Skanda Purana · Chapter 5.108

śrīmārkaṇḍeya uvāca -
tato gacchenmahīpāla rohiṇītīrthamuttamam /
vikhyātaṃ triṣu lokeṣu sarvapāpaharaṃ param

yudhiṣṭhira uvāca -
rohiṇītīrthamāhātmyaṃ sarvapāpapraṇāśanam /
śrotumicchāmi tattvena tanme tvaṃ vaktumarhasi

śrīmārkaṇḍeya uvāca -
tasminnekārṇave ghore naṣṭe sthāvarajaṅgame /
udadhau ca śayānasya devadevasya cakriṇaḥ

nābhau samutthitaṃ padmaṃ ravimaṇḍalasannibham /
karṇikākesaropetaṃ patraiśca samalaṃkṛtam

tatra brahmā samutpannaścaturvadanapaṅkajaḥ /
kiṃ karomīti deveśa ājñā me dīyatāṃ prabho

evamuktastu deveśaḥ śaṅkhacakragadādharaḥ /
uvāca madhurāṃ vāṇīṃ tadā devaṃ pitāmaham

sarasvatyāṃ mahābāho lokaṃ kuru mamājñayā /
bhūtagrāmamaśeṣasya utpādanavidhikṣayam

etacchrutaṃ tu vacanaṃ padmanābhasya bhārata /
cintayāmāsa bhagavānsaptarṣīnhitakāmyayā

kramātte cintitāḥ prājñāḥ pulastyaḥ pulahaḥ kratuḥ /
prācetaso vasiṣṭhaśca bhṛgurnārada eva ca

yajñe prācetaso dakṣo mahātejāḥ prajāpatiḥ /
dakṣasyāpi tathā jātāḥ pañcāśadduhitaro'nagha

dadau sa daśa dharmāya kaśyapāya trayodaśa /
tathaiva sa mahābhāgaḥ saptaviṃśatimindave

rohiṇīnāma yā tāsāṃ madhye tasya narādhipa /
aniṣṭā sarvanārīṇāṃ bhartuścaiva viśeṣataḥ

tataḥ sā paramaṃ kṛtvā vairāgyaṃ nṛpasattama /
āgatya narmadātīre cacāra vipulaṃ tapaḥ

ekarātraistrirātraiśca ṣaḍdvādaśabhireva ca /
pakṣamāsopavāsaiśca karśayanti kalevaram

ārādhayantī satataṃ mahiṣāsuranāśinīṃ /
devīṃ bhagavatīṃ tāta sarvārtivinivāraṇīm

snātvā snātvā jale nityaṃ narmadāyāḥ śucismitā /
tatastuṣṭā mahābhāgā devī nārāyaṇī nṛpa

prasannā te mahābhāge vratena niyamena ca /
etacchrutvā tu vacanaṃ rohiṇī śaśinaḥ priyā

yathā bhavāmi na cirāttathā bhavatu mānade /
evamastviti sā coktvā bhavānī bhaktavatsalā

stūyamānā munigaṇaistatraivāntaradhīyata /
tadāprabhṛti tattīrthaṃ rohiṇī śaśinaḥ priyā

saṃjātā sarvakālaṃ tu vallabhā nṛpasattama /
tatra tīrthe tu yā nārī naro vā snāni bhaktitaḥ

vallabhā jāyate sā tu bharturvai rohiṇī yathā /
tatra tīrthe tu yaḥ kaścitprāṇatyāgaṃ karoti vai

saptajanmāni dāmpatyaviyogo na bhavetkvacit

// iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe rohiṇīsomanāthatīrthamāhātmyavarṇanaṃ nāmāṣṭottaraśatatamo'dhyāyaḥ //