kamalāpatyaṣṭakam · Chapter 1

bhujagatalpagataṃ ghanasundaraṃ garuḍavāhanamambujalocanam /
nalinacakragadākaramavyayaṃ bhajata re manujāḥ kamalāpatim

alikulāsitakomalakuntalaṃ vimalapītadukūlamanoharam /
jaladhijāśritavāmakalevaraṃ bhajata re manujāḥ kamalāpatim

kimu japaiśca tapobhirutādhvarairapi kimuttamatīrthaniṣevaṇaiḥ /
kimuta śāstrakadambavilokanaiḥ bhajata re manujāḥ kamalāpatim

manujadehamimaṃ bhuvi durlabhaṃ samadhigamya surairapi vāñchitam /
viṣayalampaṭatāmapahāya vai bhajata re manujāḥ kamalāpatim

na vanitā na suto na sahodaro na hi pitā jananī na ca bāndhavāḥ /
vrajati sākamanena janena vai bhajata re manujāḥ kamalāpatim

sakalameva calaṃ sacarācaraṃ jagadidaṃ sutarāṃ dhanayauvanam /
samavalokya vivekadṛśā drutaṃ bhajata re manujāḥ kamalāpatim

vividharogayutaṃ kṣaṇabhaṅguraṃ paravaśaṃ navamārgamalākulam /
parinirīkṣya śarīramidaṃ svakaṃ bhajata re manujāḥ kamalāpatim

munivarairaniśaṃ hṛdi bhāvitaṃ śivaviriñcimahendranutaṃ sadā /
maraṇajanmajarābhayamocanaṃ bhajata re manujāḥ kamalāpatim

haripadāṣṭakametadanuttamaṃ paramahaṃsajanena samīritam /
paṭhati yastu samāhitacetasā vrajati viṣṇupadaṃ sa naro dhruvaṃ

iti śrīmatparamahaṃsasvāmibrahmānandaviracitaṃ kamalāpatyaṣṭakaṃ samāptaṃ//