tārāsahasranāmastotram · Chapter 1

śrīdevyuvāca /
deva deva mahādeva sṛṣṭisthityantakāraka /
prasaṅgena mahādevyā vistaraṃ kathitaṃ mayi

devyā nīlasarasvatyāḥ sahasraṃ parameśvara /
nāmnāṃ śrotuṃ maheśāna prasādaḥ kriyatāṃ mayi /
kathayasva mahādeva yadyahaṃ tava vallabhā

śrībhairava uvāca /
sādhu pṛṣṭaṃ mahādevi sarvatantreṣu gopitam /
nāmnāṃ sahasraṃ tārāyāḥ kathituṃ naiva śakyate

prakāśāt siddhihāniḥ syāt śriyā ca parihīyate /
prakāśayati yo mohāt ṣaṇmāsād mṛtyumāpnuyāt

akathyaṃ parameśāni akathyaṃ caiva sundari /
kṣamasva varade devi yadi sneho'sti māṃ prati

sarvasvaṃ śṛṇu he devi sarvāgamavidāṃ vare /
dhanasāraṃ mahādevi goptavyaṃ parameśvari

āyurgopyaṃ gṛhacchidraṃ gopyaṃ na pāpabhāg bhavet /
sugopyaṃ parameśāni gopanāt siddhimaśnute

prakāśāt kāryahāniśca prakāśāt pralayaṃ bhavet /
tasmād bhadre maheśāni na prakāśyaṃ kadācana

iti devavacaḥ śrutvā devī paramasundarī /
vismitā parameśānī viṣaṇā tatra jāyate

śṛṇu he parameśāna kṛpāsāgarapāraga /
tava sneho mahādeva mayi nāstyatra niścitam

bhadraṃ bhadraṃ mahādeva iti kṛtvā maheśvarī /
vimukhībhūya deveśī tatrāste śailajā śubhā

vilokya vimukhīṃ devīṃ mahādevo maheśvaraḥ /
prahasya parameśānīṃ pariṣvajya priyāṃ kathām

kathayāmāsa tatraiva mahādevyai maheśvari /
mama sarvasvarūpā tvaṃ jānīhi naganandini

tvāṃ vināhaṃ mahādevi pūrvoktaśavarūpavān /
kṣamasva paramānande kṣamasva naganandini

yathā prāṇo maheśāni dehe tiṣṭhati sundari /
tathā tvaṃ jagatāmādye caraṇe patito'smyaham

iti matvā mahādevi rakṣa māṃ tava kiṅkaram /
tato devī maheśānī trailokyamohinī śivā

mahādevaṃ pariṣvajya prāha gadgadayā girā /
sadā dehasvarūpāhaṃ dehī tvaṃ parameśvara

tathāpi vañcanāṃ kartuṃ māmitthaṃ vadasi priyam /
mahādevaḥ punaḥ prāha bhairavi prāṇavallabhe

nāmnāṃ sahasraṃ tārāyāḥ śrotumicchasyaśeṣataḥ /
śrīdevyuvāca /
na śrutaṃ parameśāna tārānāmasahasrakam /
kathayasva mahābhāga satyaṃ paramasundaram

śrīpārvatyuvāca /
kathamīśāna sarvajña labhante siddhimuttamām /
sādhakāḥ sarvadā yena tanme kathaya sundara

yasmāt parataraṃ nāsti stotraṃ tantreṣu niścitam /
sarvapāpaharaṃ divyaṃ sarvāpadvinivārakam

sarvajñānakaraṃ puṇyaṃ sarvamaṅgalasaṃyutam /
puraścaryāśataistulyaṃ stotraṃ sarvapriyaṅkaram

vaśyapradaṃ māraṇadamuccāṭanapradaṃ mahat /
nāmnāṃ sahasraṃ tārāyāḥ kathayasva sureśvara

śrīmahādeva uvāca /
nāmnāṃ sahasraṃ tārāyāḥ stotrapāṭhād bhaviṣyati /
nāmnāṃ sahasraṃ tārāyāḥ kathayiṣyāmyaśeṣataḥ

