gopālasahasranāmastotram · Chapter 1

pārvatyuvāca-
kailāsaśikhare ramye gaurī pṛcchati śaṅkaram /
brahmāṇḍākhilanāthastvaṃ sṛṣṭisaṃhārakārakaḥ

tvameva pūjyase lokairbrahmaviṣṇusurādibhiḥ /
nityaṃ paṭhasi deveśa kasya stotraṃ maheśvara

āścaryamidamākhyānaṃ jāyate mayi śaṅkara /
tatprāṇeśa mahāprājña saṃśayaṃ chindhi me prabho

śrīmahādeva uvāca-
dhanyāsi kṛtapuṇyāsi pārvati prāṇavallabhe /
rahasyātirahasyaṃ ca yatpṛcchasi varānane

strīsvabhāvānmahādevi punastvaṃ paripṛcchasi /
gopanīyaṃ gopanīyaṃ gopanīyaṃ prayatnataḥ

datte ca siddhihāniḥ syāttasmādyatnena gopayet /
idaṃ rahasyaṃ paramaṃ puruṣārthapradāyakam

dhanaratnaughamāṇikyaṃ turaṅgaṃ ca gajādikam /
dadāti smaraṇādeva mahāmokṣapradāyakam

tatte'haṃ sampravakṣyāmi śṛṇuṣvāvahitā priye /
yo'sau nirañjano devaḥ citsvarūpī janārdanaḥ

saṃsārasāgarottārakāraṇāya nṛṇām sadā /
śrīraṅgādikarūpeṇa trailokyaṃ vyāpya tiṣṭhati

tato lokā mahāmūḍhā viṣṇubhaktivivarjitāḥ /
niścayaṃ nādhigacchanti punarnārāyaṇo hariḥ

nirañjano nirākāro bhaktānāṃ prītikāmadaḥ /
vṛndāvanavihārāya gopālaṃ rūpamudvahan

muralīvādanādhārī rādhāyai prītimāvahan /
aṃśāṃśebhyaḥ samunmīlya pūrṇarūpakalāyutaḥ

śrīkṛṣṇacandro bhagavān nandagopavarodyataḥ /
dharaṇīrūpiṇīmātṛyaśodānandadāyakaḥ

dvābhyāṃ prayācito nātho devakyāṃ vasudevataḥ /
brahmaṇā'bhyarthito devo devairapi sureśvari

jāto'vanyāṃ mukundo'pi muralovedarecikā /
tayā sārddhaṃ vacaḥ kṛtvā tato jāto mahītale

saṃsārasārasarvasvaṃ śyāmalaṃ mahadujjvalam /
etajjyotirahaṃ vedyaṃ cintayāmi sanātanam

gauratejo vinā yastu śyāmatejassamarcayet /
japedvā dhyāyate vāpi sa bhavet pātakī śive

sa brahmahā surāpī ca svarṇasteyī ca pañcamaḥ /
etairdoṣairvilipyeta tejobhedānmahīśvari

tasmājjyotirabhūd dvedhā rādhāmādhavarūpakam /
tasmādidaṃ mahādevi gopālenaiva bhāṣitam

durvāsaso munermohe kārtikyāṃ rāsamaṇḍale /
tataḥ pṛṣṭavatī rādhā sandehabhedamātmanaḥ

nirañjanātsamutpannaṃ mayā'dhītaṃ jaganmayi /
śrīkṛṣṇena tataḥ proktaṃ rādhāyai nāradāya ca

tato nāradatassarve viralā vaiṣṇavā janāḥ /
kalau jānanti deveśi gopanīyaṃ prayatnataḥ

śaṭhāya kṛpaṇāyātha dāmbhikāya sureśvari /
brahmahatyāmavāpnoti tasmādyatnena gopayet

