gopālākṣayakavacam · Chapter 1

śrī gaṇeśāya namaḥ /
śrīnārada uvāca /
indrādyamaravargeṣu brahmanyatparamā'dbhutam /
akṣayaṃ kavacaṃ nāma kathayasva mama prabho

yaddhṛtvā''karṇya vīrastu trailokya vijayī bhavet /
brahmovāca /
śṛṇu putra muniśreṣṭha kavacaṃ paramādbhutam

indrādidevavṛndaiśca nārāyaṇamukhācchratam /
trailokyavijayasyāsya kavacasya prajāpatiḥ

ṛṣiśchando devatā ca sadā nārāyaṇaḥ prabhuḥ /
asya śrītrailokyavijayākṣayakavacasya prajāpatiṛrṣiḥ/,
anuṣṭupchandaḥ/, śrīnārāyaṇaḥ paramātmā devatā/,
dharmārthakāmamokṣārthe jape viniyogaḥ /
pādau rakṣatu govindo jaṅghe pātu jagatprabhuḥ

ūrū dvau keśavaḥ pātu kaṭī dāmodarastataḥ /
vadanaṃ śrīhariḥ pātu nāḍīdeśaṃ ca me'cyutaḥ

vāmapārśvaṃ tathā viṣṇurdakṣiṇaṃ ca sudarśanaḥ /
bāhumūle vāsudevo hṛdayaṃ ca janārdanaḥ

kaṇṭhaṃ pātu varāhaśca kṛṣṇaśca mukhamaṇḍalam /
karṇau me mādhavaḥ pātu hṛṣīkeśaśca nāsike

netre nārāyaṇaḥ pātu lalāṭaṃ garuḍadhvajaḥ /
kapolaṃ keśavaḥ pātu cakrapāṇiḥ śirastathā

prabhāte mādhavaḥ pātu madhyāhne madhusūdanaḥ /
dinānte daityanāśaśca rātrau rakṣatu candramāḥ

pūrvasyāṃ puṇḍarīkākṣo vāyavyāṃ ca janārdanaḥ /
iti te kathitaṃ vatsa sarvamantraughavigraham

tava snehānmayā''khyātaṃ na vaktavyaṃ tu kasyacit /
kavacaṃ dhārayedyastu sādhako dakṣiṇe bhuje

devā manuṣyā gandharvā yajñāstasya na saṃśayaḥ /
yoṣidvāmabhuje caiva puruṣo dakṣiṇe bhuje

nibhṛyātkavacaṃ puṇyaṃ sarvasiddhiyuto bhavet /
kaṇṭhe yo dhārayedetat kavacaṃ matsvarūpiṇam

yuddhe jayamavāpnoti dyūte vāde ca sādhakaḥ /
sarvathā jayamāpnoti niścitaṃ janmajanmani

aputro labhate putraṃ roganāśastathā bhavet /
sarvatāpapramuktaśca viṣṇulokaṃ sa gacchati

// iti brahmasaṃhitoktaṃ śrīgopālākṣayakavacaṃ sampūrṇam //