śṛṇu devi sadā bhaktyā bhaktānāṃ paramaṃ hitam /
vinā pūjopahāreṇa vinā jā(pyena yat phalam

tat phalaṃ sakalaṃ devi kathayiṣyāmi tacchṛṇu /
ॐ asya śrītārāsahasranāmastotramahāmantrasya,
akṣobhya ṛṣiḥ, bṛhatī-uṣṇik chandaḥ,
śrī ugratārā śrīmadekajaṭā śrīnīlasarasvatī devatā,
puruṣārthacatuṣṭayasiddhyarthe viniyogaḥ //
tārā rātrirmahārātrirkālarātrirmahāmatiḥ /
kālikā kāmadā māyā mahāmāyā mahāsmṛtiḥ

mahādānaratā yajñā yajñotsavavibhūṣitā /
candravvajrā cakorākṣī cārunetrā sulocanā

trinetrā mahatī devī kuraṅgākṣī manoramā /
brāhmī nārāyaṇī jyotsnā cārukeśī sumūrdhajā

vārāhī vāruṇī vidyā mahāvidyā maheśvarī /
siddhā kuñcitakeśā ca mahāyajñasvarūpiṇī

gaurī campakavarṇā ca kṛśāṅgī śivamohinī /
sarvānandasvarūpā ca sarvaśaṅkaikatāriṇī

vidyānandamayī nandā bhadrakālī svarūpiṇī /
gāyatrī sucaritrā ca kaulavrataparāyaṇā

hiraṇyagarbhā bhūgarbhā mahāgarbhā sulocanī /
himavattanayā divyā mahāmeghasvarūpiṇī

jaganmātā jagaddhātrī jagatāmupakāriṇī /
aindrī saumyā tathā ghorā vāruṇī mādhavī tathā

āgneyī nairṛtī caiva aiśānī caṇḍikātmikā /
sumerutanayā nityā sarveṣāmupakāriṇī

lalajjihvā sarojākṣī muṇḍasrakparibhūṣitā /
sarvānandamayī sarvā sarvānandasvarūpiṇī

dhṛtirmedhā tathā lakṣmīḥ śraddhā pannagagāminī /
rukmiṇī jānakī durgāmbikā satyavatī ratiḥ

kāmākhyā kāmadā nandā nārasiṃhī sarasvatī /
mahādevaratā caṇḍī caṇḍadordaṇḍakhaṇḍinī

dīrghakeśī sukeśī ca piṅgakeśī mahākacā /
bhavānī bhavapatnī ca bhavabhītiharā satī

paurandarī tathā viṣṇorjāyā māheśvarī tathā /
sarveṣāṃ jananī vidyā cārvaṅgī daityanāśinī

sarvarūpā maheśāni kāminī varavarṇinī /
mahāvidyā mahāmāyā mahāmedhā mahotsavā

virūpā viśvarūpā ca mṛḍānī mṛḍavallabhā /
koṭicandrapratīkāśā śatasūryaprakāśinī

jahnukanyā mahogrā ca pārvatī viśvamohinī /
kāmarūpā maheśānī nityotsāhā manasvinī

vaikuṇṭhanāthapatnī ca tathā śaṅkaramohinī /
kāśyapī kamalā kṛṣṇā kṛṣṇarūpā ca kālinī

māheśvarī vṛṣārūḍhā sarvavismayakāriṇī /
mānyā mānavatī śuddhā kanyā himagirestathā

aparṇā padmapatrākṣī nāgayajñopavītinī /
mahāśaṅkhadharā kāntā kamanīyā nagātmajā

brahmāṇī vaiṣṇavī śambhorjāyā gaṅgā jaleśvarī /
bhāgīrathī manobuddhirnityā vidyāmayī tathā

harapriyā girisutā harapatnī tapasvinī /
mahāvyādhiharā devī mahāghorasvarūpiṇī

mahāpuṇyaprabhā bhīmā madhukaiṭabhanāśinī /
śaṅkhinī vajriṇī dhātrī tathā pustakadhāriṇī

