gopālāṣṭakam · Chapter 1

śrī gaṇeśāya namaḥ //
yasmādviśvaṃ jātamidaṃ citramatarkyaṃ yasminnānandātmani nityaṃ ramate vai /
yatrānte saṃyāti layaṃ caitadaśeṣaṃ taṃ gopālaṃ santatakālaṃ prati vande

yasyājñānājjanmajarārogakadambaṃ jñāte yasminnaśyati tatsarvamihāśu /
gatvā yatrāyāti punarno bhavabhūmiṃ taṃ gopālaṃ santatakālaṃ prati vande

tiṣṭhannantaryo yamayatyetadajasraṃ yaṃ kaścinno veda jano'pyātmani santam /
sarvaṃ yasyedaṃ ca vaśe tiṣṭhati viśvaṃ taṃ gopālaṃ santatakālaṃ prati vande

dharmo'dharmeṇeha tiraskāramupaiti kāle yasminmatsyamukhaiścārucaritraiḥ /
nānārūpaiḥ pāti tadā yo'vanibimbaṃ taṃ gopālaṃ santatakālaṃ prati vande

prāṇāyāmairdhvastasamastendriyadoṣā rudhvā cittaṃ yaṃ hṛdi paśyanti samādhau /
jyotīrūpaṃ yogijanāmodanimagnāstaṃ gopālaṃ santatakālaṃ prati vande

bhānuścandraścoḍugaṇaiścaiva hutāśo yasminnaivābhāti taḍiccāpi kadāpi /
yadbhāsā cābhāti samastaṃ jagadetat taṃ gopālaṃ santatakālaṃ prati vande

satyajñānaṃ modamavocurnigamā yaṃ yo brahmendrādityagirīśārcitapādaḥ /
śete'nanto'nantatanāvambunidhau yastaṃ gopālaṃ santatakālaṃ prati vande

śaivāḥ prāhuryaṃ śivamanye gaṇanāthaṃ śaktiṃ caike'rkaṃ ca tathānye matibhedāt /
nānākārairbhāti ya eko'khilaśaktistaṃ gopālaṃ santatakālaṃ prati vande

śrīmadgopālāṣṭakametat samadhīte bhaktyā nityaṃ yo manujo vai sthiracetāḥ /
hitvā tūrṇaṃ pāpakalāpaṃ sa sameti puṇyaṃ viṣṇordhāma yato naiva nipātaḥ

iti śrīparamahaṃsasvāmibrahmānandaviracitaṃ śrī gopālāṣṭakaṃ sampūrṇam //