dattātreyavajrakavacam · Chapter 1

śrīgaṇeśāya namaḥ / śrīdattātreyāya namaḥ /
ṛṣaya ūcuḥ /
kathaṃ saṅkalpasiddhiḥ syādvedavyāsa kalau yuge /
dharmārthakāmamokṣāṇāṃ sādhanaṃ kimudāhṛtam

vyāsa uvāca /
śṛṇvantuṛṣayaḥ sarve śīghraṃ saṅkalpasādhanam /
sakṛduccāramātreṇa bhogamokṣapradāyakam

gaurīśṛṅge himavataḥ kalpavṛkṣopaśobhitam /
dīpte divyamahāratnahemamaṇḍapamadhyagam

ratnasiṃhāsanāsinaṃ prasannaṃ parameśvaram /
mandasmitamukhāmbhojaṃ śaṅkaraṃ prāha pārvatī

śrīdevyuvāca /
devadeva mahādeva lokaśaṅkara śaṅkara /
mantrajālāni sarvāṇi yantrajālāni kṛtsnaśaḥ

tantrajālānyanekāni mayā tvattaḥ śrutāni vai /
idānīṃ draṣṭumicchāmi viśeṣeṇa mahītalam

ityudīritamākarṇya pārvatyā parameśvaraḥ /
kareṇāmṛjya santoṣātpārvatīṃ pratyabhāṣata

mayedānīṃ tvayā sārdhaṃ vṛṣamāruhya gamyate /
ityuktvā vṛṣamāruhya pārvatyā saha śaṅkaraḥ

yayau bhūmaṇḍalaṃ draṣṭuṃ gauryāścitrāṇi darśayan /
kvacit vindhyācalaprānte mahāraṇye sudurgame

tatra vyāhartumāyāntaṃ bhillaṃ paraśudhāriṇam /
vardhyamānaṃ mahāvyāghraṃ nakhadaṇṣṭrābhirāvṛtam

atīva citracāritryaṃ vajrakāyasamāyutam /
aprayatnamanāyāsamakhilaṃ sukhamāsthitam

palāyantaṃ mṛgaṃ paścādvyāghro bhītyā palāyitaḥ /
etadāścaryamālokya pārvatī prāha śaṅkaram

śrīpārvatyuvāca /
kimāścaryaṃ kimāścaryamagre śambho nirīkṣyatām /
ityuktaḥ sa tataḥ śambhurdṛṣṭvā prāha purāṇavit

śrīśaṅkara uvāca /
gauri vakṣyāmi te citramavāṅmānasagocaram /
adṛṣṭapūrvamasmābhirnāsti kiñcanna kutracit

mayā samyak samāsena vakṣyate śṛṇu pārvati /
ayaṃ dūraśravā nāma bhillaḥ paramadhārmikaḥ

samitkuśaprasūnāni kandamūlaphalādikam /
pratyahaṃ vipinaṃ gatvā samādāya prayāsataḥ

priye pūrvaṃ munīndrebhyaḥ prayacchati na vāñchati /
te'pi tasminnapi dayāṃ kurvate sarvamauninaḥ

dalādano mahāyogī vasanneva nijāśrame /
kadācidasmarat siddhaṃ dattātreyaṃ digambaram

dattātreyaḥ smartṛgāmī cetihāsaṃ parīkṣitum /
tatkṣaṇātso'pi yogīndro dattātreyaḥ samutthitaḥ

taṃ dṛṣṭvā''ścaryatoṣābhyāṃ dalādanamahāmuniḥ /
sampūjyāgre niṣīdantaṃ dattātreyamuvāca tam

mayopahūtaḥ samprāpto dattātreya mahāmune /
smartṛgāmī tvamityetat kiṃvadantī parīkṣitum

mayādya saṃsmṛto'si tvamaparādhaṃ kṣamasva me /
dattātreyo muniṃ prāha mama prakṛtirīdṛśī

abhaktyā vā subhaktyā vā yaḥ smarenmāmananyadhīḥ /
tadānīṃ tamupāgatya dadāmi tadabhīpsitam

dattātreyo muniṃ prāha dalādanamunīśvaram /
yadiṣṭaṃ tadvṛṇīṣva tvaṃ yat prāpto'haṃ tvayā smṛtaḥ

dattātreyaṃ muniḥ prāha mayā kimapi nocyate /
tvaccitte yatsthitaṃ tanme prayaccha munipuṅgava