cāmuṇḍā capalā tuṅgā śumbadaityanikṛntanī /
śāntirnidrā mahānidrā pūrṇanidrā ca reṇukā

kaumārī kulajā kāntī kaulavrataparāyaṇā /
vanadurgā sadācārā draupadī drupadātmajā

yaśasvinī yaśasyā ca yaśodhātrī yaśaḥpradā /
sṛṣṭirūpā mahāgaurī niśumbaprāṇanāśinī

padminī vasudhā pṛthvī rohiṇī vindhyavāsinī /
śivaśaktirmahāśaktiḥ śaṅkhinī śaktinirgatā

daityaprāṇaharā devī sarvarakṣaṇakāriṇī /
kṣāntiḥ kṣemaṅkarī caiva buddhirūpā mahādhanā

śrīvidyā bhairavi bhavyā bhavānī bhavanāśinī /
tāpinī bhāvinī sītā tīkṣṇatejaḥsvarūpiṇī

dātrī dānaparā kālī durgā daityavibhūṣaṇā /
mahāpuṇyapradā bhīmā madhukaiṭabhanāśinī

padmā padmāvatī kṛṣṇā tuṣṭā puṣṭā tathorvaśī /
vajriṇī vajrahastā ca tathā nārāyaṇī śivā

khaḍginī khaḍgahastā ca khaḍgakharparadhāriṇī /
devāṅganā devakanyā devamātā pulomajā

sukhinī svargadātrī ca sarvasaukhyavivardhinī /
śīlā śīlāvatī sūkṣmā sūkṣmākārā varapradā

vareṇyā varadā vāṇī jñāninī jñānadā sadā /
ugrakālī mahākālī bhadrakālī ca dakṣiṇā

bhṛguvaṃśasamudbhūtā bhārgavī bhṛguvallabhā /
śūlinī śūlahastā ca kartrīkharparadhāriṇī

mahāvaṃśasamudbhūtā mayūravaravāhanā /
mahāśaṅkharatā raktā raktakharparadhāriṇī

raktāmbaradharā rāmā ramaṇī suranāyikā /
mokṣadā śivadā śyāmā madavibhramamantharā

paramānandadā jyeṣṭhā yoginī gaṇasevitā /
sārā jāmbavatī caiva satyabhāmā nagātmajā

raudrā raudrabalā ghorā rudrasārāruṇātmikā /
rudrarūpā mahāraudrī raudradaityavināśinī

kaumārī kauśikī caṇḍā kāladaityavināśinī /
śambhupatnī śambhuratā śambujāyā mahodarī

śivapatnī śivaratā śivajāyā śivapriyā /
harapatnī hararatā harajāyā harapriyā

madanāntakakāntā ca madanāntakavallabhā /
girijā girikanyā ca girīśasya ca vallabhā

bhūtā bhavyā bhavā spaṣṭā pāvanī parapālinī /
adṛśyā ca vyaktarūpā iṣṭāniṣṭapravarddhinī

acyutā pracyutaprāṇā pramadā vāsaveśvarī /
apāṃnidhisamudbhūtā dhāriṇī ca pratiṣṭhitā

udbhavā kṣobhaṇā kṣemā śrīgarbhā parameśvarī /
kamalā puṣpadehā ca kāminī kañjalocanā

śaraṇyā kamalā prītirvimalānandavardhinī /
kapardinī karālā ca nirmalā devarūpiṇī

udīrṇabhūṣaṇā bhavyā surasenā mahodarī /
śrīmatī śiśirā navyā śiśirācalakanyakā

suramānyā suraśreṣṭhā jyeṣṭhā prāṇeśvarī sthirā /
tamoghnī dhvāntasaṃhantrī prayatātmā pativratā

pradyotinī rathārūḍhā sarvalokaprakāśinī /
medhāvinī mahāvīryā haṃsī saṃsāratāriṇī

praṇataprāṇināmārtihāriṇī daityanāśinī /
ḍākinī śākinīdevī varakhaṭvāṅgadhāriṇī

kaumudī kumudā kundā kaulikā kulajāmarā /
garvitā guṇasampannā nagajā khagavāhinī