pāṭha karane kī vidhi
ॐ asya śrīgopālasahasranāmastotramahāmantrasya śrīnārada ṛṣiḥ /
anuṣṭup chandaḥ / śrīgopālo devatā / kāmo bījam / māyā śaktiḥ /
candraḥ kīlakam śrīkṛṣṇacandra bhaktirūpaphalaprāptaye
śrīgopālasahasranāmastotrajape viniyogaḥ /
yā isataraha kareṃ pāṭha
ॐ aiṃ klīṃ bījam / śrīṃ hrīṃ śaktiḥ /
śrīvṛndāvananivāsaḥ kīlakam /
śrīrādhāpriyaparabrahmeti mantraḥ /
dharmādicaturvidhapuruṣārthasiddhyarthe jape viniyogaḥ //
atha karādinyāsaḥ
ॐ klāṃ aṅguṣṭhābhyāṃ namaḥ /
ॐ klīṃ tarjanībhyāṃ namaḥ //
ॐ klūṃ madhyamābhyāṃ namaḥ //
ॐ klaiṃ anāmikābhyāṃ namaḥ //
ॐ klauṃ kaniṣṭikābhyāṃ namaḥ //
ॐ klaḥ karatalakarapṛṣṭhābhyāṃ namaḥ //
atha hṛdayādinyāsaḥ
ॐ klāṃ hṛdayāya namaḥ /
ॐ klīṃ śirase svāhā //
ॐ klūṃ śikhāyai vaṣaṭ //
ॐ klaiṃ kavacāya huṃ //
ॐ klauṃ netratrayāya vauṣaṭ //
ॐ klaḥ astrāya phaṭ //
atha dhyānam
kastūrītilakaṃ lalāṭapaṭale vakṣaḥsthale kaustubhaṃ
nāsāgrevaramauktikaṃ karatale veṇuṃ kare kaṅkaṇam //
sarvāṅge haricandanaṃ sulalitaṃ kaṇṭhe ca muktāvalim
gopastrīpariveṣṭito vijayate gopālacūḍāmaṇiḥ

phullendīvarakāntiminduvadanaṃ barhāvataṃsapriyaṃ
śrīvatsāṅkamudārakaustubhadharaṃ pītāmbaraṃ sundaram //
gopīnāṃ nayanotpalārcitatanuṃ gogopasaṅghāvṛtaṃ
govindaṃ kalaveṇuvādanaparaṃ divyāṅgabhūṣaṃ bhaje

sahasranāma stotra ārambha-
ॐ klīṃ devaḥ kāmadevaḥ kāmabījaśiromaṇiḥ /
śrīgopālo mahīpālo sarvavedāntapāragaḥ

kṛṣṇaḥ kamalapatrākṣaḥ puṇḍarīkaḥ sanātanaḥ /
gopatirbhūpatiḥ śāstā prahartā viśvatomukhaḥ

ādikartā mahākartā mahākālaḥ pratāpavān /
jagajjīvo jagaddhātā jagadbhartā jagadvasuḥ

matsyo bhīmaḥ kuhūbhartā hartā vārāhamūrtimān /
nārāyaṇo hṛṣīkeśo govindo garuḍadhvajaḥ

gokulendro mahīcandraḥ śarvarīpriyakārakaḥ /
kamalāmukhalolākṣaḥ puṇḍarīkaḥ śubhāvahaḥ

durvāsāḥ kapilo bhaumaḥ sindhusāgarasaṅgamaḥ /
govindo gopatirgopaḥ kālindīpremapūrakaḥ

gopasvāmī gokulendro govardhanavarapradaḥ /
nandādigokulatrātā dātā dāridryabhañjanaḥ

sarvamaṅgaladātā ca sarvakāmapradāyakaḥ /
ādikartā mahībhartā sarvasāgarasindhujaḥ

gajagāmī gajoddhārī kāmī kāmakalānidhiḥ /
kalaṅkarahitaścandro bimbāsyo bimbasattamaḥ

mālākāraḥ kṛpākāraḥ kokilasvarabhūṣaṇaḥ /
rāmo nīlāmbaro devo halī durdamamardanaḥ

sahasrākṣapurībhettā mahāmārīvināśanaḥ /
śivaḥ śivatamo bhettā balārātiprapūjakaḥ

kumārīvaradāyī ca vareṇyo mīnaketanaḥ /
naro nārāyaṇo dhīro rādhāpatirudāradhīḥ

śrīpatiḥ śrīnidhiḥ śrīmān māpatiḥ pratirājahā /
vṛndāpatiḥ kulagrāmī dhāmī brahma sanātanaḥ

revatīramaṇo rāmaḥ priyaścañcalalocanaḥ /
rāmāyaṇaśarīro'yaṃ rāmo rāmaḥ śriyaḥpatiḥ