śrīdattātreya uvāca /
mamāsti vajrakavacaṃ gṛhāṇetyavadanmunim /
tathyetyaṅgīkṛtavate dalādanamunaye muniḥ

svavajrakavacaṃ prāha ṛṣicchandaḥpuraḥsaram /
nyāsaṃ dhyānaṃ phalaṃ tatra prayojanamaśeṣataḥ

asya śrīdattātreyavajrakavacastotramantrasya/,
kirātarūpī mahārudra ṛṣiḥ/, anuṣṭup chandaḥ/,
śrīdattātreyo devatā/, drāṃ bījaṃ/, āṃ śaktiḥ/,
krauṃ kīlakaṃ/, ॐ ātmane namaḥ / ॐ drīṃ manase namaḥ /
ॐ āṃ drīṃ śrīṃ sauḥ ॐ klāṃ klīṃ klūṃ klaiṃ klauṃ klaḥ /
śrīdattātreyaprasādasiddhyarthe jape viniyogaḥ /
ॐ drāṃ aṅguṣṭhābhyāṃ namaḥ /
ॐ drīṃ tarjanībhyāṃ namaḥ /
ॐ drūṃ madhyamābhyāṃ namaḥ /
ॐ draiṃ anāmikābhyāṃ namaḥ /
ॐ drauṃ kaniṣṭhikābhyāṃ namaḥ /
ॐ draḥ karatalakarapṛṣṭhābhyāṃ namaḥ /
evaṃ hṛdayādi nyāsaḥ /
ॐ bhūrbhuvaḥsvaromiti digbandhaḥ /
atha dhyānam /
jadadaṅkurakandāya saccidānandamūrtaye /
dattātreyāya yogīndracandrāya paramātmane //
kadā yogī kadā bhogī kadā nagnaḥ piśācavat /
dattātreyo hariḥ sākṣādbhuktimuktipradāyakaḥ //
vārāṇasīpurasnāyī kolhāpurajapādaraḥ /
māhurīpurabhikṣāśī sahyaśāyī digambara //
indranīlasamākāraścandrakāntisamadyutiḥ /
vaiḍuryasadṛśasphūrtiścalatkiñcijjaṭādharaḥ //
snigdhadhāvalyayuktākṣo'tyantanīlakanīnikaḥ /
bhrūvakṣaḥśmaśrunīlāṅkaḥ saśāṅkasadṛśānanaḥ //
hāsanirjitanīhāraḥ kaṇṭhanirjitakambukaḥ /
māṃsalāṃso dīrghabāhuḥ pāṇinirjitapallavaḥ //
viśālapīnavakṣāśca tāmrapāṇirdalodaraḥ /
pṛthulaśroṇilalito viśālajaghanasthalaḥ //
rambhāstambhopamānorurjānupūrvaikajaṅghakaḥ /
gūḍhagulphaḥ kūrmapṛṣṭholasatpādoṣaristhalaḥ //
raktāravindasadṛśaramaṇīyapadādharaḥ /
carmāmbaradharo yogī smartṛgāmī kṣaṇe kṣaṇe //
jñānopadeśanīrato vipaddharaṇadīkṣitaḥ /
siddhāsanasamāsīna ṛjukāyo hasanmukhaḥ //
vāmahastena varado dakṣiṇenābhayaṅkaraḥ /
bālonmattapiśācībhiḥ kvacidyuktaḥ parīkṣitaḥ //
tyāgī bhogī mahāyogī nityānando nirañjanaḥ /
sarvarūpī sarvadātā sarvagaḥ sarvakāmadaḥ //
bhasmoddhūlitasarvāṅgo mahāpātakanāśanaḥ /
bhuktiprado muktidātā jīvanmukto na saṃśayaḥ //
evaṃ dhyātvā'nanyacitto madvajrakavacaṃ paṭhet /
māmeva paśyansarvatra sa mayā saha saṅcaret //
digambaraṃ bhasmasugandhalepanaṃ cakraṃ triśūlaṃ ḍamaruṃ gadāyudham /
padmāsanaṃ yogimunīndravanditaṃ datteti nāmasmaraṇena nityam //
ॐ dattātreyaḥ śiraḥ pātu sahasrābjeṣu saṃsthitaḥ /
bhālaṃ pātvānasūyeyaścandramaṇḍalamadhyagaḥ

