maṅkigītā · Chapter 1

[yudhiṣṭhira]
īhamānaḥ samārambhānyadi nāsādayeddhanam/
dhanatṛṣṇābhibhūtaśca kiṃ kurvansukhamāpnuyāt

[bhīṣma]
sarvasāmyamanāyāsaḥ satyavākyaṃ ca bhārata/
nirvedaścāvivitsā ca yasya syātsa sukhī naraḥ

etānyeva padānyāhuḥ pañca vṛddhāḥ praśāntaye/
eṣa svargaśca dharmaśca sukhaṃ cānuttamaṃ satām

atrāpyudāharantīmamitihāsaṃ purātanam/
nirvedānmaṅkinā gītaṃ tannibodha yudhiṣṭhira

īhamāno dhanaṃ maṅkirbhagnehaśca punaḥ punaḥ/
kena ciddhanaśeṣeṇa krītavāndamya goyugam

susambaddhau tu tau damyau damanāyābhiniḥsṛtau/
āsīnamuṣṭraṃ madhyena sahasaivābhyadhāvatām

tayoḥ samprāptayoruṣṭraḥ skandhadeśamamarṣaṇaḥ/
utthāyotkṣipya tau damyau prasasāra mahājavaḥ

hriyamāṇau tu tau damyau tenoṣṭreṇa pramāthinā/
mriyamāṇau ca samprekṣya maṅkistatrābravīdidam

na caivāvihitaṃ śakyaṃ dakṣeṇāpīhituṃ dhanam/
yuktena śraddhayā samyagīhāṃ samanutiṣṭhatā

kṛtasya pūrvaṃ cānarthairyuktasyāpyanutiṣṭhataḥ/
imaṃ paśyata saṅgatyā mama daivamupaplavam

udyamyodyamya me damyau viṣameneva gacchati/
utkṣipya kākatālīyamunmātheneva jambukaḥ

manī voṣṭrasya lambete priyau vatsatarau mama/
śuddhaṃ hi daivamevedamato naivāsti pauruṣam

yadi vāpyupapadyeta pauruṣaṃ nāma karhi cit/
anviṣyamāṇaṃ tadapi daivamevāvatiṣṭhate

tasmānnirveda eveha gantavyaḥ sukhamīpsatā/
sukhaṃ svapiti nirviṇṇo nirāśaścārthasādhane

aho samyakṣukenoktaṃ sarvataḥ parimucyatā/
pratiṣṭhatā mahāraṇyaṃ janakasya niveśanāt

yaḥ kāmānprāpnuyātsarvānyaścainānkevalāṃstyajet/
prāpanātsarvakāmānāṃ parityāgo viśiṣyate

nāntaṃ sarvavivitsānāṃ gatapūrvo'sti kaś cana/
śarīre jīvite caiva tṛṣṇā mandasya vardhate

nivartasva vivitsābhyaḥ śāmya nirvidya māmaka/
asakṛccāsi nikṛto na ca nirvidyase tano

yadi nāhaṃ vināśyaste yadyevaṃ ramase mayā/
mā māṃ yojaya lobhena vṛthā tvaṃ vittakāmuka

sañcitaṃ sañcitaṃ dravyaṃ naṣṭaṃ tava punaḥ punaḥ/
kadā vimokṣyase mūḍha dhanehāṃ dhanakāmuka

aho nu mama bāliśyaṃ yo'haṃ krīdanakastava/
kiṃ naiva jātu puruṣaḥ pareṣāṃ preṣyatāmiyāt

na pūrve nāpare jātu kāmānāmantamāpnuvan/
tyaktvā sarvasamārambhānpratibuddho'smi jāgṛmi

nūnaṃ te hṛdayaṃ kāmavajra sāramayaṃ dṛdham/
yadanarthaśatāviṣṭaṃ śatadhā na vidīryate

tyajāmi kāmatvāṃ caiva yacca kiṃ citpriyaṃ tava/
tavāhaṃ sukhamanvicchannātmanyupalabhe sukham

kāmajānāmi te mūlaṃ saṅkalpātkila jāyase/
na tvāṃ saṅkalpayiṣyāmi samūlo na bhaviṣyati

