śrīkamalajadayitāṣṭakam · Chapter 1

// śrīkamalajadayitāṣṭakam //
śrīśivābhinavanṛsiṃhabhāratīsvāmiviracitam
śṛṅgakṣmābhṛnnivāse śukamukhamunibhiḥ sevyamānāṅghripadme
svāṅgacchāyāvidhūtāmṛtakarasurarāḍvāhane vāksavitri /
śambhuśrīnāthamukhyāmaravaranikarairmodataḥ pūjyamāne
vidyāṃ śuddhāṃ ca buddhiṃ kamalajadayite satvaraṃ dehi mahyam

kalpādau pārvatīśaḥ pravarasuragaṇaprārthitaḥ śrautavartma
prābalyaṃ netukāmo yativaravapuṣāgatya yāṃ śṛṅagaśaile /
saṃsthāpyārcāṃ pracakre bahuvidhanatibhiḥ sā tvamindvardhacūḍā
vidyāṃ śuddhāṃ ca buddhiṃ kamalajadayite satvaraṃ dehi mahyam

pāpaughaṃ dhvaṃsayitvā bahujaniracitaṃ kiṃ ca puṇyālimārā-
tsampādyāstikyabuddhiṃ śrutiguruvacaneṣvādaraṃ bhaktidārḍhyam /
devācāryadvijādiṣvapi manunivahe tāvakīne nitāntaṃ
vidyāṃ śuddhāṃ ca buddhiṃ kamalajadayite satvaraṃ dehi mahyam

vidyāmudrākṣamālāmṛtaghaṭavilasatpāṇipāthojajāle
vidyādānapravīṇe jaḍabadhiramukhebhyo'pi śīghraṃ natebhyaḥ /
kāmādīnāntarānmatsahajaripuvarāndevi nirmūlya vegāt
vidyāṃ śuddhāṃ ca buddhiṃ kamalajadayite satvaraṃ dehi mahyam

karmasvātmociteṣu sthirataradhiṣaṇāṃ dehadārḍhyaṃ tadarthaṃ
dīrghaṃ cāyuryaśaśca tribhuvanaviditaṃ pāpamārgādviraktim /
satsaṅgaṃ satkathāyāḥ śravaṇamapi sadā devi datvā kṛpābdhe
vidyāṃ śuddhāṃ ca buddhiṃ kamalajadayite satvaraṃ dehi mahyam

mātastvatpādapadmaṃ na vividhakusumaiḥ pūjitaṃ jātu bhaktyā
gātuṃ naivāhamīśe jaḍamatiralasastvadguṇāndivyapadyaiḥ /
mūke sevāvihīne'pyanupamakaruṇāmarbhake'mbeva kṛtvā
vidyāṃ śuddhāṃ ca buddhiṃ kamalajadayite satvaraṃ dehi mahyam

śāntyādyāḥ sampado vitara śubhakarīrnityatadbhinnabodhaṃ
vairāgyaṃ mokṣavāñchāmapi laghu kalaya śrīśivāsevyamāne /
vidyātīrthādiyogipravarakarasarojātasampūjitāṅghre
vidyāṃ śuddhāṃ ca buddhiṃ kamalajadayite satvaraṃ dehi mahyam

saccidrūpātmano me śrutimanananididhyāsanānyāśu mātaḥ
sampādya svāntametadruciyutamaniśaṃ nirvikalpe samādhau /
tuṅgātīrāṅkarājadvaragṛhavilasaccakrarājāsanasthe
vidyāṃ śuddhāṃ ca buddhiṃ kamalajadayite satvaraṃ dehi mahyam

iti śrīśivābhinavanṛsiṃhabhāratīsvāmiviracitaṃ śrīkamalajadayitāṣṭakaṃ sampūrṇam /