śrīrāmacandrāṣṭakam · Chapter 1

ॐ cidākāro dhātā paramasukhadaḥ pāvanatanur
munīndrairyogīndrairyatipatisurendrairhanumatā /
sadā sevyaḥ pūrṇo janakatanayāṅgaḥ suragurū
ramānātho rāmo ramatu mama citte tu satatam

mukundo govindo janakatanayālālitapadaḥ
padaṃ prāptā yasyādhamakulabhavā cāpi śabarī /
girātīto'gamyo vimaladhiṣaṇairvedavacasā
ramānātho rāmo ramatu mama citte tu satatam

dharādhīśo'dhīśaḥ suranaravarāṇāṃ raghupatiḥ
kirīṭī keyūrī kanakakapiśaḥ śobhitavapuḥ /
samāsīnaḥ pīṭhe raviśatanibhe śāntamanaso
ramānātho rāmo ramatu mama citte tu satatam

vareṇyaḥ śāraṇyaḥ kapipatisakhaścāntavidhuro
lalāṭe kāśmīro ruciragatibhaṅgaḥ śaśimukhaḥ /
narākāro rāmo yatipatinutaḥ saṃsṛtiharo
ramānātho rāmo ramatu mama citte tu satatam

virūpākṣaḥ kāśyāmupadiśati yannāma śivadaṃ
sahasraṃ yannāmnāṃ paṭhati girijā pratyuṣasi vai /
svaloke gāyantīśvaravidhimukhā yasya caritaṃ
ramānātho rāmo ramatu mama citte tu satatam

paro dhīro'dhīro'surakulabhavaścāsuraharaḥ
parātmā sarvajño narasuragaṇairgītasuyaśāḥ /
ahalyāśāpaghnaḥ śarakaraṛjuḥkauśikasakho
ramānātho rāmo ramatu mama citte tu satatam

hṛṣīkeśaḥ śaurirdharaṇidharaśāyī madhuripur
upendro vaikuṇṭho gajaripuharastuṣṭamanasā /
balidhvaṃsī vīro daśarathasuto nītinipuṇo
ramānātho rāmo ramatu mama citte tu satatam

kaviḥ saumitrīḍyaḥ kapaṭamṛgaghātī vanacaro
raṇaślāghī dānto dharaṇibharahartā suranutaḥ /
amānī mānajño nikhilajanapūjyo hṛdiśayo
ramānātho rāmo ramatu mama citte tu satatam

idaṃ rāmastotraṃ varamamaradāsena racitam
uṣaḥkāle bhaktyā yadi paṭhati yo bhāvasahitam /
manuṣyaḥ sa kṣipraṃ janimṛtibhayaṃ tāpajanakaṃ
parityajya śrīṣṭhaṃ raghupatipadaṃ yāti śivadam

// iti śrīmadrāmadāsapūjyapādaśiṣyaśrīmaddhaṃ
sadāsaśiṣyeṇāmaradāsākhyakavinā viracitaṃ
śrīrāmacandrāṣṭakaṃ samāptam ||