śarvaraḥ śarvarī śarvaḥ sarvatra śubhadāyakaḥ /
rādhārādhayitārādhī rādhācittapramodakaḥ

rādhāratisukhopetaḥ rādhāmohanatatparaḥ /
rādhāvaśīkaro rādhāhṛdayāmbhojaṣaṭpadaḥ

rādhāliṅganasammohaḥ rādhānartanakautukaḥ /
rādhāsañjātasamprīto rādhākāmyaphalapradaḥ

vṛndāpatiḥ kośanidhiḥ kokaśokavināśanaḥ /
candrāpatiḥ candrapatiḥ caṇḍakodaṇḍabhañjanaḥ

rāmo dāśarathī rāmaḥ bhṛguvaṃśasamudbhavaḥ /
ātmārāmo jitakrodho moho mohāndhabhañjanaḥ

vṛṣabhānubhavo bhāvaḥ kāśyapiḥ karuṇānidhiḥ /
kolāhalo halī hālī helī haladharapriyaḥ

rādhāmukhābjamārtāṇḍaḥ bhāskaro ravijā vidhuḥ /
vidhirvidhātā varuṇo vāruṇo vāruṇīpriyaḥ

rohiṇīhṛdayānando vasudevātmajo balī /
nīlāmbaro rauhiṇeyo jarāsandhavadho'malaḥ

nāgo navāmbho virudo vīrahā varado balī /
gopatho vijayī vidvān śipiviṣṭaḥ sanātanaḥ

paraśurāmavacogrāhī varagrāhī śṛgālahā /
damaghoṣopadeṣṭā ca rathagrāhī sudarśanaḥ

vīrapatnīyaśastrātā jarāvyādhivighātakaḥ /
dvārakāvāsatattvajñaḥ hutāśanavarapradaḥ

yamunāvegasaṃhārī nīlāmbaradharaḥ prabhuḥ /
vibhuḥ śarāsano dhanvī gaṇeśo gaṇanāyakaḥ

lakṣmaṇo lakṣaṇo lakṣyo rakṣovaṃśavināśanaḥ /
vāmano vāmanībhūto'vāmano vāmanāruhaḥ

yaśodānandanaḥ karttā yamalārjunamuktidaḥ /
ulūkhalī mahāmānī dāmabaddhāhvayī śamī

bhaktānukārī bhagavān keśavo baladhārakaḥ /
keśihā madhuhā mohī vṛṣāsuravighātakaḥ

aghāsuravināśī ca pūtanāmokṣadāyakaḥ /
kubjāvinodī bhagavān kaṃsamṛtyurmahāmakhī // ३०/
aśvamedho vājapeyo gomedho naramedhavān /
kandarpakoṭilāvaṇyaścandrakoṭisuśītalaḥ

ravikoṭipratīkāśo vāyukoṭimahābalaḥ /
brahmā brahmāṇḍakartā ca kamalāvāñchitapradaḥ

kamalā kamalākṣaśca kamalāmukhalolupaḥ /
kamalāvratadhārī ca kamalābhaḥ purandaraḥ

saubhāgyādhikacitto'yaṃ mahāmāyī madotkaṭaḥ /
tārakāriḥ suratrātā mārīcakṣobhakārakaḥ

viśvāmitrapriyo dānto rāmo rājīvalocanaḥ /
laṅkādhipakuladhvaṃsī vibhīṣaṇavarapradaḥ

sītānandakaro rāmo vīro vāridhibandhanaḥ /
kharadūṣaṇasaṃhārī sāketapuravāsavān

candrāvalīpatiḥ kūlaḥ keśikaṃsavadho'malaḥ /
mādhavo madhuhā mādhvī mādhvīko mādhavo vidhuḥ

muñjāṭavīgāhamānaḥ dhenukārirdharātmajaḥ /
vaṃśīvaṭavihārī ca govardhanavanāśrayaḥ

tathā tālavanoddeśī bhāṇḍīravanaśaṅkhahā /
tṛṇāvartakṛpākārī vṛṣabhānusutāpatiḥ

rādhāprāṇasamo rādhāvadanābjamadhuvrataḥ /
gopīrañjanadaivajñaḥ līlākamalapūjitaḥ

krīḍākamalasandohaḥ gopikāprītirañjanaḥ /
rañjako rañjano raṅgo raṅgī raṅgamahīruhaḥ