kūrcaṃ manomayaḥ pātu haṃ kṣaṃ dvidalapadmabhūḥ /
jyotirūpo'kṣiṇī pātu pātu śabdātmakaḥ śrutī

nāsikāṃ pātu gandhātmā mukhaṃ pātu rasātmakaḥ /
jihvāṃ vedātmakaḥ pātu dantoṣṭhau pātu dhārmikaḥ

kapolāvatribhūḥ pātu pātvaśeṣaṃ mamātvavit /
svarātmā ṣoḍaśārābjasthitaḥ svātmā'vatādgalam

skandhau candrānujaḥ pātu bhujau pātu kṛtādibhūḥ /
jatruṇī śatrujit pātu pātu vakṣaḥsthalaṃ hariḥ

kādiṭhāntadvādaśārapadmago marudātmakaḥ /
yogīśvareśvaraḥ pātu hṛdayaṃ hṛdayasthitaḥ

pārśve hariḥ pārśvavartī pātu pārśvasthitaḥ smṛtaḥ /
haṭhayogādiyogajñaḥ kukṣī pātu kṛpānidhiḥ

ḍakārādiphakārāntadaśārasarasīruhe /
nābhisthale vartamāno nābhiṃ vahnyātmako'vatu

vahnitatvamayo yogī rakṣatānmaṇipūrakam /
kaṭiṃ kaṭisthabrahmāṇḍavāsudevātmako'vatu

vakārādilakārāntaṣaṭpatrāmbujabodhakaḥ /
jalatatvamayo yogī svādhiṣṭhānaṃ mamāvatu

siddhāsanasamāsīna ūrū siddheśvaro'vatu /
vādisāntacatuṣpatrasaroruhanibodhakaḥ

mūlādhāraṃ mahīrūpo rakṣatādvīryanigrahī /
pṛṣṭhaṃ ca sarvataḥ pātu jānyunyastakarāmbujaḥ

jaṅghe pātvavadhūtendraḥ pātvaṅghrī tīrthapāvanaḥ /
sarvāṅgaṃ pātu sarvātmā romāṇyavatu keśavaḥ

carma carmāmbaraḥ pātu raktaṃ bhaktipriyo'vatu /
māṃsaṃ māṃsakaraḥ pātu majjāṃ majjātmako'vatu

asthīni sthiradhīḥ pāyānmedhāṃ vedhāḥ prapālayet /
śukraṃ sukhakaraḥ pātu cittaṃ pātu dṛḍhākṛtiḥ

manobuddhimahaṅkāraṃ hṛṣīkeśātmako'vatu /
karmendriyāṇi pātvīśaḥ pātu jñānendriyāṇyajaḥ

bandhūn bandhūttamaḥ pāyācchatrubhyaḥ pātu śatrujit /
gṛhārāmadhanakṣetraputrādīñchaṅkaro'vatu

bhāryāṃ prakṛtivit pātu paśvādīnpātu śārṅgabhṛt /
prāṇānpātu pradhānajño bhakṣyādīnpātu bhāskaraḥ

sukhaṃ candrātmakaḥ pātu duḥkhāt pātu purāntakaḥ /
paśūnpaśūpatiḥ pātu bhūtiṃ bhūteśvaro mama

prācyāṃ viṣaharaḥ pātu pātvāgneyyāṃ makhātmakaḥ /
yāmyāṃ dharmātmakaḥ pātu naiṛtyāṃ sarvavairihṛt

varāhaḥ pātu vāruṇyāṃ vāyavyāṃ prāṇado'vatu /
kauberyāṃ dhanadaḥ pātu pātvaiśānyāṃ mahāguruḥ

urdhvaṃ pātu mahāsiddhaḥ pātvadhastājjaṭādharaḥ /
rakṣāhīnaṃ tu yatsthānaṃ rakṣatvādimunīśvaraḥ

etanme vajrakavacaṃ yaḥ paṭhecchṛṇuyādapi /
vajrakāyaścirañjīvī dattātreyo'hamabruvam

tyāgī bhogī mahāyogī sukhaduḥkhavivarjitaḥ /
sarvatrasiddhasaṅkalpo jīvanmukto'dya vartate