candrānanā mahogrā ca cārumūrdhajaśobhanā /
manojñā mādhavī mānyā mānanīyā satāṃ suhṛt

jyeṣṭhā śreṣṭhā maghā puṣyā dhaniṣṭhā pūrvaphālgunī /
raktabījanihantrī ca raktabījavināśinī

caṇḍamuṇḍanihantrī ca caṇḍamuṇḍavināśinī /
kartrī hartrī sukartrī ca vimalāmalavāhinī

vimalā bhāskarī vīṇā mahiṣāsuraghātinī /
kālindī yamunā vṛddhā surabhiḥ bālikā satī

kauśalyā kaumudī maitrīrūpiṇī cāpyarundhatī /
purārigṛhiṇī pūrṇā pūrṇānandasvarūpiṇī

puṇḍarīkākṣapatnī ca puṇḍarīkākṣavallabhā /
sampūrṇacandravadanā bālacandrasamaprabhā

revatī ramaṇī citrā citrāmbaravibhūṣaṇāṃ /
sītā vīṇāvatī caiva yaśodā vijayā priyā

navapuṣpasamudbhūtā navapuṣpotsavotsavā /
navapuṣpasrajāmālā mālyabhūṣaṇabhūṣitā

navapuṣpasamaprāṇā navapuṣpotsavapriyā /
pretamaṇḍalamadhyastā sarvāṅgasundarī śivā

navapuṣpātmikā ṣaṣṭhī puṣpastavakamaṇḍalā /
navapuṣpaguṇopetā śmaśānabhairavapriyā

kulaśāstrapradīpā ca kulamārgapravarddhinī /
śmaśānabhairavī kālī bhairavī bhairavapriyā

ānandabhairavī dhyeyā bhairavī kurubhairavī /
mahābhairavasamprītā bhairavīkulamohinī

śrīvidyābhairavī nītibhairavī guṇabhairavī /
sammohabhairavī puṣṭibhairavī tuṣṭibhairavī

saṃhārabhairavī sṛṣṭibhairavī sthitibhairavī /
ānandabhairavī vīrā sundarī sthitisundarī

guṇānandasvarūpā ca sundarī kālarūpiṇī /
śrīmāyāsundarī saumyasundarī lokasundarī

śrīvidyāmohinī buddhirmahābuddhisvarūpiṇī /
mallikā hārarasikā hārālambanasundarī

nīlapaṅkajavarṇā ca nāgakesarabhūṣitā /
japākusumasaṅkāśā japākusumaśobhitā

priyā priyaṅkarī viṣṇordānavendravināśinī /
jñāneśvarī jñānadātrī jñānānandapradāyinī

guṇagauravasampannā guṇaśīlasamanvitā /
rūpayauvanasampannā rūpayauvanaśobhitā

guṇāśrayā guṇaratā guṇagauravasundarī /
madirāmodamattā ca tāṭaṅkadvayaśobhitā

vṛkṣamūlasthitā devī vṛkṣaśākhoparisthitā /
tālamadhyāgranilayā vṛkṣamadhyanivāsinī

svayambhūpuṣpasaṅkāśā svayambhūpuṣpadhāriṇī /
svayambhūkusumaprītā svayambhūpuṣpaśobhinī

svayambhūpuṣparasikā nagnā dhyānavatī sudhā /
śukrapriyā śukraratā śukramajjanatatparā

pūrṇaparṇā suparṇā ca niṣparṇā pāpanāśinī /
madirāmodasampannā madirāmodadhāriṇī

sarvāśrayā sarvaguṇā nandanandanadhāriṇī /
nārīpuṣpasamudbhūtā nārīpuṣpotsavotsavā

nārīpuṣpasamaprāṇā nārīpuṣparatā mṛgī /
sarvakālodbhavaprītā sarvakālodbhavotsavā

caturbhujā daśabhujā aṣṭādaśabhujā tathā /
dvibhujā ṣaḍbhujā prītā raktapaṅkajaśobhitā

