Atharva Veda · Chapter 7.77

samiddho agnirvṛṣaṇā rathī divastapto gharmo duhyate vāmiṣe madhu /
vayaṃ hi vāṃ purudamāso aśvinā havāmahe sadhamādeṣu kāravaḥ

samiddho agniraśvinā tapto vāṃ gharma ā gatam /
duhyante nūnaṃ vṛṣaṇeha dhenavo dasrā madanti vedhasaḥ

svāhākṛtaḥ śucirdeveṣu yajño yo aśvinoścamaso devapānaḥ /
tamu viśve amṛtāso juṣāṇā gandharvasya pratyāsnā rihanti

yadusriyāsvāhutaṃ ghṛtaṃ payo'yaṃ sa vāmaśvinā bhāga ā gatam /
mādhvī dhartārā vidathasya satpatī taptaṃ gharmaṃ pibataṃ divaḥ

tapto vāṃ gharmo nakṣatu svahotā pra vāmadhvaryuścaratu payasvān /
madhordugdhasyāśvinā tanāyā vītaṃ pātaṃ payasa usriyāyāḥ

upa drava payasā godhugoṣamā gharme siñca paya usriyāyāḥ /
vi nākamakhyatsavitā vareṇyo'nuprayāṇamuṣaso vi rājati

upa hvaye sudughāṃ dhenumetāṃ suhasto godhuguta dohadenām /
śreṣṭhaṃ savaṃ savitā sāviṣan no'bhīddho gharmastadu ṣu pra vocat

hiṅkṛṇvatī vasupatnī vasūnāṃ vatsamicchantī manasā nyāgan /
duhāmaśvibhyāṃ payo aghnyeyaṃ sā vardhatāṃ mahate saubhagāya

juṣṭo damūnā atithirduroṇa imaṃ no yajñamupa yāhi vidvān /
viśvā agne abhiyujo vihatya śatrūyatāmā bharā bhojanāni

agne śardha mahate saubhagāya tava dyumnānyuttamāni santu /
saṃ jāspatyaṃ suyamamā kṛṇuṣva śatrūyatāmabhi tiṣṭhā mahāṃsi

sūyavasādbhagavatī hi bhūyā adhā vayaṃ bhagavantaḥ syāma /
addhi tṛṇamaghnye viśvadānīṃ piba śuddhamudakamācarantī