ityuktvāntardadhe yogī dattātreyo digambaraḥ /
dalādano'pi tajjaptvā jīvanmuktaḥ sa vartate

bhillo dūraśravā nāma tadānīṃ śrutavādinam /
sakṛcchravaṇamātreṇa vajrāṅgo'bhavadapyasau

ityetadvajrakavacaṃ dattātreyasya yoginaḥ /
śrutvāśeṣaṃ śambhumukhāt punarapyāha pārvatī

pārvatyuvāca /
etatkavacamāhātmyaṃ vada vistarato mama /
kutra kena kadā jāpyaṃ kiṃ yajāpyaṃ kathaṃ katham

uvāca śambhustatsarvaṃ pārvatyā vinayoditam /
śrīśiva uvāca /
śruṇu pārvati vakṣyāmi samāhitamanāvilam

dharmārthakāmamokṣāṇāmidameva parāyaṇam /
hastyaśvarathapādātisarvaiśvaryapradāyakam

putramitrakalatrādisarvasantoṣasādhanam /
vedaśāstrādividyānāṃ nidhānaṃ paramaṃ hi tat

saṅgītaśāstrasāhityasatkavitvavidhāyakam /
buddhividyāsmṛtiprajñāmatiprauḍhipradāyakam

sarvasantoṣakaraṇaṃ sarvaduḥkhanivāraṇam /
śatru saṃhārakaṃ śīghraṃ yaśaḥkīrtivivardhanam

aṣṭasaṃkhyā mahārogāḥ sannipātāstrayodaśa /
ṣaṇṇavatyakṣirogāśca viṃśatirmeharogakāḥ

aṣṭādaśa tu kuṣṭhāni gulmānyaṣṭavidhānyapi /
aśītirvātarogāśca catvāriśattu paittikāḥ

viṃśatiśleṣmarogāśca kṣayacāturthikādayaḥ /
mantrayantrakuyogādyāḥ kalpatantrādinirmitāḥ

brahmarākṣasavetālakūṣmāṇḍādigrahodbhavāḥ /
saṅgajāḥ deśakālasthāstāpatrayasamutthitāḥ

navagrahasamudbhūtā mahāpātakasambhavāḥ /
sarve rogāḥ praṇaśyanti sahasrāvartanāddhruvam

ayutāvṛttimātreṇa vandhyā putravatī bhavet /
ayutadvitayāvṛttyā hyapamṛtyujayo bhavet

ayutatritayāccaiva khecaratvaṃ prajāyate /
sahasrādayutādarvāk sarvakāryāṇi sādhayet

lakṣāvṛtyā kāryasiddhirbhavetyeva na saṃśayaḥ /
viṣavṛkṣasya mūleṣu tiṣṭhan vai dakṣiṇāmukhaḥ

kurute māsamātreṇa vairiṇaṃ vikalendriyam /
audumbaratarormūle vṛddhikāmena jāpyate

śrīvakṣamūle śrīkāmī tintiṇī śāntikarmaṇi /
ojaskāmo'śvatthamūle strīkāmaiḥ sahakārake

jñānārthī tulasīmūle garbhagehe sutārthibhiḥ /
dhanārthibhistu sukṣetre paśukāmaistu goṣṭhake

devālaye sarvakāmaistatkāle sarvadarśitam /
nābhimātrajale sthitvā bhānumālokya yo japet

yuddhe vā śāstravāde vā sahasreṇa jayo bhavet /
kaṇṭhamātre jale sthitvā yo rātrau kavacaṃ paṭhet

jvarāpasmārakuṣṭhāditāpajvaranivāraṇam /
yatra yatsyātsthiraṃ yadyatprasannaṃ tannivartate

tena tatra hi japtavyaṃ tataḥ siddhirbhaveddhruvam /
ityuktvān ca śivo gaurye rahasyaṃ paramaṃ śubhaṃ

yaḥ paṭhet vajrakavacaṃ dattātreyosamo bhavet /
evaṃ śivena kathitaṃ himavatsutāyai proktaṃ

dalādamunaye'trisutenapūrvam yaḥ ko'pi vajrakavacaṃ /
paṭhatīha loke dattopamaścarati yogivaraścirāyuḥ

// iti śrīrudrayāmale himavatkhaṇḍe umāmaheśvarasaṃvāde śrīdattātreyavajrakavacastotraṃ sampūrṇam //