kāmaḥ kāmāribhakto'yaṃ purāṇapuruṣaḥ kaviḥ /
nārado devalo bhīmo bālo bālamukhāmbujaḥ

ambujo brahmasākṣī ca yogī dattavaro muniḥ /
ṛṣabhaḥ parvato grāmo nadīpavanavallabhaḥ

padmanābhaḥ surajyeṣṭhī brahmā rūdro'hibhūṣitaḥ /
gaṇānāṃ trāṇakartā ca gaṇeśo grahilo grahī

gaṇāśrayo gaṇādhyakṣaḥ kroḍīkṛtajagattrayaḥ /
yādavendro dvārakendro mathurāvallabho dhurī

bhramaraḥ kuntalī kuntīsutarakṣo mahāmakhī /
yamunāvaradātā ca kāśyapasya varapradaḥ

śaṅkhacūḍavadhoddāmo gopīrakṣaṇatatparaḥ /
pāñcajanyakaro rāmī trirāmī vanajo jayaḥ

phālgunaḥ phālgunasakho virādhavadhakārakaḥ /
rukmiṇīprāṇanāthaśca satyabhāmāpriyaṅkaraḥ

kalpavṛkṣo mahāvṛkṣaḥ dānavṛkṣo mahāphalaḥ /
aṅkuśo bhūsuro bhāvo bhrāmako bhāmako hariḥ

saralaḥ śāśvato vīro yaduvaṃśī śivātmakaḥ /
pradyumno balakartā ca prahartā daityahā prabhuḥ

mahādhanī mahāvīro vanamālāvibhūṣaṇaḥ /
tulasīdāmaśobhāḍhyo jālandharavināśanaḥ

śūraḥ sūryo mṛtaṇḍaśca bhāskaro viśvapūjitaḥ /
ravistamohā vahniśca bāḍavo vaḍavānalaḥ

daityadarpavināśī ca garuḍo garuḍāgrajaḥ /
gopīnātho mahānātho vṛndānātho'virodhakaḥ

prapañcī pañcarūpaśca latāgulmaśca gopatiḥ /
gaṅgā ca yamunārūpo godā vetravatī tathā

kāverī narmadā tāptī gaṇḍakī sarayūstathā /
rājasastāmasassattvī sarvāṅgī sarvalocanaḥ

sudhāmayo'mṛtamayo yoginīvallabhaḥ śivaḥ /
buddho buddhimatāṃ śreṣṭho viṣṇurjiṣṇuḥ śacīpatiḥ

vaṃśī vaṃśadharo lokaḥ viloko mohanāśanaḥ /
ravarāvo ravo rāvo balo bālabalāhakaḥ

śivo rūdro nalo nīlo lāṅgalī lāṅgalāśrayaḥ /
pāradaḥ pāvano haṃso haṃsārūḍho jagatpatiḥ

mohinīmohano māyī mahāmāyo mahāmakhī /
vṛṣo vṛṣākapiḥ kālaḥ kālīdamanakārakaḥ

kubjābhāgyaprado vīraḥ rajakakṣayakārakaḥ /
komalo vāruṇo rājā jalajo jaladhārakaḥ

hārakaḥ sarvapāpaghnaḥ parameṣṭhī pitāmahaḥ /
khaḍgadhārī kṛpākārī rādhāramaṇasundaraḥ

dvādaśāraṇyasambhogī śeṣanāgaphaṇālayaḥ /
kāmaḥ śyāmaḥ sukhaśrīdaḥ śrīpatiḥ śrīnidhiḥ kṛtī

harirnārāyaṇo nāro narottama iṣupriyaḥ /
gopālīcittahartā ca karttā saṃsāratārakaḥ

ādidevo mahādevo gaurīgururanāśrayaḥ /
sādhurmadhurvidhurdhātā trātā'krūraparāyaṇaḥ

rolambī ca hayagrīvo vānarārirvanāśrayaḥ /
vanaṃ vanī vanādhyakṣaḥ mahāvandyo mahāmuniḥ

syāmantakamaṇiprājño vijño vighnavighātakaḥ /
govarddhano varddhanīyaḥ varddhano varddhanapriyaḥ

varddhanyo varddhano varddhī vārddhiṣṇuḥ sumukhapriyaḥ /
varddhito vṛddhako vṛddho vṛndārakajanapriyaḥ

gopālaramaṇībhartā sāmbakuṣṭhavināśakaḥ /
rukmiṇīharaṇaḥ premapremī candrāvalīpatiḥ