īhā dhanasya na sukhā labdhvā cintā ca bhūyasī/
labdhānāśo yathā mṛtyurlabdhaṃ bhavati vā na vā

paretya yo na labhate tato duḥkhataraṃ nu kim/
na ca tuṣyati labdhena bhūya eva ca mārgati

anutarṣula evārthaḥ svādu gāṅgamivodakam/
madvilāpanametattu pratibuddho'smi santyaja

ya imaṃ māmakaṃ dehaṃ bhūtagrāmaḥ samāśritaḥ/
sa yātvito yathākāmaṃ vasatāṃ vā yathāsukham

na yuṣmāsviha me prītiḥ kāmalobhānusāriṣu/
tasmādutsṛjya sarvānvaḥ satyamevāśrayāmyaham

sarvabhūtānyahaṃ dehe paśyanmanasi cātmanaḥ/
yoge buddhiṃ śrute sattvaṃ mano brahmaṇi dhārayan

vihariṣyāmyanāsaktaḥ sukhī lokānnirāmayaḥ/
yathā mā tvaṃ punarnaivaṃ duḥkheṣu pranidhāsyasi

tvayā hi me pranunnasya gatiranyā na vidyate/
tṛṣṇā śokaśramāṇāṃ hi tvaṃ kāmaprabhavaḥ sadā

dhananāśo'dhikaṃ duḥkhaṃ manye sarvamahattaram/
jñātayo hyavamanyante mitrāṇi ca dhanacyutam

avajñāna sahasraistu doṣāḥ kastatarādhane/
dhane sukhakalā yā ca sāpi duḥkhairvidhīyate

dhanamasyeti puruṣaṃ purā nighnanti dasyavaḥ/
kliśyanti vividhairdandairnityamudvejayanti ca

mandalolupatā duḥkhamiti buddhiṃ cirānmayā/
yadyadālambase kāmatattadevānurudhyase

atattvajño'si bālaśca dustoṣo'pūraṇo'nalaḥ/
naiva tvaṃ vettha sulabhaṃ naiva tvaṃ vettha durlabham

pātālamiva duṣpūro māṃ duḥkhairyoktumicchasi/
nāhamadya samāveṣṭuṃ śakyaḥ kāmapunastvayā

nirvedamahamāsādya dravyanāśādyadṛcchayā/
nirvṛtiṃ paramāṃ prāpya nādya kāmānvicintaye

atikleśānsahāmīha nāhaṃ budhyāmyabuddhimān/
nikṛto dhananāśena śaye sarvāṅgavijvaraḥ

parityajāmi kāmatvāṃ hitvā sarvamanogatīḥ/
na tvaṃ mayā punaḥ kāmanasyoteneva raṃsyase

kṣamiṣye'kṣamamāṇānāṃ na hiṃsiṣye ca hiṃsitaḥ/
dveṣya muktaḥ priyaṃ vakṣyāmyanādṛtya tadapriyam

tṛptaḥ svasthendriyo nityaṃ yathā labdhena vartayan/
na sakāmaṃ kariṣyāmi tvāmahaṃ śatrumātmanaḥ

nirvedaṃ nirvṛtiṃ tṛptiṃ śāntiṃ satyaṃ damaṃ kṣamām/
sarvabhūtadayāṃ caiva viddhi māṃ śaraṇāgatam

tasmātkāmaśca lobhaśca tṛṣṇā kārpaṇyameva ca/
tyajantu māṃ pratiṣṭhantaṃ sattvastho hyasmi sāmpratam

prahāya kāmaṃ lobhaṃ ca krodhaṃ pāruṣyameva ca/
nādya lobhavaśaṃ prāpto duḥkhaṃ prāpsyāmyanātmavān

yadyattyajati kāmānāṃ tatsukhasyābhipūryate/
kāmasya vaśago nityaṃ duḥkhameva prapadyate

kāmānvyudasya dhunute yatkiṃ citpuruṣo rajaḥ/
kāmakrodhodbhavaṃ duḥkhamahrīraratireva ca

eṣa brahma praviṣṭo'haṃ grīsme śītamiva hradam/
śāmyāmi parinirvāmi sukhamāse ca kevalam

yacca kāmasukhaṃ loke yacca divyaṃ mahatsukham/
tṛṣṇā kṣayasukhasyaite nārhataḥ sodaśīṃ kalām

ātmanā saptamaṃ kāmaṃ hatvā śatrumivottamam/
prāpyāvadhyaṃ brahma puraṃ rājeva syāmahaṃ sukhī

etāṃ buddhiṃ samāsthāya maṅkirnirvedamāgataḥ/
sarvānkāmānparityajya prāpya brahma mahatsukham

damya nāśa kṛte maṅkiramaratvaṃ kilāgamat/
achinatkāmamūlaṃ sa tena prāpa mahatsukham