mahāmahimānvitaṃ ādityastotram · Chapter 1

// mahāmahimānvitaṃ ādityastotram //
atha śrīmadappayyadīkṣitaviracitaṃ mahāmahimānvitaṃ ādityastotram //
vistārāyāmamānaṃ daśabhirupagato yojanānāṃ sahasraiḥ
cakre pañcāranābhitritayavati lasan nemiṣaṭke niviṣṭaḥ /
saptacchandasturaṅgāhitavahanadhuro hāyanāṃśatrivarga
vyaktākḷptākhilāṅgaḥ sphuratu mama puraḥ syandanaścaṇḍabhānoḥ

ādityairapsarobhirmunibhirahivarairgrāmaṇīyātudhānaiḥ
gandharvairvālakhilyaiḥ parivṛtadaśamāṃśasya kṛtsnaṃ rathasya /
madhyaṃ vyāpyādhitiṣṭhan maṇiriva nabhaso maṇḍalaścaṇḍaraśmeḥ
brahmajyotirvivartaḥ śrutinikaraghanībhāvarūpaḥ samindhe

nirgacchanto'rkabimbān nikhilajanibhṛtāṃ hārdanāḍīpraviṣṭāḥ
nāḍyo vasvādibṛndārakagaṇamadhunastasya nānādigutthāḥ /
varṣantastoyamuṣṇaṃ tuhinamapi jalānyāpibantaḥ samantāt
pitrādīnāṃ svadhauṣadhyamṛtarasakṛto bhānti kāntiprarohāḥ

śreṣṭhāsteṣāṃ sahasre tridivavasudhayoḥ pañcadigvyāptibhājāṃ
śubhrāṃśuṃ tārakaughaṃ śaśitanayamukhān pañca codbhāsayantaḥ /
ārogo bhrājamukhyāstribhuvanadahane saptasūryā bhavantaḥ
sarvān vyādhīn suṣumnāprabhṛtaya iha me sūryapādāḥ kṣipantu

ādityānāśritāḥ ṣaṇṇavatiguṇasahasrānvitā raśmayo'nye
māse māse vibhaktāstribhuvanabhavanaṃ pāvayantaḥ sphuranti /
yeṣāṃ bhuvyapracāre jagadavanakṛtāṃ saptaraśmyutthitānāṃ
saṃsarpe cādhimāse vratayajanamukhāḥ satkriyāḥ na kriyante

ādityaṃ maṇḍalāntaḥsphuradaruṇavapustejasā vyāptaviśvaṃ
prātarmadhyāhnasāyaṃ samayavibhajanādṛgyajussāmasevyam /
prāpyaṃ ca prāpakaṃ ca prathitamatipathijñānināmuttarasmin
sākṣād brahmetyupāsyaṃ sakalabhayaharābhyudgamaṃ saṃśrayāmi

yacchaktyā'dhiṣṭhitānāṃ tapanahimajalotsarjanādirjagatyām
ādityānāmaśeṣaḥ prabhavati niyataḥ svasvamāsādhikāraḥ /
yat prādhānyaṃ vyanakti svayamapi bhagavān dvādaśasteṣu bhūtvā
taṃ trailokyasya mūlaṃ praṇamata paramaṃ daivataṃ saptasaptim

svaḥstrīgandharvayakṣā munivarabhujagā yātudhānāśca nityaṃ
nṛttairgītairabhīśugrahanutivahanairagrataḥ sevayā ca /
yasya prītiṃ vitanvantyamitaparikarā dvādaśa dvādaśaite
hṛdyābhirvālakhilyāḥ saraṇibhaṇitibhistaṃ bhaje lokabandhum

brahmāṇḍe yasya janmoditamuṣasi parabrahmamukhyātmajasya
dhyeyaṃ rūpaṃ śirodoścaraṇapadajuṣā vyāhṛtīnāṃ trayeṇa /
tat satyaṃ brahma paśyāmyaharahamabhidhaṃ nityamādityarūpaṃ
bhūtānāṃ bhūnabhassvaḥ prabhṛtiṣu vasatāṃ prāṇasūkṣmāṃśamekam

āditye lokacakṣuṣyavahitamanasāṃ yogināṃ dṛśyamantaḥ
svacchasvarṇābhamūrtiṃ vidalitanalinodāradṛśyākṣiyugmam /
ṛksāmodgānageṣṇaṃ niratiśayalasallokakāmeśabhāvaṃ
sarvāvadyoditatvāduditasamuditaṃ brahma śambhuṃ prapadye

omityudgīthabhakteravayavapadavīṃ prāptavatyakṣare'smin
yasyopāstiḥ samastaṃ duritamapanayatvarkabimbe sthitasya /
yat pūjaikapradhānānyaghamakhilamapi ghnanti kṛcchravratāni
dhyātaḥ sarvopatāpān haratu paraśivaḥ so'yamādyo bhiṣaṅnaḥ

āditye maṇḍalārciḥ puruṣavibhidayādyantamadhyāgamātma-
nyāgopālāṅganābhyo nayanapathajuṣā jyotiṣā dīpyamānam
gāyatrīmantrasevyaṃ nikhilajanadhiyāṃ prerakaṃ viśvarūpam /
nīlagrīvaṃ trine(ṇe)traṃ śivamaniśamumāvallabhaṃ saṃśrayāmi

abhrākalpaḥ śatāṅgaḥ sthiraphaṇitimayaṃ maṇḍalaṃ raśmibhedāḥ
sāhasrāsteṣu sapta śrutibhirabhihitāḥ kiñcidūnāśca lakṣāḥ /
ekaikeṣāṃ catasrastadanu dinamaṇerādidevasya tisraḥ
kḷptāḥ tattatprabhāvaprakaṭanamahitāḥ sragdharā dvādaśaitāḥ

duḥsvapnaṃ durnimittaṃ duritamakhilamapyāmayānapyasādhyān
doṣān duḥsthānasaṃsthagrahagaṇajanitān duṣṭabhūtān grahādīn /
nirdhūnoti sthirāṃ ca śriyamiha labhate muktimabhyeti cānte
saṅkīrtya stotraratnaṃ sakṛdapi manujaḥ pratyahaṃ patyurahnām

// iti śrīmadappayyadīkṣitaviracitaśrīmadādityastotraratnam //