram .. ८५..
tārānāthakalāpraveśanigamavyājādgatāsuprathaṃ
trailokye tithiṣu pravartitakalākāṣṭhādikālakramam .
ratnālaṅkṛticitravastralalitaṃ kāmeśvarīpūrvakaṃ
nityāṣoḍaśakaṃ namāmi lasitaṃ cakrātmanorantare .. ८६..
hṛdi bhāvitadaivataṃ prayatnā-
bhyupadeśānugṛhītabhaktasaṅgham .
svagurukramasaṃjñacakrarāja-
sthitamoghatrayamānato'smi mūrdhnā .. ८७..
hṛdayamatha śiraḥ śikhākhilādye
kavacamatho nayanatrayaṃ ca devi .
munijanaparicintita tathāstraṃ
sphuratu sadā hṛdaye ṣaḍaṅgametat .. ८८..
trailokyamohanamiti prathite tu cakre
cañcadvibhūṣaṇagaṇatripurādhivāse .
rekhātraye sthitavatīraṇimādisiddhī-
rmudrā namāmi satataṃ prakaṭābhidhāstāḥ .. ८९..
sarvāśāparipūrake vasudaladvandvena vibhrājite
visphūrjantripureśvarīnivasatau cakre sthitā nityaśaḥ .
kāmākarṣaṇikādayo maṇigaṇabhrājiṣṇudivyāmbarā
yoginyaḥ pradiśantu kāṅkṣitaphalaṃ vikhyātaguptābhidhāḥ .. ९०..
maheśi vasubhirdalairlasati sarvasaṃkṣobhaṇe
vibhūṣaṇagaṇasphurantripurasundarīsadmani .
anaṅgakusumādayo vividhabhūṣaṇodbhāsitā
diśantu mama kāṅkṣitaṃ tanutarāśca guptābhidhāḥ .. ९१..
lasadyugadṛśārake sphurati sarvasaubhāgyade
śubhābharaṇabhūṣitatripuravāsinīmandire .
sthitā dadhatu maṅgalaṃ subhagasarvasaṃkṣobhiṇī-
mukhāḥ sakalasiddhayo viditasaṃpradāyābhidhāḥ .. ९२..
bahirdaśāre sarvārthasādhake tripurāśrayāḥ .
kulakaulābhidhāḥ pāntu sarvasiddhipradāyikāḥ .. ९३..
antaḥśobhidaśārake'tilalite sarvādirakṣākare
mālinyā tripurādyayā viracitāvāse sthitaṃ nityaśaḥ .
nānāratnavibhūṣaṇaṃ maṇigaṇabhrājiṣṇu divyāmbaraṃ
sarvajñādikaśaktibṛndamaniśaṃ vande nigarbhābhidham .. ९४..
sarvarogahare'ṣṭāre tripurāsiddhayānvite .
rahasyayoginīrnityaṃ vaśinyādyā namāmyaham .. ९५..
cūtāśokavikāsiketakarajaḥprodbhāsinīlāmbuja-
prasphūrjannavamallikāsamuditaiḥ puṣpaiḥ śarānnirmitān .
ramyaṃ puṣpaśarāsanaṃ sulalitaṃ pāśaṃ tathā cāṅkuśaṃ
vande tāvakamāyudhaṃ paraśive cakrāntarālesthitam .. ९६..
trikoṇa uditaprabhe jagati sarvasiddhiprade
yute tripurayāmbayā sthitavatī ca kāmeśvarī .
tanotu mama maṅgalaṃ sakalaśarma vajreśvarī
karotu bhagamālinī sphuratu māmake cetasi .. ९७..
sarvānandamaye samastajagatāmākāṅkṣite baindave
bhairavyā tripurādyayā viracitāvāse sthitā sundarī .
