Skanda Purana · Chapter 5.118

śrīmārkaṇḍeya uvāca -
tato gacchettu rājendra tīrthaṃ paramaśobhanam /
indratīrthetivikhyātaṃ narmadādakṣiṇe taṭe

yudhiṣṭhira uvāca -
narmadādakṣiṇe kūle indratīrthaṃ kathaṃ bhavet /
śrotumicchāmi viprendra hyādimadhyāntavistaraiḥ

etacchrutvā tu vacanaṃ dharmaputrasya dhīmataḥ /
kathayāmāsa tadvattamitihāsaṃ purātanam

śrīmārkaṇḍeya uvāca -
viśvāsayitvā suciraṃ dharmaśatruṃ mahābalam /
vṛtraṃ jitvātha hatvā tu gacchamānaṃ śacīpatim

niṣkrāmamāṇaṃ mārgeṇa brahmahatyā durāsadā /
ahorātramaviśrāntā jagāma bhuvanatrayam

yatoyato brahmahaṇaṃ yāti yānena śobhanam /
diśo bhāgaṃ suraiḥ sārddhaṃ tato hatyā na muñcati

brahmahatyā surāpānaṃ steyaṃ gurvaganāgamaḥ /
pātakānāṃ gatirdṛṣṭā na tu viśvāsaghātinām

pāpakarmamukhaṃ dṛṣṭvā snānadānairviśudhyati /
nārī vā puruṣo vāpi naiva viśvāsaghātinaḥ

evamādīni cānyāni śrutvā vākyāni devarāṭ /
vacanaṃ tadvidhairuktaṃ viṣādamagamatparam

tyaktvā rājyaṃ suraiḥ sārdhaṃ jagāma tapa uttamam /
putradāragṛhaṃ rājyaṃ vasūni vividhāni ca

phalānyetāni dharmasya śobhayanti janeśvaram /
phalaṃ dharmasya bhuñjeti suhṛtsvajanabāndhavāḥ

paśyatāṃ sarvameteṣāṃ pāpamekena bhujyate /
paraṃ hi sukhamutsṛjya karśayanvai kalevaram

devarājo jagāmāsau tīrthānyāyatanāni ca /
gaṅgātīrtheṣu sarveṣu yāmuneṣu tathaiva ca

sārasvateṣu sarveṣu sāmudreṣu pṛthakpṛthak /
nadīṣu devakhāteṣu taḍāgeṣu saraḥsu ca

pāpaṃ na muñcate sarve paścāddevasamāgame /
revāprabhavatīrtheṣu kūlayorubhayorapi

pūjayanvai mahādevaṃ skandatīrthaṃ samāsadat /
tava sthitvopavāsaiśca kṛcchracāndrāyaṇādibhiḥ

karśayanvai svakaṃ dehaṃ na lebhe śarma vai kvacit /
grīṣme pañcāgnimadhyastho varṣāsu sthaṇḍileśayaḥ

ārdravāsāstu hemante cacāra vipulaṃ tapaḥ /
evaṃ tu tapatastasya indrasya viditātmanaḥ

vatsarāṇāṃ sahasrāṇi gatāni daśa bhārata /
tatastvekādaśe prāpte varṣe tu nṛpasattama

sahasā bhagavāndevastu tutoṣa parameśvaraḥ /
tathā brahmarṣayaḥ siddhā brahmaviṣṇupurogamāḥ

tatrājagmuḥ surāḥ sarve yatra devaḥ śatakratuḥ /
dṛṣṭvā samāgatān devānṛṣīṃścaiva mahāmatiḥ

uvāca praṇato bhūtvā sarvadevapurohitaḥ /
viditaṃ sarvameteṣāṃ yathā vṛtravadhaḥ kṛtaḥ

yuṣmākaṃ cājñayā pūrvaṃ brahmaviṣṇumaheśvarāḥ /
tathāpyevaṃ brahmahaṇaṃ matvā pāpasya kāriṇam

bhramantaṃ sarvatīrtheṣu brahmahatyā na muñcati /
na nandati jagatsarvaṃ trailokyaṃ sacarācaram

yathā vihīnacandrārkaṃ tathā rājyamanāyakam /
tasmātsarve suraśreṣṭhā vijñāpyaṃ mama samprati

kurvantu śakraṃ nirdoṣaṃ tathā sarve maharṣayaḥ /
bṛhaspatimukhodgīrṇaṃ śrutvā tadvacanaṃ śubham

tataḥ provāca bhagavānbrahmā lokapitāmahaḥ /
etatpāpaṃ mahāghoraṃ brahmahatyāsamudbhavam

daivatebhyo'tha bhūtebhyaścaturbhāgaṃ kṣipāmyaham /
evaṃ muktvā kṣipaccaino jalopari mahāmatiḥ

avagāhya tataḥ peyā āpo vai nānyathā budhaiḥ /
dharāyāmakṣipadbhāgaṃ dvitīyaṃ padmasaṃbhavaḥ

abhakṣyā tena saṃjātā sadākālaṃ vasuṃdharā /
tadārdhamarddhaṃ nārīṇāṃ dvitīye'hni yudhiṣṭhira

nikṣipya bhagavāndevaḥ punaranyajjagāda ha /
asaṃgrāhyā tvasaṃgrāhyā tena jātā rajasvalā

caturdināni sā prājñaiḥ pāpasya mahato mahāt /
caturthaṃ tu tato bhāgaṃ vibhajya parameśvaraḥ

kṛṣigorakṣyavāṇijyaiḥ śūdrasevākare dvije /
tato'bhinandayāmāsuḥ sarve devā maharṣayaḥ

devendraṃ vāgbhiriṣṭābhirnarmadājalasaṃsthitam /
vareṇa chandayāmāsa tatastuṣṭo maheśvaraḥ

varaṃ dāsyāmi deveśa varaṃ vṛṇu yathepsitam

indra uvāca -
yadi tuṣṭo'si deveśa yadi deyo varo mama /
atra saṃsthāpayiṣyāmi sadā saṃnihito bhava

evamastviti coktvā taṃ brahmaviṣṇumaheśvarāḥ /
jagmurākāśamāviśya stūyamānā maharṣibhiḥ

gateṣu devadeveṣu devarājaḥ śatakratuḥ /
sthāpayitvā mahādevaṃ jagāma tridaśālayam

indratīrthe tu yaḥ snātvā tarpayetpitṛdevatāḥ /
mahāpātakayukto'pi mucyate sarvapātakaiḥ

indratīrthe tu yaḥ snātvā pūjayetparameśvaram /
so'śvamedhasya yajñasya puṣkalaṃ phalamaśnute

etatte kathitaṃ sarvaṃ tīrthamāhātmyamuttamam /
śrutamātreṇa yenaiva mucyante pātakairnarāḥ

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe indratīrthamāhātmyavarṇanaṃ nāmāṣṭādaśottaraśatatamo'dhyāyaḥ //