Devi Kavacham · Chapter p1

atha devyāḥ kavacam
ॐ asya śrīcaṇḍīkavacasya brahmā ṛṣiḥ anuṣṭupa chandaḥ cāmuṇḍā devatā aṅganyāsoktamātaro bījam digbandhadevatāstatvam
śrījagadambāprītyarthe saptaśatīpāṭhāṅgatvena jape viniyogaḥ /
ॐ namaścaṇḍikāyai //
mārkaṇḍeya uvāca
ॐ yadguhyaṃ paramaṃ loke sarvarakṣākaraṃ nṛṇām /
yanna kasyacidākhyātaṃ tanme brūhi pitāmaha

brahmovāca
asti guhyatamaṃ vipra sarvabhūtopakārakam /
devyāstu kavacaṃ puṇyaṃ tacchṛṇuṣva mahāmune

prathamaṃ śailaputrī ca dvitīyaṃ brahmacāriṇī /
tṛtīyaṃ candraghaṇṭeti kūṣmāṇḍeti caturthakam

paccamaṃ skandamāteti ṣaṣṭhaṃ kātyāyanīti ca /
saptamaṃ kālarātrīti mahāgaurīti cāṣṭamam

navamaṃ siddhidātrī ca navadurgāḥ prakīrtitāḥ /
uktānyetāni nāmāni brahmaṇaiva mahātmanā

agninā dahyamānastu śatrumadhye gato raṇe /
viṣame durgame caiva bhayārtāḥ śaraṇaṃ gatāḥ

na teṣāṃ jāyate kiṃcidaśubhaṃ raṇasaṃkaṭe /
nāpadaṃ tasya paśyāmi śokaduḥkhabhayaṃ na hi

yaistu bhaktyā smṛtā nūnaṃ teṣāṃ vṛddhiḥ prajāyate /
ye tvāṃ smaranti deveśi rakṣase tānna saṃśayaḥ

pretasaṃsthā tu cāmuṇḍā vārāhī mahiṣāsanā /
aindrī gajasamāruḍhā vaiṣṇavī garuḍāsanā

māheśvarī vṛṣārūḍhā kaumārī śikhivāhanā /
lakṣmīḥ padmāsanā devī padmahastā haripriyā

śvetarūpadharā devī īśvarī vṛṣavāhanā /
brāhamī haṃsasamāruḍhā sarvābharaṇabhūṣitā

ityetā mātaraḥ sarvāḥ sarvayogasamanvitāḥ /
nānābharaṇaśobhāḍhyā nānāratnopaśobhitāḥ

dṛśyante rathamārūḍhā devyaḥ krodhasamākulāḥ |
śaṅkhaṃ cakraṃ gadāṃ śaktiṃ halaṃ ca musalāyudham

kheṭakaṃ tomaraṃ caiva paraśuṃ pāśameva ca /
kuntāyudhaṃ triśūlaṃ ca śārṅgamāyudhamuttamam

daityānāṃ dehanāśāya bhaktānāmabhayāya ca /
dhārayantyāyudhānītthaṃ devānāṃ ca hitāya vai

namaste'stu mahāraudre mahāghora parākrame /
mahābale mahotsāhe mahābhayavināśini

trāhi māṃ devi duṣprekṣye śatruṇāṃ bhayavarddhini /
prācyāṃ rakṣatu māmaindrī āgneyyāmagnidevatā

dakṣiṇe'vatu vārāhī naiṛtyāṃ khaḍgadhāriṇī /
pratīcyāṃ vāruṇī rakṣed vāyavyāṃ mṛgavāhinī

udīcyāṃ pātu kaumārī aiśānyāṃ śūladhāriṇī /
ūrdhvaṃ brahmāṇi me rakṣedadhastād vaiṣṇavī tathā

evaṃ daśa diśo rakṣeccāmuṇḍā śavavāhanā /
jayā me cāgrataḥ pātu vijayā pātu pṛṣṭataḥ

ajitā vāmapārśve tu dakṣiṇe cāparājitā /
śikhāmudyotinī rakṣedumā mūrdhni vyavasthitā

mālādharī lalāṭe ca bhruvau rakṣed yaśasvinī /
trinetrā ca bhruvormadhye yamaghaṇṭā ca nāsike