śrīkartā viśvabhartā ca naro nārāyaṇo balī /
gaṇo gaṇapatiścaiva dattātreyo mahāmuniḥ

vyāso nārāyaṇo divyo bhavyo bhāvukadhārakaḥ /
śvaḥśreyasaṃ śivaṃ bhadraṃ bhāvukaṃ bhāvikaṃ śubham

śubhātmakaḥ śubhaḥ śāstā praśāstā meghānādahā /
brahmaṇyadevo dīnānāmuddhārakaraṇakṣamaḥ

kṛṣṇaḥ kamalapatrākṣaḥ kṛṣṇaḥ kamalalocanaḥ /
kṛṣṇaḥ kāmī sadā kṛṣṇaḥ samastapriyakārakaḥ

nando nandī mahānandī mādī mādanakaḥ kilī /
milī hilī gilī golī golo golālayo gulī

guggulī mārakī śākhī vaṭaḥ pippalakaḥ kṛtī /
mlecchahā kālaharttā ca yaśodāyaśa eva ca

acyutaḥ keśavo viṣṇuḥ hariḥ satyo janārdanaḥ /
haṃso nārāyaṇo līlo nīlo bhaktiparāyaṇaḥ

jānakīvallabho rāmaḥ virāmo vighnanāśanaḥ /
sahabhānurmahābhānuḥ vīrabāhurmahodadhiḥ

samudro'bdhirakūpāraḥ pārāvāraḥ saritpatiḥ /
gokulānandakārī ca pratijñāparipālakaḥ

sadārāmaḥ kṛpārāmaḥ mahārāmo dhanurdharaḥ /
parvataḥ parvatākāro gayo geyo dvijapriyaḥ

kambalāśvataro rāmo rāmāyaṇapravartakaḥ /
dyaurdivo divaso divyo bhavyo bhāvi bhayāpahaḥ

pārvatībhāgyasahito bhartā lakṣmīvilāsavān /
vilāsī sāhasī sarvī garvī garvitalocanaḥ

murārirlokadharmajñaḥ jīvano jīvanāntakaḥ /
yamo yamādiyamano yāmī yāmavidhāyakaḥ

vasulī pāṃsulī pāṃsuḥ pāṇḍurarjunavallabhaḥ /
lalitā candrikāmālī mālī mālāmbujāśrayaḥ

ambujākṣo mahāyajñaḥ dakṣaḥ cintāmaṇiḥ prabhuḥ /
maṇirdinamaṇiścaiva kedāro badarīśrayaḥ

badarīvanasamprītaḥ vyāsaḥ satyavatīsutaḥ /
amarārinihantā ca sudhāsindhuvidhūdayaḥ

candro raviḥ śivaḥ śūlī cakrī caiva gadādharaḥ /
śrīkartā śrīpatiḥ śrīdaḥ śrīdevo devakīsutaḥ

śrīpatiḥ puṇḍarīkākṣaḥ padmanābho jagatpatiḥ /
vāsudevo'prameyātmā keśavo garuḍadhvajaḥ

nārāyaṇaḥ paraṃ dhāma devadevo maheśvaraḥ /
cakrapāṇiḥ kalāpūrṇo vedavedyo dayānidhiḥ

bhagavān sarvabhūteśo gopālaḥ sarvapālakaḥ /
ananto nirguṇo nityo nirvikalpo nirañjanaḥ

nirādhāro nirākāraḥ nirābhāso nirāśrayaḥ /
puruṣaḥ praṇavātīto mukundaḥ parameśvaraḥ

kṣaṇāvaniḥ sārvabhaumo vaikuṇṭho bhaktavatsalaḥ /
viṣṇurdāmodaraḥ kṛṣṇo mādhavo mathurāpatiḥ

devakīgarbhasambhūto yaśodāvatsalo hariḥ /
śivaḥ saṅkarṣaṇaḥ śambhurbhūtanātho divaspatiḥ

avyayaḥ sarvadharmajñaḥ nirmalo nirupadravaḥ /
nirvāṇanāyako nityo nīlajīmūtasannibhaḥ

