Skanda Purana · Chapter 5.184

śrīmārkaṇḍeya uvāca -
dhautapāpaṃ tato gacchedbhṛgutīrthasamīpataḥ /
vṛṣeṇa tu bhṛgustatra bhūyobhūyo dhutastataḥ

dhautapāpaṃ tu tattena nāmnā lokeṣu viśrutam /
tatra sthito mahādevastuṣṭyarthaṃ bhṛgusattame

tatra tīrthe tu yaḥ snātvā śāṭhyenāpi nareśvara /
mucyate sarvapāpebhyo nātra kāryā vicāraṇā

yastu samyagvidhānena tatra snātvārcayecchivam /
devānpitṝnsamabhyarcya mucyate sarvapātakaiḥ

brahmahatyā gavāṃ vadhyā tatra tīrthe yudhiṣṭhira /
praviśenna sadā bhītā praviṣṭāpi kṣayaṃ vrajet

yudhiṣṭhira uvāca -
āścaryabhūtaṃ loke'sminkathayasva dvijottama /
praviśenna brahmahatyā yathā vai dhautapāpmani

brahmahatyāsamaṃ pāpaṃ bhavitā neha kiṃcana /
kathaṃ vā dhautapāpe tu praviṣṭaṃ naśyate dvija /
etadvistarataḥ sarvaṃ pṛcchāmi vada kautukāt

mārkaṇḍeya uvāca -
ādisarge purā śambhurbrahmaṇaḥ parameṣṭhinaḥ /
vikāraṃ pañcamaṃ dṛṣṭvā śiro'śvamukhasannibham

aṅguṣṭhāṅguliyogena tacchirastena kṛntitam /
kṛttamātre tu śirasi brahmahatyā'bhavattadā

brahmahatyāyutaścāsīduttare narmadātaṭe /
dhunitaṃ tu yato rājanvṛṣeṇa dharmamūrtinā

tatra dhauteśvarīṃ devīṃ sthāpitāṃ vṛṣabheṇa tu /
dadarśa bhagavāñchambhuḥ sarvadaivatapūjitām

dṛṣṭvā dhauteśvarīṃ durgāṃ brahmahatyāvināśinīm /
tatra viśramamāṇaśca śaṅkarastripurāntakaḥ

sa śaṅkaro brahmahatyāvihīnaṃ mene tmānaṃ tasya tīrthasya bhāvāt /
suvismito devadevo vareṇyo dṛṣṭvā dūre brahmahatyāṃ ca tīrthāt

vidhautapāpaṃ mahitaṃ dharmaśaktyā viśenna hatyā devībhayātprabhītā /
raktāmbarā raktamālyopayuktā kṛṣṇā nārī raktadāmaprasaktā

māṃ vāñchantī skandhadeśaṃ rahasye dūre sthitā tīrthavaryaprabhāvāt /
saṃcintya devo manasā smarārirvāsāya buddhiṃ tatra tīrthe cakāra

vimṛśya devo bahuśaḥ sthitaḥ svayaṃ vidhautapāpaḥ prathitaḥ pṛthivyām /
babhūva tatraiva nivāsakārī vidhūtapāpanikaṭapradeśe

tadāprabhṛti rājendra brahmahatyāvināśanam /
vidhautapāpaṃ tattīrthaṃ narmadāyāṃ vyavasthitam

āśvayukśuklanavamī tatra tīrthe viśiṣyate /
dinatrayaṃ tu rājendra saptamyādiviśeṣataḥ

samupoṣyāṣṭamīṃ bhaktyā sāṅgaṃ vedaṃ paṭhettu yaḥ /
ahorātreṇa caikena ṛgyajuḥsāmasaṃjñakam

abhyasanbrahmahatyāyā mucyate nātra saṃśayaḥ /
vṛṣalīgamanaṃ caiva yaśca gurvaṅganāgamaḥ

snātvā brahmarasotkṛṣṭe kumbhenaiva pramucyate /
vandhyā strījananī yā tu kākavandhyā mṛtaprajā

sāpi kumbhodakaiḥ snātā jīvatputrā prajāvatī /
apaṭhastu naropoṣya ṛgyajuḥsāmasambhavām

ṛcamekāṃ japanviprastathā parvaṇi yo nṛpa /
anṛcopoṣya gāyatrīṃ japedvai vedamātaram

japannavamyāṃ viprendro mucyate pāpasañcayāt /
evaṃ tu kathitaṃ tāta purāṇoktaṃ maharṣibhiḥ

dhautapāpaṃ mahāpuṇyaṃ śivena kathitaṃ mama /
prāṇatyāgaṃ tu yaḥ kuryājjale vāgnau sthale'pi vā

sa gacchati vimānena jvalanārkasamaprabhaḥ /
haṃsabarhiprayuktena sevyamāno'psarogaṇaiḥ

śivasya paramaṃ sthānaṃ yatsurairapi durlabham /
krīḍate svecchayā tatra yāvaccandrārkatārakam

dhautapāpe tu yā nārī kurute prāṇasaṃkṣayam /
tatkṣaṇādeva sā pārtha puruṣatvamavāpnuyāt

atha kiṃ bahunoktena śubhaṃ vā yadi vāśubham /
tadakṣayaphalaṃ sarvaṃ dhautapāpe kṛtaṃ nṛpa

saṃnyasenniyamenānnaṃ saṃnyasedviṣayādikam /
phalamūlādikaṃ caiva jalamekaṃ na saṃtyajet

evaṃ yaḥ kurute pārtha rudralokaṃ sa gacchati /
tatra bhuktvākhilānbhogāñjāyate bhuvi bhūpatiḥ

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe
revākhaṇḍe dhautapāpatīrthamāhātmyavarṇanaṃ nāma caturaśītyuttaraśatatamo'dhyāyaḥ //
asya pṛṣṭhasya sāmagrī hetu nimnalikhita srotasya pāṭhasya upayogaḥ kṛtaṃ bhavati --