Atharva Veda · Chapter 4.4

yāṃ tvā gandharvo akhanadvaruṇāya mṛtabhraje /
tāṃ tvā vayaṃ khanāmasyoṣadhiṃ śepaharṣaṇīm

uduṣā udu sūrya udidaṃ māmakaṃ vacaḥ /
udejatu prajāpatirvṛṣā śuṣmeṇa vājinā

yathā sma te virohato'bhitaptamivānati /
tataste śuṣmavattaramiyaṃ kṛṇotvoṣadhiḥ

ucchuṣmauṣadhīnāṃ sārā ṛṣabhāṇām /
saṃ puṃsāmindra vṛṣṇyamasmin dhehi tanūvaśin

apāṃ rasaḥ prathamajo'tho vanaspatīnām /
uta somasya bhrātāsyutārśamasi vṛṣṇyam

adyāgne adya savitaradya devi sarasvati /
adyāsya brahmaṇaspate dhanurivā tānayā pasaḥ

āhaṃ tanomi te paso adhi jyāmiva dhanvani /
kramasvarśa iva rohitamanavaglāyatā sadā

aśvasyāśvatarasyājasya petvasya ca /
atha ṛṣabhasya ye vājāstān asmin dhehi tanūvaśin