kalākṣayaśca sarvajñaḥ kamalārūpatatparaḥ /
hṛṣīkeśaḥ pītavāsā vasudevapriyātmajaḥ

nandagopakumārāryaḥ navanītāśano vibhuḥ /
purāṇapuruṣaḥ śreṣṭhaḥ śaṅkhapāṇiḥ suvikramaḥ

aniruddhaścakrarathaḥ śārṅgapāṇiścaturbhujaḥ /
gadādharaḥ surārtighno govindo nandakāyudhaḥ

vṛndāvanacaraḥ śaurirveṇuvādyaviśāradaḥ /
tṛṇāvartāntako bhīmasāhasī bahuvikramaḥ

śakaṭāsurasaṃhārī bakāsuravināśanaḥ /
dhenukāsurasaṃhārī pūtanārirnṛkesarī

pitāmaho gurussākṣāt pratyagātmā sadāśivaḥ /
aprameyaḥ prabhuḥ prājño'pratarkyaḥ svapnavarddhanaḥ

dhanyo mānyo bhavo bhāvo dhīraḥ śānto jagadguruḥ /
antaryāmīśvaro divyo daivajño devasaṃstutaḥ

kṣīrābdhiśayano dhātā lakṣmīvāṃllakṣmaṇāgrajaḥ /
dhātrīpatirameyātmā candraśekharapūjitaḥ

lokasākṣī jagaccakṣuḥ puṇyacāritrakīrtanaḥ /
koṭimanmathasaundaryaḥ jaganmohanavigrahaḥ

mandasmitānano gopo gopikāpariveṣṭitaḥ /
phullāravindanayanaḥ cāṇūrāndhraniṣūdanaḥ

indīvaradalaśyāmo barhibarhāvataṃsakaḥ /
muralīninadāhlādaḥ divyamālyāmbarāvṛtaḥ

sukapolayugaḥ subhrūyugalaḥ sulalāṭakaḥ /
kambugrīvo viśālākṣo lakṣmīvāñchubhalakṣaṇaḥ

pīnavakṣāścaturbāhuścaturmūrtistrivikramaḥ /
kalaṅkarahitaḥ śuddhaḥ duṣṭaśatrunibarhaṇaḥ

kirīṭakuṇḍaladharaḥ kaṭakāṅgadamaṇḍitaḥ /
mudrikābharaṇopetaḥ kaṭisūtravirājitaḥ

mañjīrarañjitapadaḥ sarvābharaṇabhūṣitaḥ /
vinyastapādayugalo divyamaṅgalavigrahaḥ

gopikānayanānandaḥ pūrṇacandranibhānanaḥ /
samastajagadānandaḥ sundaro lokanandanaḥ

yamunātīrasañcārī rādhāmanmathavaibhavaḥ /
gopanārīpriyo dānto gopīvastrāpahārakaḥ

śṛṅgāramūrtiḥ śrīdhāmā tārako mūlakāraṇam /
sṛṣṭisaṃrakṣaṇopāyaḥ krūrāsuravibhañjanaḥ

narakāsurasaṃhārī murārirarimardanaḥ /
āditeyapriyo daityabhīkaro yaduśekharaḥ

jarāsandhakuladhvaṃsī kaṃsārātiḥ suvikramaḥ /
puṇyaślokaḥ kīrtanīyaḥ yādavendro jagannutaḥ

rukmiṇīramaṇaḥ satyabhāmājāmbavatīpriyaḥ /
mitravindānāgnajitīlakṣmaṇāsamupāsitaḥ

sudhākarakule jāto'nantaprabalavikramaḥ /
sarvasaubhāgyasampanno dvārakāpattane sthitaḥ

bhadrāsūryasutānātho līlāmānuṣavigrahaḥ /
sahasraṣoḍaśastrīśo bhogamokṣaikadāyakaḥ

vedāntavedyaḥ saṃvedyo vaidyo brahmāṇḍanāyakaḥ /
govarddhanadharo nāthaḥ sarvajīvadayāparaḥ

mūrtimān sarvabhūtātmā ārtatrāṇaparāyaṇaḥ /
sarvajñaḥ sarvasulabhaḥ sarvaśāstraviśāradaḥ

ṣaḍguṇaiśvaryasampannaḥ pūrṇakāmo dhurandharaḥ /
mahānubhāvaḥ kaivalyadāyako lokanāyakaḥ

