gaṅgāṣṭakam · Chapter 1

atha śrīmadvāmīkiviracitaṃ gaṅgāṣṭakam //
mātaḥ śailasutā-sapatni vasudhā-śṛṅgārahārāvali
svargārohaṇa-vaijayanti bhavatīṃ bhāgīrathīṃ prārthaye /
tvattīre vasataḥ tvadambu pibatastvadvīciṣu preṅkhataḥ
tvannāma smaratastvadarpitadṛśaḥ syānme śarīravyayaḥ

tvattīre tarukoṭarāntaragato gaṅge vihaṅgo paraṃ
tvannīre narakāntakāriṇi varaṃ matsyo'thavā kacchapaḥ /
naivānyatra madāndhasindhuraghaṭāsaṅghaṭṭaghaṇṭāraṇa-
tkārastatra samastavairivanitā-labdhastutirbhūpatiḥ

ukṣā pakṣī turaga uragaḥ ko'pi vā vāraṇo vā'-
vārīṇaḥ syāṃ janana-maraṇa-kleśaduḥkhāsahiṣṇuḥ /
na tvanyatra pravirala-raṇatkiṅkiṇī-kvāṇamitraṃ
vārastrībhiścamaramarutā vījito bhūmipālaḥ

kākairniṣkuṣitaṃ śvabhiḥ kavalitaṃ gomāyubhirluṇṭitaṃ
srotobhiścalitaṃ taṭāmbu-lulitaṃ vīcībhirāndolitam /
divyastrī-kara-cārucāmara-marutsaṃvījyamānaḥ kadā
drakṣye'haṃ parameśvari tripathage bhāgīrathī svaṃ vapuḥ

abhinava-bisavallī-pādapadmasya viṣṇoḥ
madana-mathana-maulermālatī-puṣpamālā /
jayati jayapatākā kāpyasau mokṣalakṣmyāḥ
kṣapita-kalikalaṅkā jāhnavī naḥ punātu

etattāla-tamāla-sāla-saralavyālola-vallīlatā-
cchatraṃ sūryakara-pratāparahitaṃ śaṅkhendu-kundojjvalam /
gandharvāmara-siddha-kinnaravadhū-tuṅgastanāspālitaṃ
snānāya prativāsaraṃ bhavatu me gāṅgaṃ jalaṃ nirmalam

gāṅgaṃ vāri manohāri murāri-caraṇacyutam /
tripurāri-śiraścāri pāpahāri punātu mām

pāpāpahāri duritāri taraṅgadhāri
śailapracāri girirāja-guhāvidāri /
jhaṅkārakāri haripāda-rajopahāri
gāṅgaṃ punātu satataṃ śubhakāri vāri

gaṅgāṣṭakaṃ paṭhati yaḥ prayataḥ prabhāte
vālmīkinā viracitaṃ śubhadaṃ manuṣyaḥ /
prakṣālya gātra-kalikalmaṣa-paṅka-māśu
mokṣaṃ labhet patati naiva naro bhavābdhau

// iti vālmīkiviracitaṃ gaṅgāṣṭakaṃ sampūrṇam //