sāvitryupaniṣat · Chapter 1

sāvitryupaniṣadvedyacitsāvitrapadojjvalam /
pratiyogivinirmuktaṃ rāmacandrapadaṃ bhaje //
sāvitryātmā pāśupataṃ paraṃ brahmāvadhūtakam /
tripurātapanaṃ devītripurā kaṭhabhāvanā //
ॐ āpyāyantu mamāṅgāni vākprāṇaścakṣuḥ śrotramatho
balamindriyāṇi ca / sarvāṇi sarvaṃ brahmopaniṣadaṃ māhaṃ brahma
nirākuryāṃ mā mā brahma nirākarodanirākaraṇamastvanirākaraṇaṃ
me'stu / tadātmani nirate ya upaniṣatsu dharmāste mayi santu te mayi
santu //
ॐ śāntiḥ śāntiḥ śāntiḥ //
hariḥ ॐ //
kaḥ savitā kā sāvitrī agnireva savitā pṛthivī sāvitrī sa
yatrāgnistatpṛthivī yatra vai pṛthivī tatrāgniste dve yonī
tadekaṃ mithunam

kaḥ savitā kā savitrī varuṇa eva savitāpaḥ sāvitrī sa yatra
varuṇastadāpo yatra vā āpastadvaruṇaste dve yonistadekaṃ
mithunam

kaḥ savitā kā sāvitrī vāyureva savitākāśaḥ sāvitrī sa yatra
vāyustadākāśo yatra vā ākāśastadvāyuste dve yonistadekaṃ
mithunam

kaḥ savitā kā sāvitrī yajña eva savitā chandāṃsi sāvitrī sa
yatra yajñastatra chandāṃsi yatra vā chandāṃsi sa yajñaste dve
yonistadekaṃ mithunam

kaḥ savitā kā sāvitrī stanayitrureva savitā vidyutsāvitrī sa
yatra stanayitrustadvidyut yatra vā vidyuttatra stanayitruste dve
yonistadekaṃ mithunam

kaḥ savitā kā sāvitrī āditya eva savitā dyauḥ sāvitrī sa
yatrādityastaddyauryatra vā dyaustadādityaste dve yonistadekaṃ
mithunam

kaḥ savitā kā sāvitrī candra eva savitā nakṣatrāṇi sāvitrī
sa yatra candrastannakṣatrāṇi yatra vā nakṣatrāṇe sa candramāste
dve yonistadekaṃ mithunam

kaḥ savitā kā sāvitrī mana eva savitā vāk sāvitrī sa yatra vā
manastadvāk yatra vā vāk tanmanaste dve yonistadekaṃ
mithunam

kaḥ savitā kā sāvitrī puruṣa eva savitā strī sāvitrī sa yatra
puruṣastatstrī yatra vā strī sa puruṣaste dve yonistadekaṃ
mithunam

sāvitryāḥ pādatrayam
tasyā eva (eṣa) prathamaḥ pādo bhūstatsaviturvareṇyamityagnirvai
vareṇyamāpo vareṇyaṃ candramā vareṇyam

tasyā eva (eṣa) dvitīyaḥ
pādo bhargamayo'pi bhuvo bhargo devasya dhīmahītyagnirvai bharga
ādityo vai bhargaścandramā vai bhargaḥ

tasyā eṣa tṛtīyaḥ pādaḥ svardhiyo yo naḥ pracodayāditi
strī caiva puruṣaśca prajanayataḥ

sāvitrīvedanaphalaṃ punarmṛtyuñjayaḥ
yo vā etāṃ sāvitrīmevaṃ veda sa punarmṛtyuṃ jayati

balātibalayorvirāṭ puruṣa ṛṣiḥ / gāyatrī chandaḥ /
gāyatrī devatā / akārokāramakārā bījādyāḥ /
kṣudhā''dinirasane viniyogaḥ / klāmityādiṣaḍaṅgam (ṣaḍaṅganyāsaḥ) /
dhyānam /
amṛtakaratalāgrau (talārdrau) sarvasaṃjīvanāḍhyā-
vaghaharaṇasudakṣau vedasāre mayūkhe /
praṇavamayavikārau bhāskarākāradehau
satatamanūbhave'haṃ tau balātibalāntau // var balātī
ॐ hrīṃ bale mahādevi hrīṃ mahābale klīṃ
caturvidhapuruṣārthasiddhiprade tatsaviturvaradātmike
hrīṃ vareṇyaṃ bhargo devasya varadātmike atibale sarvadayāmūrte
bale sarvakṣucchramopanāśini dhīmahi dhiyo yo no jāte pracuryā
(var bale sarvakṣudbhramopanāśini dhīmahi dhiyo yo no jāte pracuryaḥ)
yā pracodayādātmike praṇavaśiraskātmike huṃ phaṭ svāhā

vidyāphalam
evaṃ vidvān kṛtakṛtyo bhavati sāvitryā eva salokatāṃ
jayatītyupaniṣat

ॐ āpyāyantu mamāṅgāni vākprāṇaścakṣuḥ śrotramatho
balamindriyāṇi ca / sarvāṇi sarvaṃ brahmopaniṣadaṃ māhaṃ brahma
nirākuryāṃ mā mā brahma nirākarodanirākaraṇamastvanirākaraṇaṃ
me'stu / tadātmani nirate ya upaniṣatsu dharmāste mayi santu te mayi
santu //
ॐ śāntiḥ śāntiḥ śāntiḥ //
hariḥ ॐ tatsat //
iti sāvitryupaniṣatsamāptā //
adhikādhyayanāya