Scripture Library

Shiva Purana · Verses 7.7-2

7.7-2.7.1,7.1

munaya ūcuḥ
kālādutpadyate sarvaṃ kāladeva vipadyate

7.7-2.7.1,7.1

na kālanirapekṣaṃ hi kvacitkiṃcana vidyate

7.7-2.7.1,7.2

yadāsyāṃtargataṃ viśvaṃ śaśvatsaṃsāramaṇḍalam

7.7-2.7.1,7.2

sargasaṃhṛtimudrābhyāṃ cakravatparivartate

7.7-2.7.1,7.3

brahmā hariśca rudraśca tathānye ca surāsurāḥ

7.7-2.7.1,7.3

yatkṛtāṃ niyatiṃ prāpya prabhavo nātivartitum

7.7-2.7.1,7.4

bhūtabhavyabhaviṣyādyairvibhajya jarayan prajāḥ

7.7-2.7.1,7.4

atiprabhuriti svairaṃ vartate 'tibhayaṃkaraḥ

7.7-2.7.1,7.5

ka eṣa bhagavān kālaḥ kasya vā vaśavartyayam

7.7-2.7.1,7.5

ka evāsya vaśe na syātkathayaitadvicakṣaṇa

7.7-2.7.1,7.6

vāyuruvāca
kālakāṣṭhānimeṣādikalākalitavigraham

7.7-2.7.1,7.6

kālātmeti samākhyātaṃ tejo māheśvaraṃ param

7.7-2.7.1,7.7

yadalaṃghyamaśeṣasya sthāvarasya carasya ca

7.7-2.7.1,7.7

niyogarūpamīśasya balaṃ viśvaniyāmakam

7.7-2.7.1,7.8

tasyāṃśāṃśamayī muktiḥ kālātmani mahātmani

7.7-2.7.1,7.8

tato niṣkramya saṃkrāṃtā visṛṣṭāgrerivāyasī

7.7-2.7.1,7.9

tasmātkālavaśe viśvaṃ na sa viśvavaśe sthitaḥ

7.7-2.7.1,7.9

śivasya tu vaśe kālo na kālasya vaśe śivaḥ

7.7-2.7.1,7.10

yato 'pratihataṃ śārvaṃ tejaḥ kāle pratiṣṭhitam

7.7-2.7.1,7.10

mahatī tena kālasya maryādā hi duratyayā

7.7-2.7.1,7.11

kālaṃ prajñāviśeṣeṇa ko 'tivartitumarhati

7.7-2.7.1,7.11

kālena tu kṛtaṃ karma na kaścidativartate

7.7-2.7.1,7.12

ekacchatrāṃ mahīṃ kṛtsnāṃ ye parākramya śāsati

7.7-2.7.1,7.12

te 'pi naivātivartaṃte kālavelāmivābdhayaḥ

7.7-2.7.1,7.13

ye nigṛhyeṃdriyagrāmaṃ jayaṃti sakalaṃ jagat

7.7-2.7.1,7.13

na jayaṃtyapi te kālaṃ kālo jayati tānapi

7.7-2.7.1,7.14

āyurvedavido vaidyāstvanuṣṭhitarasāyanāḥ

7.7-2.7.1,7.14

na mṛtyumativartaṃte kālo hi duratikramaḥ

7.7-2.7.1,7.15

śriyā rūpeṇa śīlena balena ca kulena ca

7.7-2.7.1,7.15

anyacciṃtayate jaṃtuḥ kālo 'nyatkurute balāt

7.7-2.7.1,7.16

apriyaiśca priyaiścaiva hyaciṃtitagamāgamaiḥ

7.7-2.7.1,7.16

saṃyojayati bhūtāni viyojayati ceśvaraḥ

7.7-2.7.1,7.17

yadaiva duḥkhitaḥ kaścittadaiva sukhitaḥ paraḥ

7.7-2.7.1,7.17

durvijñeyasvabhāvasya kālāsyāho vicitratā

7.7-2.7.1,7.18

yo yuvā sa bhavedvṛddho yo balīyānsa durbalaḥ

7.7-2.7.1,7.18

yaḥ śrīmānso 'pi niḥśrīkaḥ kālaścitragatirdvijā

7.7-2.7.1,7.19

nābhijātyaṃ na vai śīlaṃ na balaṃ na ca naipuṇam

7.7-2.7.1,7.19

bhavetkāryāya paryāptaṃ kālaśca hyanirodhakaḥ

7.7-2.7.1,7.20

ye sanāthāśca dātāro gītavādyairupasthitāḥ

7.7-2.7.1,7.20

ye cānāthāḥ parānnādāḥ kālasteṣu samakriyaḥ

7.7-2.7.1,7.21

phalaṃtyakāle na rasāyanāni samyakprayuktānyapi cauṣadhāni

7.7-2.7.1,7.21

tānyeva kālena samāhṛtāni siddhiṃ prayāṃtyāśu sukhaṃ diśaṃti

7.7-2.7.1,7.22

nākālato 'yaṃ mriyate jāyate vā nākālataḥ puṣṭimagryāmupaiti

7.7-2.7.1,7.22

nākālataḥ sukhitaṃ duḥkhitaṃ vā nākālikaṃ vastu samasti kiṃcit

7.7-2.7.1,7.23

kālena śītaḥ prativāti vātaḥkālena vṛṣṭirjaladānupaiti

7.7-2.7.1,7.23

kālena coṣmā praśamaṃ prayāti kālena sarvaṃ saphalatvameti

7.7-2.7.1,7.24

kālaśca sarvasya bhavasya hetuḥ kālena sasyāni bhavaṃti nityam

7.7-2.7.1,7.24

kālena sasyāni layaṃ prayāṃti kālena saṃjīvati jīvalokaḥ

7.7-2.7.1,7.25

itthaṃ kālātmanastattvaṃ yo vijānāti tattvataḥ

7.7-2.7.1,7.25

kālātmānamatikramya kālātītaṃ sa paśyati

7.7-2.7.1,7.26

na yasya kālo na ca baṃdhamuktī na yaḥ pumānna prakṛtirna viśvam

7.7-2.7.1,7.26

vicitrarūpāya śivāya tasmai namaḥparasmai parameśvarāya

iti śrīśivamahāpurāṇe saptamyāṃ vāyavīyasaṃhitāyāṃ pūrvakhaṇḍe kālamahimavarṇanaṃ nāma saptamo 'dhyāyaḥ

Original text: śivapurāṇam · Sanskrit Wikisource contributors · Sanskrit Wikisource · CC BY-SA 4.0