Mahabharata · Chapter 5.24
yathā'ttha me pāṇḍava tattathaiva kurūnkuruśreṣṭha janaṃ ca pṛcchasi /
anāmayāstāta manasvinaste kuruśreṣṭhānpṛcchasi pārtha yāṃstvam //
santyeva vṛddhāḥ sādhavo dhārtarāṣṭre santyeva pāpāḥ pāṇḍava tasya viddhi /
dadyādripubhyo'pi hi dhārtarāṣṭraḥ kuto dāyāṃllopayedbrāhmaṇānām //
yadyuṣmāsu vartate'sāvadharmya- madrugdheṣu drugdhavattanna sādhu /
mitradhruk syāddhṛtarāṣṭrasya putro yuṣmāndvipansādhuvṛttānasādhuḥ //
sa cāpi jānāti bhṛśaṃ ca tapyate śocatyantaḥ sthaviro'jātaśatro /
śṛṇoti hi brāhmaṇānāṃ sametya mitradrohaḥ pātakebhyo yarīyān //
smaranti tubhyaṃ naradeva saṅgame yuddhe ca jiṣṇośca yudhāṃ praṇetuḥ /
samuddhuṣṭe dundubhiśaṅkhaśabde gadāpāṇiṃ bhīmasenaṃ smaranti //
mādrīsutau cāpi tathā'jimadhye sarvā diśaḥ sampatantau smaranti /
senāṃ varṣantau śagvaiparajamaṃ mahārathau samare duṣprakampau //
na tveva manye puruṣasya rāja- nnanāgataṃ jñāyate yadbhaviṣyam /
tvaṃ cettathā sarvadharmopapannaḥ prāptaḥ kleśaṃ pāṇḍava kṛcchrarūpam / tvamevaitatkṛcchragataśca bhūyaḥ samīkuryāḥ prajñayā'jātaśatro //
na kāmārthaṃ santyajeyurhi dharmaṃ pāṇḍoḥ sutāḥ sarva evendrakalpāḥ /
tvamevaitatprajñayā'jātaśatro samīkuryā yena śarmāpnuyuste //
dhārtarāṣṭrāḥ pāṇḍavāḥ sṛñjayāśca ye cāpyante sanniviṣṭā narendrāḥ /
yanmāṃ bravīddhṛtarāṣṭro niśāyā- majātaśatro vacanaṃ pitā te //
sahāmātyaḥ sahaputraśca rājan sametya tāṃ vācamimāṃ nibodha //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0