kauberī kauravī kauryā kurukullā kapālinī /
sudīrghakadalījaṅghā rambhorū rāmavallabhā

niśācarī niśāmūrtirniśācandrasamaprabhā /
cāndrī cāndrakalā candrā cārucandranibhānanā

srotasvatī srutimatī sarvadurgatināśinī /
sarvādhārā sarvamayī sarvānandasvarūpiṇī

sarvacakreśvarī sarvā sarvamantramayī śubhā /
sahasranayanaprāṇā sahasranayanapriyā

sahasraśīrṣā suṣamā sadambhā sarvabhakṣikā /
yaṣṭikā yaṣṭicakrasthā ṣadvargaphaladāyinī

ṣaḍviṃśapadmamadhyasthā ṣaḍviṃśakulamadhyagā /
hūm̐kāravarṇanilayā hūm̐kārākṣarabhūṣaṇā

hakāravarṇanilayā hakārākṣarabhūṣaṇā /
hāriṇī hāravalitā hārahīrakabhūṣaṇā

hrīṅkārabījasahitā hrīṅkārairupaśobhitā /
kandarpasya kalā kundā kaulinī kuladarpitā

ketakīkusumaprāṇā ketakīkṛtabhūṣaṇā /
ketakīkusumāsaktā ketakīparibhūṣitā

karpūrapūrṇavadanā mahāmāyā maheśvarī /
kalā keliḥ kriyā kīrṇā kadambakusumotsukā

kādambinī kariśuṇḍā kuñjareśvaragāminī /
kharvā sukhañjanayanā khañjanadvandvabhūṣaṇā

khadyota iva durlakṣā khadyota iva cañcalā /
mahāmāyā jgaddhātrī gītavādyapriyā ratiḥ

gaṇeśvarī gaṇejyā ca guṇapūjyā guṇapradā /
guṇāḍhyā guṇasampannā guṇadātrī guṇātmikā

gurvī gurutarā gaurī gāṇapatyaphalapradā /
mahāvidyā mahāmedhā tulinī gaṇamohinī

bhavyā bhavapriyā bhāvyā bhāvanīyā bhavātmikā /
ghargharā ghoravadanā ghoradaityavināśinī

ghorā ghoravatī ghoṣā ghoraputrī ghanācalā /
carcarī cārunayanā cāruvaktrā caturguṇā

caturvedamayī caṇḍī candrāsyā caturānanā /
calaccakoranayanā calatkhañjanalocanā

caladambhojanilayā caladambhojalocanā /
chatrī chatrapriyā chatrā chatracāmaraśobhitā

chinnachadā chinnaśirāśchinnanāsā chalātmikā /
chalāḍhyā chalasantrastā chalarūpā chalasthirā

chakāravarṇanilayā chakārāḍhyā chalapriyā /
chadminī chadmaniratā chadmacchadmanivāsinī

jagannāthapriyā jīvā jaganmuktikarī matā /
jīrṇā jīmūtavanitā jīmūtairupaśobhitā

jāmātṛvaradā jambhā jamalārjunabhañjinī /
jharjharī jhākṛtirjhallī jharī jharjharikā tathā

ṭaṅkārakāriṇī ṭīkā sarvaṭaṅkārakāriṇī /
ṭhaṅkarāṅgī ḍamarukā ḍākārā ḍamarupriyā

ḍhakkārāvaratā nityā tulasī maṇibhūṣitā /
tulā ca tolikā tīrṇā tārā tāraṇikā tathā

tantravijñā tantraratā tantravidyā ca tantradā /
tāntrikī tantrayogyā ca tantrasārā ca tantrikā

tantradhārī tantrakarī sarvatantrasvarūpiṇī /
tuhināṃśusamānāsyā tuhināṃśusamaprabhā

tuṣārākaratulyāṅgī tuṣārādhārasundarī /
tantrasārā tantrakaro tantrasārasvarūpiṇī

