Jātakamālā · Verses 67-86

athāsau mahīpatir bodhisattvam abravīt ||
śakye tat kuśalaṃ dātuṃ svasaṃtānagataṃ yadi |
dadyāṃ tad api suvyaktaṃ bhavate kṛtavedine

vayaṃ rājyaṃ ca dātāro yad vānyat sādhu manyase |
tathaiva prabhutāṃ tatra nāvagantavyam anyathā

mayā yat puṇyam āryāṇām eṣām apaciteś citaṃ |
tvadabhyāgamanākālakaumudī tat kṛtaiva me

mitram ekāntakalyāṇaṃ bandhur atyantavatsalaḥ |
guṇavān dakṣiṇīyas tvaṃ nāthaś cānuttaro mama

kṣudrasattvo 'pi ko nāma tvadājñām abhilaṅghayet |
draṣṭavyaratnaṃ dṛṣṭvā ca na prasīded bhavādṛśaṃ

ekaṃ tv atra mahārāja vaidhuram avagacchāmi | yena me vaktum asty etān maharṣīn asmin prayojane saṃkucati mānasam || ete hi mahātmāno vivekaratipriyatvād abhiramante himavati śailarāje || paśya mahārāja ||
amī hi himavatprasthāḥ kadalīkhaṇśamaṇḍitāḥ |
vivekāyaiva sādhūnāṃ śaṅkhadhātrā vinirmitāḥ

hariṇā luñcitopāntaśādvalaśyāmanirjharān |
devadārudrumān paśya kūṭāgārān ivodgatān

khyāpayantīva lokānāṃ vinipātaṃ himāpagāḥ |
taraṅgaiḥ kūlapāṣāṇabhidyamānair muhur muhuḥ

etāḥ snigdhacchadacchāyāḥ padmakadrumarājayaḥ |
yatīn āśvāsayantīva saṃsārodvignamānasān

klāntānāṃ vratinām eṣa svedabindūn apohate |
prāleyakaṇasaṃparkaśiśiro vanamārutaḥ

upatyakāḥ padmakapuṣpapāṭalāḥ śilīndhrakāpādapavāritātapāḥ |
imā himādre ramayanti mānasaṃ nivṛttasaṃrāgaviṣaṃ vipaścitāṃ

himācalasyopanitambarohiṇāṃ nirīkṣamāṇāḥ saralāśikhāvatāṃ |
vanāni cetaḥsthitim āpnuvanty amī sumedhasaḥ kāmavivekapeśalāṃ

bodhisattvaḥ provāca ||
timiradrumasaṃchannā viviktābhogakandarāḥ |
tatrāpy anuguṇā santi velāśailaḥ prahāṇināṃ

tālahintālamālinyaḥ sarito haritopalāḥ |
santi tatrāpi hārītapakṣavikṣobhitormayaḥ

taraṅginīnām upakaṇṭharohiṇāṃ palāśinām puṣpabharāturāḥ śikhāḥ |
vidhūya tatrāpi yatīn niṣevate samudravelājalaśītalo 'nilaḥ

sarasamaricavallīśyāmarodho vanasya dhvanir acalasuruṅgāmurcchito 'py amburāśeḥ |
aviralaparipāto 'bhyāsayogānupātī sthirayati kila bhikṣos tatra cetaḥsamādhiṃ

nirdhautopalasānur añjanaśilānīlaiḥ payodher jalair
vātāyāsitacandanadrumalatāvikṣiptasūryātapaḥ |
śailendro malayo 'sti nāma jaladacchedāvalīśekharaś
cetaḥ saṃyaminām alaṃ ramayituṃ śāntaprapañcajvaraṃ

citrotsaṅgo viṣamanicitair dhātupāṣāṇakhaṇḍaiḥ
śaṣpodbhedais taruṇataruṇaiḥ śyāmaparyantalekhaḥ |
baddhāmodo madajalamucāṃ dantināṃ dānagandhair
vindhyo 'py adriḥ praśamamahatāṃ yogināṃ saṃnivāsaḥ

sahyādrer vilasattamālaharitāḥ prasthāḥ prahāṇakṣamā
niḥśabdākṣaradacchanirjharajalaprakṣālitaprastarāḥ |
saṃnyastavyavahāraśāntamanasāṃ janmaprabandhadviṣām
āryāṇām anapāyinīṃ vidadhati pratyātmaveśāṃ ratiṃ

tīrāntānatabālavetasataruśreṇīniruddhātapā
nadyaḥ svacchajalāntarāla vila sanmīnāvalīmekhalāḥ |
sakhyaḥ premaniratyayā iva sakhe tatrāpy alaṃ yoginām
ākṣeptuṃ viṣayābhilāṣavimukhaṃ pradhyānadhīraṃ manaḥ