ādimadhyāntarahitaḥ śuddhasāttvikavigrahaḥ /
asamānaḥ samastātmā śaraṇāgatavatsalaḥ

utpattisthitisaṃhārakāraṇaṃ sarvakāraṇam /
gambhīraḥ sarvabhāvajñaḥ saccidānandavigrahaḥ

viṣvaksenaḥ satyasandhaḥ satyavāk satyavikramaḥ /
satyavrataḥ satyarataḥ sarvadharmaparāyaṇaḥ

āpannārtipraśamanaḥ draupadīmānarakṣakaḥ /
kandarpajanakaḥ prājño jagannāṭakavaibhavaḥ

bhaktivaśyo guṇātītaḥ sarvaiśvaryapradāyakaḥ /
damaghoṣasutadveṣī bāṇabāhuvikhaṇḍanaḥ

bhīṣmabhaktiprado divyaḥ kauravānvayanāśanaḥ /
kaunteyapriyabandhuśca pārthasyandanasārathiḥ

nārasiṃho mahāvīraḥ stambhajāto mahābalaḥ /
prahlādavaradaḥ satyo devapūjyo'bhayaṅkaraḥ

upendra indrāvarajo vāmano balibandhanaḥ /
gajendravaradaḥ svāmī sarvadevanamaskṛtaḥ

śeṣaparyaṅkaśayanaḥ vainateyaratho jayī /
avyāhatabalaiśvaryasampannaḥ pūrṇamānasaḥ

yogeśvareśvaraḥ sākṣī kṣetrajño jñānadāyakaḥ /
yogihṛtpaṅkajāvāso yogamāyāsamanvitaḥ

nādabindukalātītaścaturvargaphalapradaḥ /
suṣumnāmārgasañcārī dehasyāntarasaṃsthitaḥ

dehendriyamanaḥprāṇasākṣī cetaḥprasādakaḥ /
sūkṣmaḥ sarvagato dehī jñānadarpaṇagocaraḥ

tattvatrayātmako'vyaktaḥ kuṇḍalī samupāśritaḥ /
brahmaṇyaḥ sarvadharmajñaḥ śānto dānto gataklamaḥ

śrīnivāsaḥ sadānandaḥ viśvamūrtirmahāprabhuḥ /
sahasraśīrṣā puruṣaḥ sahasrākṣaḥ sahasrapāt

samastabhuvanādhāraḥ samastaprāṇarakṣakaḥ /
samastasarvabhāvajño gopikāprāṇavallabhaḥ

nityotsavo nityasaukhyo nityaśrīrnityamaṅgalaḥ /
vyūhārcito jagannāthaḥ śrīvaikuṇṭhapurādhipaḥ

pūrṇānandaghanībhūtaḥ gopaveṣadharo hariḥ /
kalāpakusumaśyāmaḥ komalaḥ śāntavigrahaḥ

gopāṅganāvṛto'nanto vṛndāvanasamāśrayaḥ /
veṇuvādarataḥ śreṣṭho devānāṃ hitakārakaḥ

bālakrīḍāsamāsakto navanītasya taskaraḥ /
gopālakāminījāraścaurajāraśikhāmaṇiḥ

parañjyotiḥ parākāśaḥ parāvāsaḥ parisphuṭaḥ /
aṣṭādaśākṣaro mantro vyāpako lokapāvanaḥ

saptakoṭimahāmantraśekharo devaśekharaḥ /
vijñānajñānasandhānastejorāśirjagatpatiḥ

bhaktalokaprasannātmā bhaktamandāravigrahaḥ /
bhaktadāridryadamano bhaktānāṃ prītidāyakaḥ

bhaktādhīnamanāḥ pūjyaḥ bhaktalokaśivaṅkaraḥ /
bhaktābhīṣṭapradaḥ sarvabhaktāghaughanikṛntanaḥ

apārakaruṇāsindhurbhagavān bhaktatatparaḥ

// iti gopāla sahasranāmastotram sampūrṇam //
phalaśrutiḥ
(// gopālasahasranāma māhātmyam //)
smaraṇāt pāparāśīnāṃ khaṇḍanaṃ mṛtyunāśanam

vaiṣṇavānāṃ priyakaraṃ mahāroganivāraṇam /
brahmahatyāsurāpānaṃ parastrīgamanaṃ tathā