tuṣāradhāmatulyāsyā tuṣārāṃśusamaprabhā /
tuṣārādrisutā tārkṣyā tārāṅgī tālasundarī

tārasvareṇa sahitā tārasvaravibhūṣitā /
thakārakūṭanilayā thakārākṣaramālinī

dayāvatī dīnaratā duḥkhadāridryanāśinī /
daurbhāgyaduḥkhadalinī daurbhāgyapadanāśinī

duhitā dīnabandhuśca dānavendravināśinī /
dānapātrī dānaratā dānasammānatoṣitā

dāntyādisevitā dāntā dayā dāmodarapriyā /
dadhīcivaradā tuṣṭā dānavendravimardinī

dīrghanetrā dīrghakacā dīrghanāsā ca dīrghikā /
dāridryaduḥkhasaṃnāśā dāridryaduḥkhanāśinī

dāmbhikā danturā dambhā dambhāsuravarapradā /
dhanadhānyapradā dhanyā dhaneśvaradhanapradā

dharmapatnī dharmaratā dharmādharmavivivarddhinī /
dharmiṇī dharmikā dharmyā dharmādharmavivarddhinī

dhaneśvarī dharmaratā dharmānandapravarddhinī /
dhanādhyakṣā dhanaprītā dhanāḍhyā dhanatoṣitā

dhīrā dhairyavatī dhiṣṇyā dhavalāmbhojasaṃnibhā /
dhariṇī dhāriṇī dhātrī dhūraṇī dharaṇī dharā

dhārmikā dharmasahitā dharmanindakavarjitā /
navīnā nagajā nimnā nimnanābhirnageśvarī

nūtanāmbhojanayanā navīnāmbhojasundarī /
nāgarī nagarajyeṣṭhā nagarājasutā nagā

nāgarājakṛtatoṣā nāgarājavibhūṣitā /
nāgeśvarī nāgarūḍhā nāgarājakuleśvarī

navīnendukalā nāndī nandikeśvaravallabhā /
nīrajā nīrajākṣī ca nīrajadvandvalocanā

nīrā nīrabhavā vāṇī nīranirmaladehinī /
nāgayajñopavītāḍhyā nāgayajñopavītikā

nāgakesarasantuṣṭā nāgakesaramālinī /
navīnaketakīkunda ? mallikāmbhojabhūṣitā

nāyikā nāyakaprītā nāyakapremabhūṣitā /
nāyakapremasahitā nāyakapremabhāvitā

nāyakānandanilayā nāyakānandakāriṇī /
narmakarmaratā nityaṃ narmakarmaphalapradā

narmakarmapriyā narmā narmakarmakṛtālayā /
narmaprītā narmaratā narmadhyānaparāyaṇā

pauṣṇapriyā ca pauṣpejyā puṣpadāmavibhūṣitā /
puṇyadā pūrṇimā pūrṇā koṭipuṇyaphalapradā

purāṇāgamagopyā ca purāṇāgamagopitā /
purāṇagocarā pūrṇā pūrvā prauḍhā vilāsinī

prahlādahṛdayāhlādagehinī puṇyacāriṇī /
phālgunī phālgunaprītā phālgunapredhāriṇī

phālgunapremadā caiva phaṇirājavibhūṣitā /
phaṇikāñcī phaṇiprītā phaṇihāravibhūṣitā

phaṇīśakṛtasarvāṅgabhūṣaṇā phaṇihāriṇī /
phaṇiprītā phaṇiratā phaṇikaṅkaṇadhāriṇī

phaladā triphalā śaktā phalābharaṇabhūṣitā /
phakārakūṭasarvāṅgī phālgunānandavarddhinī

vāsudevaratā vijñā vijñavijñānakāriṇī /
vīṇāvatī balākīrṇā bālapīyūṣarocikā

bālāvasumatī vidyā vidyāhāravibhūṣitā /
vidyāvatī vaidyapadaprītā vaivasvatī baliḥ

balividhvaṃsinī caiva varāṅgasthā varānanā /
viṣṇorvakṣaḥsthalasthā ca vāgvatī vindhyavāsinī

