dattātreyastotram · Chapter 1

jaṭādharaṃ pāṃḍurāṃgaṃ śūlahastaṃ kṛpānidhim /
sarvarogaharaṃ devaṃ dattātreyamahaṃ bhaje

asya śrīdattātreyastotramaṃtrasya bhagavān nāradaṛṣiḥ /
anuṣṭup chandaḥ / śrīdattaparamātmā devatā /
śrīdattaprītyarthe jape viniyogaḥ //
jagadutpattikartre ca sthitisaṃhāra hetave /
bhavapāśavimuktāya dattātreya namo'stute

jarājanmavināśāya dehaśuddhikarāya ca /
digambaradayāmūrte dattātreya namo'stute

karpūrakāntidehāya brahmamūrtidharāya ca /
vedaśāstraparijñāya dattātreya namo'stute

rhasvadīrghakṛśasthūla-nāmagotra-vivarjita /
paṃcabhūtaikadīptāya dattātreya namo'stute

yajñabhokte ca yajñāya yajñarūpadharāya ca /
yajñapriyāya siddhāya dattātreya namo'stute

ādau brahmā madhya viṣṇuraṃte devaḥ sadāśivaḥ /
mūrtitrayasvarūpāya dattātreya namo'stute

bhogālayāya bhogāya yogayogyāya dhāriṇe /
jitendriyajitajñāya dattātreya namo'stute

digambarāya divyāya divyarūpadhrāya ca /
sadoditaparabrahma dattātreya namo'stute

jambudvīpamahākṣetramātāpuranivāsine /
jayamānasatāṃ deva dattātreya namo'stute

bhikṣāṭanaṃ gṛhe grāme pātraṃ hemamayaṃ kare /
nānāsvādamayī bhikṣā dattātreya namo'stute

brahmajñānamayī mudrā vastre cākāśabhūtale /
prajñānaghanabodhāya dattātreya namo'stute

avadhūtasadānandaparabrahmasvarūpiṇe /
videhadeharūpāya dattātreya namo'stute

satyaṃrūpasadācārasatyadharmaparāyaṇa /
satyāśrayaparokṣāya dattātreya namo'stute

śūlahastagadāpāṇe vanamālāsukandhara /
yajñasūtradharabrahman dattātreya namo'stute

kṣarākṣarasvarūpāya parātparatarāya ca /
dattamuktiparastotra dattātreya namo'stute

datta vidyāḍhyalakṣmīśa datta svātmasvarūpiṇe /
guṇanirguṇarūpāya dattātreya namo'stute

śatrunāśakaraṃ stotraṃ jñānavijñānadāyakam /
sarvapāpaṃ śamaṃ yāti dattātreya namo'stute

idaṃ stotraṃ mahaddivyaṃ dattapratyakṣakārakam /
dattātreyaprasādācca nāradena prakīrtitam

// iti śrīnāradapurāṇe nāradaviracitaṃ
dattātreyastotraṃ susaṃpūrṇam //