Mahabharata · Chapter 5.113

ṛṣabhasya tataḥ śṛṅgaṃ nipatya dvijapakṣiṇau /
śāṇḍilīṃ brāhmaṇīṃ tatra dadṛśo taponvitām //

abhivādya suparṇastu gālavaścābhipūjya tām /
tayā ca svāgatenoktau viṣṭare sanniṣīdatuḥ //

siddhamannaṃ tayā dattaṃ balimantropabṛṃhitam /
bhuktvā tṛptāvubhau bhūmau suptau tāvanumohitau //

muhūrtātpratibuddhastu suparṇo gamanepsayā /
tāṃ dṛṣṭvā cārusarvāṅgī tāpasīṃ brahmacāriṇīm //

grahītuṃ hi manaścakre rūpātsākṣādiva śriyam . atha bhraṣṭatanūjāṅgamātmānaṃ dadṛśe khagaḥ //

māṃsapiṇḍopamo'bhūtsa mukhapādānvitaḥ khagaḥ /
gālavastaṃ tathā dṛṣṭvā vimanāḥ paryapṛcchata //

kimidaṃ bhavatā prāptamihāgamanajaṃ phalam /
vāso'yamiha kālaṃ tu kiyantaṃ nau bhaviṣyati //

kiṃ nu te manasā dhyātamaśubhaṃ dharmadūṣaṇam /
na hyayaṃ bhavataḥ svalpo vyabhicāro bhaviṣyati //

suparṇo'thābravīdvipraṃ pradhyātaṃ vai mayā dvija /
imāṃ siddhāmito netuṃ tatra yatra prajāpatiḥ //

yatra devo mahādevo yatra viṣṇuḥ sanātanaḥ /
yatra dharmaśca yajñaśca tatreyaṃ nivasediti //

so'haṃ bhagavatīṃ yāce praṇataḥ priyakāmyayā /
mayaitannāma pradhyātaṃ manasā śocasā kila //

tadevaṃ bahumānātte mayehānīpsitaṃ kṛtam /
sukṛtaṃ duṣkṛtaṃ vā tvaṃ māhātmyātkṣantumarhasi //

sā tau tadā'bravīttuṣṭā patagendradvijarṣabhau /
na bhetavyaṃ suparṇo'si suparṇa tyaja sambhramam //

ninditāsmi tvayā vatsa na ca nindāṃ kṣamāmyaham /
lokebhyaḥ sapadi bhraśyedyo māṃ nindeta pāpakṛt //

hīnayā'lakṣaṇaiḥ sarvaistathā'ninditayā mayā /
ācāraṃ pratigṛhṇantyā siddhiḥ prāpteyamuttamā //

ācāraḥ phalate dharmamācāraḥ phalate dhanam /
ācārācchriyamāpnoti ācāro hantyalakṣaṇam //

tadāyuṣmankhagapate yatheṣṭaṃ gamyatāmitaḥ /
na ca te garhaṇīyā'haṃ garhitavyāḥ striyaḥ kvacit //

yadi tvamātmano hyarthe māṃ caivādātumicchasi /
tadeva naṣṭadehastu syā vai tvaṃ pannagāśana //

tasyaiva hi prasādena devadevasya cintanāt . tvaṃ tu sāṅgastu sañjātaḥ punareva bhaviṣyasi //

bhavitāsi yathāpūrvaṃ balavīryasamanvitaḥ /
nārada uvāca /
babhūvatustatastasya pakṣau draviṇavattarau //

anujñātastu śāṇḍilyā yathāgatamupāgamat /
naiva cāsādayāmāsa tathārūpāṃsturaṅgamān //

viśvāmitro'tha taṃ dṛṣṭvā gālavaṃ cādhvani sthitaḥ /
uvāca vadatāṃ śreṣṭho vainateyasya sannidhau //

yastvayā svayamevārthaḥ pratijñāto mama dvija /
tasya kālo'pavargasya yathā vā manyate bhavān //

pratīkṣiṣyāmyahaṃ kālametāvantaṃ tathā param /
yathāsaṃsidhyate vipra sa mārgastu niśāmyatām //

suparṇo'thābravīddīnaṃ gālavaṃ bhṛśaduḥkhitam /
pratyakṣaṃ khalvidānīṃ me viśvāmitro yaduktavān //

tadāgaccha dvijaśreṣṭha mantrayiṣyāva gālava /
nādattvā gurave śakyaṃ kṛtsnamarthaṃ tvayā'situm //