gaṇeśastotram · Chapter 1

śrīgaṇeśāya namaḥ /
nārada uvāca /
praṇamya śirasā devaṃ gaurīputraṃ vināyakam /
bhaktāvāsaṃ smarenityaṃ āyuḥkāmārthasiddhaye

prathamaṃ vakratuṇḍaṃ ca ekadantaṃ dvitīyakam /
tṛtīyaṃ kṛṣṇapiṅgākṣaṃ gajavaktraṃ caturthakam

lambodaraṃ pañcamaṃ ca ṣaṣṭhaṃ vikaṭameva ca /
saptamaṃ vighnarājendraṃ dhūmravarṇaṃ tathāṣṭamam

navamaṃ bhālacandraṃ ca daśamaṃ tu vināyakam /
ekādaśaṃ gaṇapatiṃ dvādaśaṃ tu gajānanam

dvādaśaitāni nāmāni trisaṃdhyaṃ yaḥ paṭhennaraḥ /
na ca vighnabhayaṃ tasya sarvasiddhikaraḥ prabhuḥ

vidyārthī labhate vidyāṃ dhanārthī labhate dhanam /
putrārthī labhate putrānmokṣārthī labhate gatim

japedgaṇapatistotraṃ ṣaḍbhirmāsaiḥ phalaṃ labhet /
saṃvatsareṇa siddhiṃ ca labhate nātra saṃśayaḥ

aṣṭebhyo brāhmaṇebhyaśca likhitvā yaḥ samarpayet /
tasya vidyā bhavetsarvā gaṇeśasya prasādataḥ

// iti śrīnāradapurāṇe saṃkaṭanāśanaṃ gaṇeśastotraṃ saṃpūrṇam //