śaṅkhinī cakṣuṣormadhye śrotrayordvāravāsinī /
kapolau kālikā rakṣetkarṇamūle tu śāṅkarī

nāsikāyāṃ sugandhā ca uttaroṣṭhe ca carcikā /
adhare cāmṛtakalā jivhāyāṃ ca sarasvatī

dantāna rakṣatu kaumārī kaṇṭhadeśe tu caṇḍikā /
ghaṇṭikāṃ citraghaṇṭā ca mahāmāyā ca tāluke

kāmākṣī cibukaṃ rakṣed vācaṃ me sarvamaṅgalā /
grīvāyāṃ bhadrakālī ca pṛṣṭhavaṃśe dhanurdharī

nīlagrīvā bahiḥkaṇṭhe nalikāṃ nalakūbarī /
skandhayoḥ khaṅginī rakṣed bāhū me vajradhāriṇī

hastayordaṇḍinī rakṣedambikā cāṅgulīṣu ca /
nakhāñchūleśvarī rakṣetkukṣau rakṣetkuleśvarī

stanau rakṣenmahādevī manaḥ śokavināśinī /
hṛdaye lalitā devī udare śūladhāriṇī

nābhau ca kāminī rakṣed guhyaṃ guheśvarī tathā /
pūtanā kāmikā meḍhraṃ gude mahiṣavāhinī

kaṭyāṃ bhagavatī rakṣejjānunī vindhyavāsinī /
jaṅghe mahābalā rakṣetsarvakāmapradāyinī

gulphayornārasiṃhī ca pādapṛṣṭhe tu taijasi /
pādāṅgulīṣu śrī rakṣetpādādhastalavāsinī

nakhān daṃṣṭrākarālī ca keśāṃścaivordhvakeśinī /
romakūpeṣu kauberī tvacaṃ vāgīśvarī tathā

raktamajjāvasāmāṃsānyasthimedāṃsi pārvatī /
antrāṇi kālarātriśca pittaṃ ca mukuṭeśvarī

padmāvatī padmakośe kaphe cūḍāmaṇistathā /
jvālāmukhī nakhajvālāmabhedyā sarvasandhiṣu

śukraṃ brahmāṇi me rakṣecchāyāṃ chatreśvarī tathā /
ahaṃkāraṃ mano buddhiṃ rakṣenme dharmadhāriṇī

prāṇāpānau tathā vyānamudānaṃ ca samānakam /
vajrahastā ca me rakṣetprāṇaṃ kalyāṇaśobhanā

rase rupe ca gandhe ca śabde sparśe ca yoginī /
satvaṃ rajastamaścaiva rakṣennārāyaṇī sadā

āyu rakṣatu vārāhī dharmaṃ rakṣatu vaiṣṇavī /
yaśaḥ kīrtiṃ ca lakṣmīṃ ca dhanaṃ vidyāṃ ca cakriṇī

gotramindrāṇi me rakṣetpaśūnme rakṣa caṇḍike /
putrāna rakṣenmahālakṣmīrbhāryāṃ rakṣatu bhairavī

panthānaṃ supathā rakṣenmārgaṃ kṣemakarī tathā /
rājadvāre mahālakṣmīrvijayā sarvataḥ sthitā

rakṣāhīnaṃ tu yatsthānaṃ varjitaṃ kavacena tu /
tatsarvaṃ rakṣa me devi jayantī pāpanāśinī

padamekaṃ na gacchettu yadīcchecchubhamātmanaḥ /
kavacenāvṛto nityaṃ yatra yatraiva gacchati

tatra tatrārthalābhaśca vijayaḥ sārvakāmikaḥ /
yaṃ yaṃ cintayate kāmaṃ taṃ taṃ prāpnoti niścitam/
paramaiśvaryamatulaṃ prāpsyate bhūtale pumāna

nirbhayo jāyate martyaḥ saṃgrāmeṣvaparājitaḥ /
trailokye tu bhavetpūjyaḥ kavacenāvṛtaḥ pumāna

idaṃ tu devyāḥ kavacaṃ devānāmapi durlabham /
yaḥ paṭhetprayato nityaṃ trisandhyaṃ śraddhayānvitaḥ

daivī kalā bhavettasya trailokyeṣvaparājitaḥ /
jīved varṣaśataṃ sāgramapamṛtyuvivarjitaḥ

naśyanti vyādhayaḥ sarve lūtāvisphoṭakādayaḥ /
sthāvaraṃ jaṅagamaṃ caiva kṛtrimaṃ cāpi yadviṣam

abhicārāṇi sarvāṇi mantrayantrāṇi bhūtale /
bhūcarāḥ khecarāśvaiva jalajāścopadeśikāḥ

sahasā kulajā mālā ḍākinī śākinī tathā /
antarikṣacarā ghorā ḍākinyaśca mahābalāḥ

grahabhūtapiśācāśca yakṣagandharvarākṣasāḥ /
brahmarākṣasavetālāḥ kūṣmāṇḍā bhairavādayaḥ

naśyanti darśanāttasya kavace hṛdi saṃsthite /
mānonnatirbhaved rājñastejovṛddhikaraṃ param

yaśasā varddhate so'pi kīrtimaṇḍitabhūtale /
japetsaptaśatīṃ caṇḍīṃ kṛtvā tu kavacaṃ purā

yāvadbhūmaṇḍalaṃ dhatte saśailavanakānanam /
tāvattiṣṭhati medinyāṃ santatiḥ putrapautrikī

dehānte paramaṃ sthānaṃ yatsurairapi durlabham /
prāpnoti puruṣo nityaṃ mahāmāyāprasādataḥ

labhate paramaṃ rūpaṃ śivena saha modate //ॐ