Shatapatha Brahmana · Chapter 13.1.8

prajāpatiraśvamedhamasṛjata sa sṛṣṭaḥ prarcamavlīnātpra sāma taṃ vaiśvadevānyudayacchanyadvaiśvadevāni juhotyaśvamedhasyaivodyatyai -

kāya svāhā kasmai svāhā katamasmai svāheti prājāpatyaṃ mukhyaṃ karoti prajāpatimukhābhirevainaṃ devatābhirudyacchati -

svāhā''dhimādhītāya svāhā manaḥ prajāpataye svāhā cittaṃ vijñātāyeti yadeva pūrvāsāṃ brāhmaṇaṃ tadatra -

adityai svāhā adityai mahyai svāhā'dityai sumṛḍīkāyai svāhetīyaṃ vā'aditiranayaivainamudyacchati -

sarasvatyai svāhā sarasvatyai pāvakāyai svāhā sarasvatyai bṛhatyai svāheti vāgvai sarasvatī vācaivainamudyacchati -

pūṣṇe svāhā pūṣṇe prapathyāya svāhā pūṣṇe naraṃdhiṣāya svāheti paśavo vai pūṣā paśubhirevainamudyacchati -

tvaṣṭre svāhā tvaṣṭre turīpāya svāhā tvaṣṭre pururūpāya svāheti tvaṣṭā vai paśūnāṃ mithunānāṃ rūpakṛdrūpairevainamudyacchati -

viṣṇave svāhā viṣṇave nibhūyapāya svāhā viṣṇave śipiviṣṭāya svāheti yajño vai viṣṇuryajñenaivainamudyacchati viśvo devasya neturiti pūrṇāhutimuttamāṃ juhotīyaṃ vai pūrṇāhutirasyāmevāntataḥ pratitiṣṭhati -