ānandollasitekṣaṇā maṇigaṇabhrājiṣṇubhūṣāmbarā
visphūrjadvadanā parāpararahaḥ sa māṃ pātu yoginī .. ९८..
ullasatkanakakāntibhāsuraṃ
saurabhasphuraṇavāsitāmbaram .
dūrataḥ parihṛtaṃ madhuvratai-
rarpayāmi tava devi campakam .. ९९..
vairamuddhatamapāsya śambhunā
mastake vinihitaṃ kalācchalāt .
gandhalubdhamadhupāśritaṃ sadā
ketakīkusumamarpayāmi te .. १००..
cūrṇīkṛtaṃ drāgiva padmajena
tvadānanaspardhisudhāṃśubimbam .
samarpayāmi sphuṭamañjalisthaṃ
vikāsijātīkusumotkaraṃ te .. १०१..
agarubahaladhūpājasrasaurabhyaramyāṃ
marakatamaṇirājīrājihārisragābhām .
diśi vidiśi visaradgandhalubdhālimālāṃ
vakulakusumamālāṃ kaṇṭhapīṭhe'rpayāmi .. १०२..
īṅkārordhvagabindurānanamadhobindudvayaṃ ca stanau
trailokye gurugamyametadakhilaṃ hārdaṃ ca rekhātmakam .
itthaṃ kāmakalātmikāṃ bhagavatīmantaḥ samārādhaya-
nnānandāmbudhimajjane pralabhatāmānandathuṃ sajjanaḥ .. १०३..
dhūpaṃ te'garusaṃbhavaṃ bhagavati prollāsigandhoddhuraṃ
dīpaṃ caiva nivedayāmi mahasā hārdāndhakāracchidam .
rajasvarṇavinirmiteṣu paritaḥ pātreṣu saṃsthāpitaṃ
naivedyaṃ vinivedayāmi paramānandātmike sundari .. १०४..
jātīkorakatulyamodanamidaṃ sauvarṇapātre sthitaṃ
śuddhānnaṃ śuci mudgamāṣacaṇakodbhūtātathā sūpakāḥ .
prājyaṃ māhiṣamājyamuttamamidaṃ haivaṃgavīnaṃ pṛtha-
kpātreṣu pratipāditaṃ paraśive tatsarvamaṅgīkuru .. १०५..
śimbīsūraṇaśākabimbabṛhatīkūśmāṇḍakośātakī-
vṛntākāni paṭolakāni mṛdunā saṃsādhitānyagninā .
saṃpannāni ca vesavāravisarairdivyāni bhaktyā kṛtā-
nyagre te vinivedayāmi girije sauvarṇapātravraje .. १०६..
nimbūkārdrakacūtakandakadalīkauśātakīkarkaṭī-
dhātrībilvakarīrakairviracitānyānandacidvigrahe .
rājībhiḥ kaṭutailasaindhavaharidrābhiḥ sthitānpātaye
saṃdhānāni nivedayāmi girije bhūriprakārāṇi te .. १०७..
sitayāñcitalaḍḍukavrajā-
nmṛdupūpānmṛdulāśca pūrikāḥ .
paramānnamidaṃ ca pārvati
praṇayena pratipādayāmi te .. १०८..
digdhametadanale susādhitaṃ
candramaṇḍalanibhaṃ tathā dadhi .
phāṇitaṃ śikhariṇīṃ sitāsitāṃ
sarvamamba vinivedayāmi te .. १०९..
agre te vinivedya sarvamamitaṃ naivedyamaṅgīkṛtaṃ
jñātvā tattvacatuṣṭayaṃ prathamato manye sutṛptāṃ tataḥ .
devīṃ tvāṃ pariśiṣṭamamba kanakāmatreṣu saṃsthāpitaṃ
śaktibhyaḥ samupāhārāmi sakalaṃ deveśi śambhupriye .. ११०..
vāmena svarṇapātrīmanupamaparamānnena pūrṇāṃ dadhānā-
manyena svarṇadarvīṃ nijajanahṛdayābhīṣṭadāṃ dhārayantīm .
sindūrāraktavastrāṃ vividhamaṇilasadbhūṣaṇāṃ mecakāṅgīṃ
tiṣṭhantīmagrataste madhumadamuditāmannapūrṇāṃ namāmi .. १११..