paradravyāpaharaṇaṃ paradveṣasamanvitam /
mānasaṃ vācikaṃ kāyaṃ yatpāpaṃ pāpasambhavam

sahasranāmapaṭhanāt sarvaṃ naśyati tatkṣaṇāt /
mahādāridryayukto yo vaiṣṇavo viṣṇubhaktimān

kārtikyāṃ sampaṭhedrātrau śatamaṣṭottaraṃ kramāt /
pītāmbaradharo dhīmān sugandhaiḥ puṣpacandanaiḥ

pustakaṃ pūjayitvā tu naivedyādibhireva ca /
rādhādhyānāṅkito dhīro vanamālāvibhūṣitaḥ

śatamaṣṭottaraṃ devi paṭhennāmasahasrakam /
caitraśukle ca kṛṣṇe ca kuhūsaṅkrāntivāsare

paṭhitavyaṃ prayatnena trailokyaṃ mohayet kṣaṇāt /
tulasīmālayā yukto vaiṣṇavo bhaktitatparaḥ

ravivāre ca śukre ca dvādaśyāṃ śrāddhavāsare /
brāhmaṇaṃ pūjayitvā ca bhojayitvā vidhānataḥ

paṭhennāmasahasraṃ ca tataḥ siddhiḥ prajāyate /
mahāniśāyāṃ satataṃ vaiṣṇavo yaḥ paṭhet sadā

deśāntaragatā lakṣmīḥ samāyāti na saṃśayaḥ /
trailokye ca mahādevi sundaryaḥ kāmamohitāḥ

mugdhāḥ svayaṃ samāyānti vaiṣṇavaṃ ca bhajanti tāḥ /
rogī rogāt pramucyeta baddho mucyeta bandhanāt

gurviṇī janayetputraṃ kanyā vindati satpatim /
rājāno vaśyatāṃ yānti kiṃ punaḥ kṣudramānavāḥ

sahasranāmaśravaṇāt paṭhanāt pūjanāt priye /
dhāraṇāt sarvamāpnoti vaiṣṇavo nātra saṃśayaḥ

vaṃśīvaṭe cānyavaṭe tathā pippalake'tha vā /
kadambapādapatale gopālamūrtisaṃnidhau // १५/
yaḥ paṭhedvaiṣṇavo nityaṃ sa yāti harimandiram /
kṛṣṇenoktaṃ rādhikāyai mayā proktaṃ tathā śive

nāradāya mayā proktaṃ nāradena prakāśitam /
mayā tubhyaṃ varārohe proktametatsudurlabham

gopanīyaṃ prayatnena na prakāśyaṃ kathañcana /
śaṭhāya pāpine caiva lampaṭāya viśeṣataḥ

na dātavyaṃ na dātavyaṃ na dātavyaṃ kadācana /
deyaṃ śiṣyāya śāntāya viṣṇubhaktiratāya ca

godānabrahmayajñādervājapeyaśatasya ca /
aśvamedhasahasrasya phalaṃ pāṭhe bhavet dhruvam

mohanaṃ stambhanaṃ caiva māraṇoccāṭanādikam /
yadyadvāñchati cittena tattatprāpnoti vaiṣṇavaḥ

ekādaśyāṃ naraḥ snātvā sugandhidravyatailakaiḥ /
āhāraṃ brāhmaṇe dattvā dakṣiṇāṃ svarṇabhūṣaṇam

tata ārambhakartāsya sarvaṃ prāpnoti mānavaḥ /
śatāvṛttaṃ sahasraṃ ca yaḥ paṭhedvaiṣṇavo janaḥ

śrīvṛndāvanacandrasya prasādātsarvamāpnuyāt /
yadgṛhe pustakaṃ devi pūjitaṃ caiva tiṣṭhati

na mārī na ca durbhikṣaṃ nopasargabhayaṃ kvacit /
sarpādyā bhūtayakṣādyā naśyante nātra saṃśayaḥ

śrīgopālo mahādevi vasettasya gṛhe sadā /
gṛhe yatra sahasraṃ ca nāmnāṃ tiṣṭhati pūjitam

// ॐ tatsaditi śrīsammohanatantre pārvatīśvarasaṃvāde
gopālasahasranāmastotraṃ sampūrṇam //
>