bhītidā bhayadā bhānoraṃśujālasamaprabhā /
bhārgavejyā bhṛgoḥ pūjyā bharadvāranamaskṛtā

bhītidā bhayasaṃhantrī bhīmākārā ca sundarī /
māyāvatī mānaratā mānasammānatatparā

mādhavānandadā mādhvī madirāmuditekṣaṇā /
mahotsavaguṇopetā mahatī ca mahadguṇā

madirāmodaniratā madirāmajjane ratā /
yaśodharī yaśovidyā yaśodānandavarddhinī

yaśaḥkarpūradhavalā yaśodāmavibhūṣitā /
yamarājapriyā yogamārgānandapravarddhinī

yamasvasā ca yamunā yogamārgapravarddhinī /
yādavānandakartrī ca yādavānandavarddhinī

yajñaprītā yajñamayī yajñakarmavibhūṣitā /
rāmaprītā rāmaratā rāmatoṣaṇatatparā

rājñī rājakulejyā ca rājarājeśvarī ramā /
ramaṇī rāmaṇī ramyā rāmānandapradāyinī

rajanīkarapūrṇāsyā raktotpalavilocanā /
lāṅgalipremasantuṣṭā lāṅgalipraṇayapriyā

lākṣāruṇā ca lalanā līlā līlāvatī layā /
laṅkeśvaraguṇaprītā laṅkeśavaradāyinī

lavaṅgīkusumaprītā lavaṅgakusumasrajā /
dhātā vivasvadgṛhiṇī vivasvatpremadhāriṇī

śavoparisamāsīnā śavavakṣaḥsthalasthitā /
śaraṇāgatarakṣitrī śaraṇyā śrīḥ śaradguṇā

ṣaṭkoṇacakramadhyasthā sampadārthaniṣevitā /
hūṅkārākāriṇī devī hūṅkārarūpaśobhitā

kṣemaṅkarī tathā kṣemā kṣemadhāmavivarddhinī /
kṣemāmnāyā tathājñā ca iḍā iśvaravallabhā

ugradakṣā tathā cogrā akārādisvarodbhavā /
ṛkāravarṇakūṭasthā ṝkārasvarabhūṣitā

ekārā ca tathā caikā ekārākṣaravāsitā /
aiṣṭā caiṣā tathā cauṣā aukārākṣaradhāriṇī

aṃ aḥkārasvarūpā ca sarvāgamasugopitā /
ityetat kathitaṃ devi tārānāmasahasrakam

ya idaṃ paṭhati stotraṃ pratyahaṃ bhaktibhāvataḥ /
divā vā yadi vā rātrau sandhyayorubhayorapi

stavarājasya pāṭhena rājā bhavati kiṅkaraḥ /
sarvāgameṣu pūjyaḥ syāt sarvatantre svayaṃ haraḥ

śivasthāne śmaśāne ca śūnyāgāre catuṣpathe /
ya paṭhecchṛṇuyād vāpi sa yogī nātra saṃśayaḥ

yāni nāmāni santyasmin prasaṅgād muravairiṇaḥ /
grāhyāṇi tāni kalyāṇi nānyānyapi kadācana

harernāma na gṛhṇīyād na spṛśet tulasīdalam /
nānyacintā prakartavyā nānyanindā kadācana

sindūrakaravīrādyaiḥ puṣpairlohitakaistathā /
yo'rcayed bhaktibhāvena tasyāsādhyaṃ na kiñcana

vātastambhaṃ jalastambhaṃ gatistambhaṃ vivasvataḥ /
vahneḥ stambhaṃ karotyeva stavasyāsya prakīrtanāt

