Skanda Purana · Chapter 7.303

// īśvara uvāca // //
tato gacchenmahādevi uttare devamuttamam //
yastamārādhayeddevaṃ mahāpātakanāśanam //

tasyaiva paścime bhāge dhanuṣāṃ tritaye sthitam //
śeṣādipramukhairnāgairmahatā tapasā yutaiḥ //
samārādhya mahādevaṃ sthāpitaṃ liṃgamuttamam

yastamārādhayeddevaṃ sarpairārādhitaṃ purā //
na viṣaṃ kramate dehe tasya janmāvadhi priye

sarpāstasya prasīdanti na kuṃthaṃti kadācana //
tasmātsarvaṃ prayatnena talliṃgaṃ pūjayennaraḥ

tatra liṃgānyanekāni ṛṣibhiḥ sthāpitāni tu //
gaṃgātīre mahāpuṇye paścime varavarṇini

tāni dṛṣṭvā pūjayitvā sarvapāpaiḥ pramucyate //
aśvamedhasahasrasya phalaṃ prāpnoti mānavaḥ

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye saṃgāleśvaramāhātmya uttareśvaramāhātmyavarṇanaṃnāma tryuttaratriśatatamo'dhyāyaḥ