paṅktyopaviṣṭānparitastu cakraṃ
śaktyā svayāliṅgitavāmabhāgān .
sarvopacāraiḥ paripūjya bhaktyā
tavāmbike pāriṣadānnamāmi .. ११२..
paramāmṛtamattasundarī-
gaṇamadhyasthitamarkabhāsuram .
paramāmṛtaghūrṇitekṣaṇaṃ
kimapi jyotirupāsmahe param .. ११३..
dṛśyate tava mukhāmbujaṃ śive
śrūyate sphuṭamanāhatadhvaniḥ .
arcane tava girāmagocare
na prayāti viṣayāntaraṃ manaḥ .. ११४..
tvanmukhāmbujavilokanollasa-
tpremaniścalavilocanadvayīm .
unmanīmupagatāṃ sabhāmimāṃ
bhāvayāmi parameśi tāvakīm .. ११५..
cakṣuḥ paśyatu neha kiṃcana paraṃ ghrāṇaṃ na vā jighratu
śrotraṃ hanta śruṇotu na tvagapi na sparśaṃ samālambatām .
jihvā vettu na vā rasaṃ mama paraṃ yuṣmatsvarūpāmṛte
nityānandavighūrṇamānanayane nityaṃ mano majjatu .. ११६..
yastvāṃ paśyati pārvati pratidinaṃ dhyānena tejomayīṃ
manye sundari tattvametadakhilaṃ vedeṣu niṣṭhāṃ gatam .
yastasminsamaye tavārcanavidhāvānandasāndrāśayo
yāto'haṃ tadabhinnatāṃ paraśive so'yaṃ prasādastava .. ११७..
gaṇādhināthaṃ vaṭukaṃ ca yoginīḥ
kṣetrādhināthaṃ ca vidikcatuṣṭaye .
sarvopacāraiḥ paripūjya bhaktito
nivedayāmo balimuktayuktibhiḥ .. ११८..
vīṇāmupānte khalu vādayantyai
nivedya śeṣaṃ khalu śeṣikāyai .
sauvarṇabhṛṅgāravinirgatena
jalena śuddhācamanaṃ vidhehi .. ११९..
tāmbūlaṃ vinivedayāmi vilasatkarpūrakastūrikā-
jātīpūgalavaṅgacūrṇakhadirairbhaktyā samullāsitam .
sphūrjadratnasamudgakapraṇihitaṃ sauvarṇapātre sthitai-
rdīpairujjvalamānnacūrṇaracitairārārtikaṃ gṛhyatām .. १२०..
kācidgāyati kiṃnarī kalapadaṃ vādyaṃ dadhānorvaśī
rambhā nṛtyati kelimañjulapadaṃ mātaḥ purastāttava .
kṛtyaṃ projjhya surastriyo madhumadavyāghūrṇamānekṣaṇaṃ
nityānandasudhāmbudhiṃ tava mukhaṃ paśyanti dṛśyanti ca .. १२१..
tāmbūlodbhāsivaktraistvadamalavadanālokanollāsinetrai-
ścakrasthaiḥ śaktisaṅghaiḥ parihṛtaviṣayāsaṅgamākarṇyamānam .. १२२..
arcāvidhau jñānalavo'pi dūre
dūre tadāpādakavastujātam .
pradakṣiṇīkṛtya tato'rcanaṃ te
pañcopacārātmakamarpayāmi .. १२३..
yathepsitamanogataprakaṭitopacārārcitaṃ
nijāvaraṇadevatāgaṇavṛtāṃ sureśasthitām .
kṛtāñjalipuṭo muhuḥ kalitabhūmiraṣṭāṅgakai-
rnamāmi bhagavatyahaṃ tripurasundari trāhi mām .. १२४..
vijñaptīravadhehi me sumahatā yatnena te saṃnidhiṃ
prāptaṃ māmiha kāndiśīkamadhunā mātarna dūrīkuru .
cittaṃ tvatpadabhāvane vyabhicareddṛgvākca me jātu ce-
ttatsaumye svaguṇairbadhāna na yathā bhūyo vinirgacchati .. १२५..
kvāhaṃ mandamatiḥ kva cedamakhilairekāntabhaktaiḥ stutaṃ
dhyātaṃ devi tathāpi te svamanasā śrīpādukāpūjanam .
kādācitkamadīyacintanavidhau santuṣṭayā śarmadaṃ
stotraṃ devatayā tayā prakaṭitaṃ manye madīyānane .. १२६..
nityārcamidaṃ citte bhāvyamānaṃ sadā mayā .
nibaddhaṃ vividhaiḥ padyairanugṛhṇātu sundarī .. १२७..
iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya
śrīmacchaṅkarabhagavataḥ kṛtau tripurasundarīmānasapūjāstotraṃ saṃpūrṇam ..