śriyamākarṣayet tūrṇamānṛṇyaṃ jāyate haṭhāt /
yathā tṛṇaṃ dahed vahnistathārīn mardayet kṣaṇāt

mohayed rājapatnīśca devānapi vaśaṃ nayet /
yaḥ paṭhet śṛṇuyād vāpi ekacittena sarvadā

dīrghāyuśca sukhī vāgmī vāṇī tasya vaśaṅkarī /
sarvatīrthābhiṣekeṇa gayāśrāddhena yat phalam

tatphalaṃ labhate satyaṃ yaḥ paṭhedekacittataḥ /
yeṣāmārādhane śraddhā ye tu sādhitumudyatāḥ

teṣāṃ kṛtitvaṃ sarvaṃ syād gatirdevi parā ca sā /
ṛtuyuktalatāgāre sthitvā daṇḍena tāḍayet

japtvā stutvā ca bhaktyā ca gacched vai tāriṇīpadam /
aṣṭamyāṃ ca caturdaśyāṃ navamyāṃ śanivāsare

saṅkrāntyāṃ maṇḍale rātrau amāvāsyāṃ ca yo'rcayet /
varṣaṃ vyāpya ca deveśi tasyādhīnāśca siddhayaḥ

sutahīnā ca yā nārī daurbhāgyāmayapīḍitā /
vandhyā vā kākavandhyā vā mṛtagarbhā ca yāṅganā

dhanadhānyavihīnā ca rogaśokākulā ca yā /
sāpi caitad mahādevi bhūrjapatre likhettataḥ

savye bhuje ca badhnīyāt sarvasaukhyavatī bhavet /
evaṃ pumānapi prāyo duḥkhena paripīḍitaḥ

sabhāyāṃ vyasane ghore vivāde śatrusaṅkaṭe /
caturaṅge ca tathā yuddhe sarvatrāriprapīḍite

smaraṇādeva kalyāṇi saṅkṣayaṃ yānti dūrataḥ /
pūjanīyaṃ prayatnena śūnyāgāre śivālaye

bilvamūle śmaśāne ca taṭe vā kulamaṇḍale /
śarkarāsavasaṃyuktairbhaktairdugdhaiḥ sapāyasaiḥ

apūpāpiṣṭasaṃyuktairnaivedyaiśca yathocitaiḥ /
niveditaṃ ca yaddravyaṃ bhoktavyaṃ ca vidhānataḥ

tanna ced bhujyate mohād bhoktuṃ necchanti devatāḥ /
anenaiva vidhānena yo'rcayet parameśvarīm

sa bhūmivalaye devi sākṣādīśo na saṃśayaḥ /
mahāśaṅkhena deveśi sarvaṃ kāryaṃ japādikam

kulasarvasvakasyaivaṃ prabhāvo varṇito mayā /
na śakyate samākhyātuṃ varṣakoṭiśatairapi

kiñcid mayā ca cāpalyāt kathitaṃ parameśvari /
janmāntarasahasreṇa varṇituṃ naiva śakyate

kulīnāya pradātavyaṃ tārābhaktiparāya ca /
anyabhaktāya no deyaṃ vaiṣṇavāya viśeṣataḥ

kulīnāya mahecchāya bhaktiśraddhāparāya ca /
mahātmane sadā deyaṃ parīkṣitaguṇāya ca

nābhaktāya pradātavyaṃ pathyantaraparāya ca /
na deyaṃ devadeveśi gopyaṃ sarvāgameṣu ca

pūjājapavihīnāya strīsurānindakāya ca /
na stavaṃ darśayet kvāpi sandarśya śivahā bhavet

paṭhanīyaṃ sadā devi sarvāvasthāsu sarvadā /
yaḥ stotraṃ kulanāyike pratidinaṃ bhaktyā paṭhed mānavaḥ
sa syādvittacayairdhaneśvarasamo vidyāmadairvākpatiḥ /
saundaryeṇa ca mūrtimān manasijaḥ kīrtyā ca nārāyaṇaḥ
śaktyā śaṅkara eva saukhyavibhavairbhūmeḥ patirnānyathā

iti te kathitaṃ guhyaṃ tārānāmasahasrakam /
asmāt parataraṃ stotraṃ nāsti tantreṣu niścayaḥ

iti śrībṛhannīlatantre bhairavabhairavīsaṃvāde tārāsahasranāmanirūpaṇaṃ
aṣṭādaśaḥ paṭalaḥ //