Atharva Veda · Chapter 7.102

yadadya tvā prayati yajñe asmin hotaścikitvann avṛṇīmahīha /
dhruvamayo dhruvamutā śaviṣṭhaipravidvān yajñamupa yāhi somam

samindra no manasā neṣa gobhiḥ saṃ sūribhirharivantsaṃ svastyā /
saṃ brahmaṇā devahitaṃ yadasti saṃ devānāṃ sumatau yajñiyānām

yān āvaha uśato deva devāṃstān preraya sve agne sadhasthe /
jakṣivāṃsaḥ papivāṃso madhūnyasmai dhatta vasavo vasūni

sugā vo devāḥ sadanā akarma ya ājagma savane mā juṣāṇāḥ /
vahamānā bharamāṇāḥ svā vasūni vasuṃ gharmaṃ divamā rohatānu

yajña yajñaṃ gaccha yajñapatiṃ gaccha /
svāṃ yoniṃ gaccha svāhā

eṣa te yajño yajñapate sahasūktavākaḥ /
suvīryaḥ svāhā

vaṣaḍdhutebhyo vaṣaḍahutebhyaḥ /
devā gātuvido gātuṃ vittvā gātumita

manasaspata imaṃ no divi deveṣu yajñam /
svāhā divi svāhā pṛthivyāṃ svāhāntarikṣe svāhā vāte dhāṃ svāhā