Atharva Veda · Chapter 7.87

abhyarcata suṣṭutiṃ gavyamājimasmāsu bhadrā draviṇāni dhatta /
imaṃ yajñaṃ nayata devatā no ghṛtasya dhārā madhumatpavantām

mayyagre agniṃ gṛhṇāmi saha kṣatreṇa varcasā balena /
mayi prajāṃ mayyāyurdadhāmi svāhā mayyagnim

ihaivāgne adhydhārayā rayiṃ mā tvā ni kran pūrvacittā nikāriṇaḥ /
kṣatreṇāgne suyamamastu tubhyamupasattā vardhatāṃ te aniṣṭṛtaḥ

anvagniruṣasāmagramakhyadanvahāni prathamo jātavedāḥ /
anu sūrya uṣaso anu raśmīn anu dyāvāpṛthivī ā viveśa

pratyagniruṣasāmagramakhyatprati ahāni prathamo jātavedāḥ /
prati sūryasya purudhā ca raśmīn prati dyāvāpṛthivī ā tatāna

ghṛtaṃ te agne divye sadhasthe ghṛtena tvāṃ manuradyā samindhe /
ghṛtaṃ te devīrnaptya ā vahantu ghṛtaṃ tubhyaṃ duhratāṃ gāvo agne