svarūpānusandhānāṣṭakam · Chapter 1

tapoyajñadānādibhiḥ śuddhabuddhi-
rvirakto nṛpādeḥ pade tucchabuddhyā .
parityajya sarvaṃ yadāpnoti tattvaṃ
paraṃ brahma nityaṃ tadevāhamasmi .. १..
dayāluṃ guruṃ brahmaniṣṭhaṃ praśāntaṃ
samārādhya matyā vicārya svarūpam .
yadāpnoti tattvaṃ nididhyāsa vidvān-
paraṃ brahma nityaṃ tadevāhamasmi .. २..
yadānandarūpaṃ prakāśasvarūpaṃ
nirastaprapañcaṃ paricchedahīnam .
ahaṃbrahmavṛttyaikagamyaṃ turīyaṃ
paraṃ brahma nityaṃ tadevāhamasmi .. ३..
yadajñānato bhāti viśvaṃ samastaṃ
vinaṣṭaṃ ca sadyo yadātmaprabodhe .
manovāgatītaṃ viśuddhaṃ vimuktaṃ
paraṃ brahma nityaṃ tadevāhamasmi .. ४..
niṣedhe kṛte neti netīti vākyaiḥ
samādhisthitānāṃ yadābhāti pūrṇam .
avasthātrayātītamadvaitamekaṃ
paraṃ brahma nityaṃ tadevāhamasmi .. ५..
yadānandaleśaiḥ samānandi viśvaṃ
yadābhāti sattve tadābhāti sarvam .
yadālokane rūpamanyatsamastaṃ
paraṃ brahma nityaṃ tadevāhamasmi .. ६..
anantaṃ vibhuṃ nirvikalpaṃ nirīhaṃ
śivaṃ saṅgahīnaṃ yadoṅkāragamyam .
nirākāramatyujjvalaṃ mṛtyuhīnaṃ
paraṃ brahma nityaṃ tadevāhamasmi .. ७..
yadānanda sindhau nimagnaḥ pumānsyā-
davidyāvilāsaḥ samastaprapañcaḥ .
tadā naḥ sphuratyadbhutaṃ yannimittaṃ
paraṃ brahma nityaṃ tadevāhamasmi .. ८..
svarūpānusandhānarūpāṃ stutiṃ yaḥ
paṭhedādarādbhaktibhāvo manuṣyaḥ .
śruṇotīha vā nityamudyuktacitto
bhavedviṣṇuratraiva vedapramāṇāt .. ९..
iti śrīmatparamahaṃsaparivrājakācāryasya
śrīgovindabhagavatpūjyapādaśiṣyasya
śrīmacchaṅkarabhagavataḥ kṛtau
svarūpānusandhānāṣṭakam saṃpūrṇam ..