ekādaśamukhahanumatkavacam · Chapter 1

śrīgaṇeśāya namaḥ /
lopāmudrā uvāca /
kumbhodbhava dayāsindho śrutaṃ hanumataḥ param /
yantramantrādikaṃ sarvaṃ tvanmukhodīritaṃ mayā

dayāṃ kuru mayi prāṇanātha veditumutsahe /
kavacaṃ vāyuputrasya ekādaśamukhātmanaḥ

ityevaṃ vacanaṃ śrutvā priyāyāḥ praśrayānvitam /
vaktuṃ pracakrame tatra lopāmudrāṃ prati prabhuḥ

agastya uvāca /
namaskṛtvā rāmadūtāṃ hanumantaṃ mahāmatim /
brahmaproktaṃ tu kavacaṃ śrṛṇu sundari sādaram

sanandanāya sumahaccaturānanabhāṣitam /
kavacaṃ kāmadaṃ divyaṃ rakṣaḥkulanibarhaṇam

sarvasampatpradaṃ puṇyaṃ martyānāṃ madhurasvare /
ॐ asya śrīkavacasyaikādaśavaktrasya dhīmataḥ

hanumatstutimantrasya sanandana ṛṣiḥ smṛtaḥ /
prasannātmā hanūmāṃśca devatā parikīrtitā

chando'nuṣṭup samākhyātaṃ bījaṃ vāyusutastathā /
mukhyaḥ prāṇaḥ śaktiriti viniyogaḥ prakīrtitaḥ

sarvakāmārthasiddhayarthaṃ japa evamudīrayet /
ॐ sphreṃbījaṃ śaktidhṛk pātu śiro me pavanātmajaḥ

krauṃbījātmā nayanayoḥ pātu māṃ vānareśvaraḥ /
kṣaṃbījarūpaḥ karṇau me sītāśokavināśanaḥ

glauṃbījavācyo nāsāṃ me lakṣmaṇaprāṇadāyakaḥ /
vaṃbījārthaśca kaṇṭhaṃ me pātu cākṣayakārakaḥ

aiṃbījavācyo hṛdayaṃ pātu me kapināyakaḥ /
vaṃbījakīrtitaḥ pātu bāhū me cāñjanīsutaḥ

hrāṃbījo rākṣasendrasya darpahā pātu codaram /
hrasauṃbījamayo madhyaṃ pātu laṅkāvidāhakaḥ

hrīṃbījadharaḥ pātu guhyaṃ devendravanditaḥ /
raṃbījātmā sadā pātu corū vārdhilaṃghanaḥ

sugrīvasacivaḥ pātu jānunī me manojavaḥ /
pādau pādatale pātu droṇācaladharo hariḥ

āpādamastakaṃ pātu rāmadūto mahābalaḥ /
pūrve vānaravaktro māmāgneyyāṃ kṣatriyāntakṛt

dakṣiṇe nārasiṃhastu naiṛrtyāṃ gaṇanāyakaḥ /
vāruṇyāṃ diśi māmavyātkhagavaktro harīśvaraḥ

vāyavyāṃ bhairavamukhaḥ kauberyāṃ pātu māṃ sadā /
kroḍāsyaḥ pātu māṃ nityamaiśānyaṃ rudrarūpadhṛk

ūrdhvaṃ hayānanaḥ pātu guhyādhaḥ sumukhastathā /
rāmāsyaḥ pātu sarvatra saumyarūpo mahābhujaḥ

ityevaṃ rāmadūtasya kavacaṃ yaḥ paṭhetsadā /
ekādaśamukhasyaitadgopyaṃ vai kīrtitaṃ mayā

rakṣoghnaṃ kāmadaṃ saumyaṃ sarvasampadvidhāyakam /
putradaṃ dhanadaṃ cograśatrusaṃghavimardanam

svargāpavargadaṃ divyaṃ cintitārthapradaṃ śubham /
etatkavacamajñātvā mantrasiddhirna jāyate

catvāriṃśatsahasrāṇi paṭhecchuddhātmako naraḥ /
ekavāraṃ paṭhennityaṃ kavacaṃ siddhidaṃ pumān

dvivāraṃ vā trivāraṃ vā paṭhannāyuṣyamāpnuyāt /
kramādekādaśādevamāvartanajapātsudhīḥ

varṣānte darśanaṃ sākṣāllabhate nātra saṃśayaḥ /
yaṃ yaṃ cintayate cārthaṃ taṃ taṃ prāpnoti pūruṣaḥ

brahmodīritametaddhi tavāgre kathitaṃ mahata

ityevamuktvā vacanaṃ maharṣistūṣṇīṃ babhūvendumukhīṃ nirīkṣya /
saṃhṛṣṭacittāpi tadā tadīyapādā nanāmātimudā svabhartuḥ

// ityagastyasārasaṃhitāyāmekādaśamukhahanumatkavacaṃ sampūrṇam //