hārītagītā · Chapter 1

[y]
kiṃ śīlaḥ kiṃ samācāraḥ kiṃ vidyaḥ kiṃ parāyanaḥ/
prāpnoti brahmaṇaḥ sthānaṃ yatparaṃ prakṛterdhruvam

[bhī]
mokṣadharmeṣu nirato laghvāhāro jitendriyaḥ/
prāpnoti paramaṃ sthānaṃ yatparaṃ prakṛterdhruvam

svagṛhādabhiniḥsṛtya lābhālābhe samo muniḥ/
samupodheṣu kāmeṣu nirapekṣaḥ parivrajet

na cakṣuṣā na manasā na vācā dūsayedapi/
na pratyakṣaṃ parokṣaṃ vā dūsanaṃ vyāharetkva cit

na hiṃsyātsarvabhūtāni maitrāyaṇa gatiś caret/
nedaṃ jīvitamāsādya vairaṃ kurvīta kena cit

ativādāṃstitikṣeta nābhimanyetkathaṃ cana/
krodhyamānaḥ priyaṃ brūyādākruṣṭaḥ kuśalaṃ vadet

pradakṣiṇaṃ prasavyaṃ ca grāmamadhye na cācaret/
bhaikṣa caryāmanāpanno na gacchetpūrvaketitaḥ

avikīrṇaḥ suguptaśca na vācā hyapriyaṃ vadet/
mṛduḥ syādapratikrūro visrabdhaḥ syādaroṣaṇaḥ

vidhūme nyastamusale vyaṅgāre bhuktavajjane/
atīte pātrasañcāre bhikṣāṃ lipseta vai muniḥ

anuyātrikamarthasya mātrā lābheṣvanādṛtaḥ/
alābhe na vihanyeta lābhaścainaṃ na harṣayet

lābhaṃ sādhāraṇaṃ necchenna bhuñjītābhipūjitaḥ/
abhipūjita lābhaṃ hi jugupsetaiva tādṛśaḥ

na cānna doṣānnindeta na guṇānabhipūjayet/
śayāsane vivikte ca nityamevābhipūjayet

śūnyāgaraṃ vṛkṣamūlamaraṇyamatha vā guhām/
ajñātacaryāṃ gatvānyāṃ tato'nyatraiva saṃviśet

anurodha virodhābhyāṃ samaḥ syādacalo dhruvaḥ/
sukṛtaṃ duṣkṛtaṃ cobhe nānurudhyeta karmaṇi

vāco vegaṃ manasaḥ krodhavegaṃ vivitsā vegamudaropastha vegam/
etānvegānvinayedvai tapasvī nindā cāsya hṛdayaṃ nopahanyāt

madhyastha eva tiṣṭheta praśaṃsā nindayoḥ samaḥ/
etatpavitraṃ paramaṃ parivrājaka āśrame

mahātmā suvrato dāntaḥ sarvatraivānapāśritaḥ/
apūrva cārakaḥ saumyo aniketaḥ samāhitaḥ

vāna prasthagṛhasthābhyāṃ na saṃsṛjyeta karhi cit/
ajñātalipsāṃ lipseta na cainaṃ harṣa āviśet

vijānatāṃ mokṣa eṣa śramaḥ syādavijānatām/
mokṣayānamidaṃ kṛtsnaṃ viduṣāṃ hārito'bravīt

abhayaṃ sarvabhūtebhyo dattvā yaḥ pravrajedgṛhāt/
lokāstejomayāstasya tathānantyāya kalpate