kakārādikālīśatanāmastotram · Chapter 1

// kakārādikālīśatanāmastotram //
śrīdevyuvāca-
namaste pārvatīnātha viśvanātha dayāmaya /
jñānāt parataraṃ nāsti śrutaṃ viśveśvara prabho

dīnavandho dayāsindho viśveśvara jagatpate /
idānīṃ śrotumicchāmi gopyaṃ paramakāraṇam /
rahasyaṃ kālikāyaśca tārāyāśca surottama

śrīśiva uvāca-
rahasyaṃ kiṃ vadiṣyāmi pañcavaktrairmaheśvarī /
jihvākoṭisahasraistu vaktrakoṭiśatairapi

vaktuṃ na śakyate tasya māhātmyaṃ vai kathañcana /
tasyā rahasyaṃ gopyañca kiṃ na jānāsi śaṃkarī

svasyaiva caritaṃ vaktuṃ samarthā svayameva hi /
anyathā naiva deveśi jñāyate tat kathañcana

kālikāyāḥ śataṃ nāma nānā tantre tvayā śrutam /
rahasyaṃ gopanīyañca tatre'smin jagadambike

karālavadanā kālī kāminī kamalā kalā /
kriyāvatī koṭarākṣī kāmākṣyā kāmasundarī

kapālā ca karālā ca kālī kātyāyanī kuhuḥ /
kaṅkālā kāladamanā karuṇā kamalārccitā

kādambarī kālaharā kautukī kāraṇapriyā /
kṛṣṇā kṛṣṇapriyā kṛṣṇapūjitā kṛṣṇavallabhā

kṛṣṇāparājitā kṛṣṇapriyā ca kṛṣṇarūpinī /
kālikā kālarātrīśca kulajā kulapaṇḍitā

kuladharmapriyā kāmā kāmyakarmavibhūṣitā /
kulapriyā kularatā kulīnaparipūjitā

kulajñā kamalāpūjyā kailāsanagabhūṣitā /
kūṭajā keśinī kāmyā kāmadā kāmapaṇḍitā

karālāsyā ca kandarpakāminī rūpaśobhitā /
kolambakā kolaratā keśinī keśabhūṣitā

keśavasyapriyā kāśā kāśmīrā keśavārccitā /
kāmeśvarī kāmarupā kāmadānavibhūṣitā

kālahantrī kūrmamāṃsapriyā kūrmādipūjitā /
kolinī karakākārā karakarmaniṣeviṇī

kaṭakeśvaramadhyasthā kaṭakī kaṭakārccitā /
kaṭapriyā kaṭaratā kaṭakarmaniṣeviṇī

kumārīpūjanaratā kumārīgaṇasevitā /
kulācārapriyā kaulapriyā kaulaniṣeviṇī

kulīnā kuladharmajñā kulabhītivimarddinī /
kāladharmapriyā kāmya-nityā kāmasvarūpiṇī

kāmarūpā kāmaharā kāmamandirapūjitā /
kāmāgārasvarūpā ca kālākhyā kālabhūṣitā

kriyābhaktiratā kāmyānāñcaiva kāmadāyinī /
kolapuṣpambarā kolā nikolā kālahāntarā

kauṣikī ketakī kuntī kuntalādivibhūṣitā /
ityevaṃ śṛṇu cārvaṅgi rahasyaṃ sarvamaṅgalam

phalaśruti-
yaḥ paṭhet parayā bhaktyā sa śivo nātra saṃśayaḥ /
śatanāmaprasādena kiṃ na siddhati bhūtale

brahmā viṣṇuśca rudraśca vāsavādyā divaukasaḥ /
rahasyapaṭhanāddevi sarve ca vigatajvarāḥ

triṣu lokeśu viśveśi satyaṃ gopyamataḥ param /
nāsti nāsti mahāmāye tantramadhye kathañcana

satyaṃ vaci maheśāni nātaḥparataraṃ priye /
na goloke na vaikuṇṭhe na ca kailāsamandire

rātrivāpi divābhāge yadi devi sureśvarī /
prajaped bhaktibhāvena rahasyastavamuttamam

śatanāma prasādena mantrasiddhiḥ prajāyate /
kujavāre caturddaśyāṃ niśābhāge japettu yaḥ

sa kṛtī sarvaśāstrajñaḥ sa kulīnaḥ sadā śuciḥ /
sa kulajñaḥ sa kālajñaḥ sa dharmajño mahītale

rahasya paṭhanāt koṭi-puraścaraṇajaṃ phalam /
prāpnoti devadeveśi satyaṃ paramasundarī

stavapāṭhād varārohe kiṃ na siddhati bhūtale /
aṇimādyaṣṭasiddhiśca bhavetyeva na saṃśayaḥ

rātrau bilvatale'śvaththamūle'parājitātale /
prapaṭhet kālikā-stotraṃ yathāśaktyā maheśvarī

śatavāraprapaṭhanānmantrasiddhirbhaveddhrūvam /
nānātantraṃ śrutaṃ devi mama vaktrāt sureśvarī

muṇḍamālāmahāmantraṃ mahāmantrasya sādhanam /
bhaktyā bhagavatīṃ durgāṃ duḥkhadāridryanāśinīm

saṃsmared yo japeddhyāyet sa mukto nātra saṃśaya /
jīvanmuktaḥ sa vijñeyastantrabhaktiparāyaṇaḥ

sa sādhako mahājñānī yaśca durgāpadānugaḥ /
na ca bhaktirna vāhabhaktirna muktinaganandini

vinā durgāṃ jagaddhātrī niṣphalaṃ jīvanaṃ bhabhet /
śaktimārgarato bhūtvā yohanyamārge pradhāvati

na ca śāktāstasya vaktraṃ paripaśyanti śaṃkarī /
vinā tantrād vinā mantrād vinā yantrānmaheśvarī

na ca bhuktiśca muktiśca jāyate varavarṇinī /
yathā gururmaheśāni yathā ca paramo guruḥ

tantrāvaktā guruḥ sākṣād yathā ca jñānadaḥ śivaḥ /
tantrañca tantravaktāraṃ nindanti tāntrīkīṃ kriyām

ye janā bhairavāsteṣāṃ māṃsāsthicarvaṇodyatāḥ /
ataeva ca tantrajñaṃ sa nindanti kadācana /
na hastanti na hiṃsanti na vadantyanyathā budhā

// iti muṇḍamālātantre'ṣṭamapaṭale devīśvara saṃvāde
kālīśatanāmastotraṃ sampūrṇam //